Happy Diwali Wishes In Assamese: দেৱালীৰ দিনটোত আপোনজনক এইদৰে জনাওক শুভেচ্ছা
সমাগত পোহৰৰ উৎসৱ দীপাৱলী। ৰাজ্যৰ প্ৰান্তে প্ৰান্তে আৰম্ভ হৈছে দীপাৱলীক আদৰাৰ প্ৰস্তুতি ৷ লাখ লাখ মাটিৰ চাকি তৈয়াৰ কৰি চীনা সামগ্ৰীক প্ৰত্যাহ্বান জনাবলৈ সাজু মৃৎশিল্পীসকল। দীপাৱলীৰ দিনা প্ৰত্যেকৰে ঘৰখনৰ লগতে চৌপাশ পোহৰাই তুলিবলৈ মৃৎ শিল্পীসকলে তৈয়াৰ কৰি উলিয়াইছে বিভিন্ন আকৃতিৰ মাটিৰ চাকি ৷
দেৱালীৰ দিনটোত আপোনজনক এইদৰে জনাওক শুভেচ্ছা
দীপাৱলী মানেই পোহৰৰ উৎসৱ। সমগ্ৰ দেশ পোহৰৰ ৰঙেৰে উজলি উঠে এই উৎসৱত ৷ প্রত্যেকে ঘৰে ঘৰে জ্বলাই বন্তি। মানুহৰ ঘৰৰ লগতে মনবোৰো এই উৎসৱত পোহৰ হৈ পৰে। দীপাৱলীক আদৰাৰ বাবে লাখে লাখে মাটিৰ চাকি তৈয়াৰ কৰি উলিয়াইছে মৃৎশিল্পীসকলে।
দেৱালী, দীপাৱলী বা দ্বীপান্বিতা চাৰি-পাঁচ দিনীয়া ভাৰতীয় পোহৰৰ উৎসৱ। প্ৰতি বছৰে শৰৎ কালত কাতি মাহৰ অমাবস্যা তিথিত হিন্দু সকল, জৈন সকল, শিখ সকল, আৰু কিছু বৌদ্ধ সকলে এই উৎসৱ পালন কৰে। এই উৎসৱ অত্যন্ত জনপ্ৰিয় আৰু ই “অন্ধকাৰৰ বিৰুদ্ধে পোহৰৰ, বেয়াৰ বিৰুদ্ধে ভালৰ আৰু অজ্ঞানৰ বিৰুদ্ধে জ্ঞানৰ বিজয়”ক প্ৰতিনিধিত্ব কৰে। পোহৰে জ্ঞান আৰু বিবেকক বুজায়। দেৱালীৰ সময়ত ঘৰ-দুৱাৰ, দোকান-পোহৰ, কাৰ্যালয়, মন্দিৰ আদি নানান আলোকসজ্জাৰে আলোকিত কৰা হয়। দেৱালীৰ ৰীতি-নীতি পাঁচদিনীয়াকৈ চলে যদিও উৎসৱৰ তৃতীয় দিনা হিন্দু দিনপঞ্জীমতে বছৰৰ আটাইতকৈ অন্ধকাৰ দিন কাতি মাহৰ অমাবস্যা তিথিত মূল দেৱালী পালন কৰা হয়। গ্ৰেগৰিয়ান বৰ্ষপঞ্জী মতে দ্বীপান্বিতা উৎসৱ সাধাৰণতে অক্টোবৰ-নৱেম্বৰ মাহৰ মাজত অনুষ্ঠিত হয়।
