ছোৱাইন ফ্লু প্ৰতিৰোধৰ বাবে কি উপায় গ্ৰহণ কৰিব ? ইয়াৰ ভেকচিন কেনেকৈ, ক’ত লাভ কৰিব ?

প্ৰতীকী ফটো

ছোৱাইন ফ্লু অৰ্থাৎ H1N1 ভাইৰাছ প্ৰতি বছৰে শীতকাল আৰু পৰিৱৰ্তিত ঋতুত দ্ৰুতগতিত বিয়পে। এই ভাইৰাছ কাহ, হাঁচি আৰু সংক্ৰমিত ৰোগীৰ সংস্পৰ্শৰ দ্বাৰা শৰীৰত প্ৰৱেশ কৰিব পাৰে। ইয়াৰ প্ৰতিৰোধৰ বাবে ৰোগ প্ৰতিৰোধ ক্ষমতা সবল কৰি ৰখাটো জৰুৰী । কিন্তু এই ভাইৰাছৰ পৰা ৰক্ষা পাবলৈ কোনো ভেকচিন উপলব্ধ আছেনে ? H1N1 ভেকচিনে এই ভাইৰাছৰ পৰা সুৰক্ষা প্ৰদান কৰে আৰু এই ভেকচিন আপোনাৰ বাবে অতি উপকাৰী হ’ব পাৰে। এই ভেকচিন কেনেদৰে কাম কৰে, কোনে পাব পাৰে আৰু ক’ত পোৱা যায় ? জানক

ছোৱাইন ফ্লুৰ ভেকচিনে কেনেকৈ কাম কৰে?

H1N1 ভেকচিনে শৰীৰত এন্টিব’ডি বিকশিত কৰে । যিয়ে ভাইৰাছৰ বিৰুদ্ধে যুঁজ দিয়াত সহায় কৰে। ইয়াক ফ্লুৰ ভেকচিনৰ অংশ বুলি গণ্য কৰা হয় আৰু বছৰি দিয়া হয়। ভেকচিন লোৱাৰ পিছত শৰীৰে ভাইৰাছৰ বিৰুদ্ধে যুঁজিবলৈ শক্তি লাভ কৰে । যাৰ বাবে সংক্ৰমণৰ সম্ভাৱনা কমি যায়।

কোন কোন লোকে এই ভেকচিন ল’ব পাৰে ?

বিশেষজ্ঞসকলৰ মতে, কিছুমান লোক ছোৱাইন ফ্লুৰ হাই-ৰিস্ক জ’নত পৰে আৰু তেওঁলোকে এই ভেকচিন নিশ্চিতভাৱে ল’ব লাগে। বিশেষকৈ ৬ মাহৰ ওপৰৰ শিশুৱে এই ভেকচিন ল’ব লাগে । কাৰণ তেওঁলোকৰ ৰোগ প্ৰতিৰোধ ক্ষমতা দুৰ্বল। ইয়াৰ পিছত গৰ্ভৱতী মহিলাসকলেও এই ভেকচিন ল’ব লাগে। একে সময়তে ৬০ বছৰৰ ওপৰৰ বৃদ্ধ লোকসকলেও এই ভেকচিন ল’ব লাগে। ডায়েবেটিছ, হৃদৰোগ আৰু হাঁপানি ৰোগীয়েও সুৰক্ষাৰ বাবে ভেকচিন ল’ব লাগে।

ক’ৰ পৰা কেনেকৈ ভেকচিন লাভ কৰিব পাৰি?

যদি আপুনি এই ভেকচিন ল’ব বিচাৰে তেন্তে ওচৰৰ চৰকাৰী চিকিৎসালয়, প্ৰাথমিক স্বাস্থ্য কেন্দ্ৰ (পি এইচ চি), সামূহিক স্বাস্থ্য কেন্দ্ৰ (চি এইচ চি) বা স্বীকৃতিপ্ৰাপ্ত ব্যক্তিগত চিকিৎসালয়ৰ সৈতে যোগাযোগ কৰিব পাৰে। চৰকাৰী চিকিৎসালয়ত প্ৰায়ে বিনামূলীয়া টিকাকৰণ অভিযান চলোৱা হয়। ব্যক্তিগত চিকিৎসালয়ত এই ভেকচিন উপলব্ধ যদিও ইয়াৰ বাবে কিছু মাচুল দিব লাগিব পাৰে।

ছোৱাইন ফ্লু প্ৰতিৰোধৰ অন্যান্য উপায়

ভেকচিনৰ লগতে কিছু সাৱধানতাও এই ভাইৰাছৰ পৰা ৰক্ষা কৰাত সহায় কৰিব পাৰে। ভিৰ কৰা ঠাইত মাস্ক পৰিধান কৰিব লাগে। সঘনাই হাত ধোৱাৰ অভ্যাস গঢ়ি তোলক। আক্ৰান্ত ব্যক্তিৰ পৰা দূৰত্ব বজাই ৰাখক। ভাল খাদ্য গ্ৰহণ কৰক আৰু ৰোগ প্ৰতিৰোধ ক্ষমতা শক্তিশালী কৰক। যদি ফ্লুৰ লক্ষণ দেখা দিয়ে তেন্তে লগে লগে চিকিৎসকৰ লগত যোগাযোগ কৰিব লাগে।