দেৱালীৰ আগে-আগে মানুহে তেওঁলোকৰ ঘৰ আৰু কৰ্মস্থানৰ চাফ-চিকুণ, পুনৰনিৰ্মাণ আৰু সৌন্দৰ্য্য বৰ্ধনত ব্যস্ত হয়। দেৱালীৰ দিনা সকলোৱে সুন্দৰ সাজ পিন্ধি ঘৰৰ ভিতৰে বাহিৰে মিঠাতেলৰ মাটিৰ চাকি, মম, আলোকসজ্জাৰে আলোকিত কৰে। উত্তৰ ভাৰতত কেইদিনা ধন আৰু সম্পত্তিৰ অধিষ্ঠাত্ৰী দেৱী লক্ষ্মীৰ পূজা-অৰ্চনা কৰা হয়। ইয়াৰ লগতে বোমা-ফটকা ফুটাই আনন্দ কৰা দেৱালীৰ অন্যতম বৈশিষ্ট্য। দ্বীপান্বিতাৰ সময়ত ওচৰ-চুবুৰীয়া আৰু সম্পৰ্কীয় সকললৈ মিঠাই আৰু উপহাৰ আদান-প্ৰদানৰো নিয়ম আছে। দেৱালী সমগ্ৰ দক্ষিণ এছিয়াত উলহ-মালহৰে উদযাপন কৰাৰ লগতে গোটেই বিশ্বতে ভাৰতীয় মূলৰ মানুহৰ মাজত বিশেষভাৱে জনপ্ৰিয়।
দীপাৱলীৰ তাৎপৰ্য
ভাৰতত দীপাৱলীৰ ধৰ্মীয়, সামাজিক, সাংস্কৃতিক তাৎপৰ্য অপৰিসীম। দীপাৱলী মূলতঃ হিন্দু উৎসৱ, কিন্তু জৈন আৰু শিখ ধৰ্মৰ দৰে অন্যান্য ধৰ্মইও ইয়াক পালন কৰে। ই বেয়াৰ ওপৰত ভালৰ জয় আৰু আন্ধাৰৰ ওপৰত পোহৰৰ জয়ৰ প্ৰতীক। দীপাৱলীৰ সময়ত মানুহে ধনৰ দেৱী লক্ষ্মী আৰু বাধা আঁতৰোৱা ভগৱান গণেশক প্ৰাৰ্থনা কৰে।
দীপাৱলী বছৰৰ এনে এক সময় যেতিয়া পৰিয়াল আৰু বন্ধু-বান্ধৱীয়ে একত্ৰিত হৈ উদযাপন কৰে। মানুহে উপহাৰ, মিঠাই, শুভেচ্ছা আদান-প্ৰদান কৰে আৰু ই দিয়া-গ্ৰহণৰ সময়। ভাৰততো দীপাৱলীৰ নতুন বিত্তীয় বৰ্ষৰ আৰম্ভণি হয়, আৰু মানুহে নিজৰ ব্যৱসায় আৰম্ভ কৰে পৰিষ্কাৰ স্লেটৰ সৈতে।
বন্ধু-বান্ধৱীৰ লগতে পৰিয়ালক জনাওক দেৱালীৰ শুভেচ্ছা
- দেৱালীৰ পোহৰে সমাজৰ হিংসা-বিদ্বেষ, অসূয়া-অপ্ৰীতিৰ ভাৱ আঁতৰাই আমাৰ সাতামপুৰুষীয়া সম্প্ৰীতিৰ এনাজৰীডাল শক্তিশালী কৰি তোলক
- দীপান্বিতাৰ পোহৰে নাশ কৰক সমাজৰ সকলো অপশক্তি আৰু ৰাজ্যবাসীলৈ কঢ়িয়াই আনক সুখ-শান্তি আৰু সমৃদ্ধি। দীপাৱলীৰ আন্তৰিক শুভেচ্ছা…
- এই দীপাৱলীৰ অমল কিৰণে সকলোকে স্পৰ্শ কৰক, শুভ দীপাৱলী
- পোহৰৰ উৎসৱ দীপাৱলীৰ চাকিৰ পোহৰে অমাৱস্যাৰ ঘোৰ আন্ধাৰ আঁতৰাই আমাৰ সমাজলৈ কঢ়িয়াই আনক শান্তি, ভাতৃত্ববোধ আৰু অফুৰন্ত আনন্দৰ পোহৰ।
- দীপাৱলীৰ আলোকে সকলোৰে বাবে কঢ়িয়াই আনক আশাৰ বতৰা, শুভ দীপাৱলী।
- সকলোলৈ পোহৰৰ উৎসৱ দীপাৱলীৰ শুভেচ্ছা জনালোঁ।