ডাক ৱাকৰ বিষয়ে জানেনে? সাধাৰণ যেন লগা এই ব্যায়ামবিধে কৰে দেহৰ অনেক উপকাৰ

এক সুস্বাস্থ্যৰ বাবে শাৰীৰিক ব্যায়াম অত্যন্ত প্ৰয়োজনীয়। ব্যায়ামে আমাৰ দেহ সুস্থ-সবল আৰু নিৰোগী কৰি ৰাখে। আমাৰ শৰীৰৰ বাবে উপকাৰী এনে এক শাৰীৰিক ব্যায়াম হৈছে ডাক ৱাক। নামটোৰ দৰেই এই বিশেষ ব্যায়ামবিধ কৰাৰ সময়ত হাঁহৰ দৰে খোজ কাঢ়িব লাগিব। এই ব্যায়ামত আঁঠু দুটা বেঁকা কৰি লাহে লাহে বহি সৰু সৰু খোজেৰে আগবাঢ়িব লাগে। ডাক ৱাক কৰাৰ সময়ত ব্যক্তিৰ আঁঠু, উৰু, নিতম্ব আৰু মূল পেশীবোৰত হেঁচা পৰে। দেখাত তেনেই সাধাৰণ যেন লাগিলেও কিন্তু ইয়াৰ বহু উপকাৰিতা আছে।

এই ৱৰ্কআউটে কেৱল পেশী শক্তিশালী কৰাই নহয় শৰীৰৰ নমনীয়তা আৰু ভাৰসাম্য বৃদ্ধি কৰে। লগতে ই আমাৰ দেহৰ আন বহু উপকাৰো সাধন কৰে। এই বিষয়ে চাওঁ আহক-

উৰু আৰু নিতম্ব শক্তিশালী কৰেঃ ডাক ৱাকৰ ফলত উৰু আৰু নিতম্বৰ পেশী সক্ৰিয় হয়। ইয়াৰ দ্বাৰা এই পেশীবোৰৰ শক্তি আৰু নমনীয়তা বৃদ্ধি পায়। গতিকে ডাক ৱাকে আপোনাৰ শৰীৰৰ তলৰ অংশ শক্তিশালী কৰি তোলে।

আঁঠু শক্তিশালী হয়ঃ এই ব্যায়ামে আঁঠুৰ গাঁঠিবোৰ শক্তিশালী কৰে আৰু আঁঠুৰ সমস্যাৰ পৰা সকাহ দিব পাৰে। ইয়াৰ উপৰিও আঁঠুকো নমনীয়তা প্ৰদান কৰে।

পেট আৰু পিঠিৰ পেশী শক্তিশালী হয়ঃ ডাক ৱাকৰ ফলত পেট আৰু পিঠিৰ পেশী শক্তিশালী হয়, যাৰ ফলত আপোনাৰ দেহৰ ভাৰসাম্য উন্নত হয়।

কেলৰি বাৰ্ণঃ এই শাৰীৰিক ব্যায়ামে দেহৰ কেলৰি বাৰ্ণ কৰে। অৰ্থাৎ ওজন কমাবলৈও এই ব্যায়াম অত্যন্ত উপকাৰী।

তলত দিয়া আৰ্হি অনুকৰণ কৰি দেহৰ বাবে অতি উপকাৰী এই ব্যায়ামবিধ কৰিব পাৰিব-

প্ৰথমে ভৰি দুখন কান্ধৰ পৰা পোনে পোনে অলপ বাহিৰলৈ কৰি থিয় হওক। সেই অৱস্থানতে আঁঠু দুটা বেঁকা কৰি চকীত বহিবলৈ লোৱাৰ দৰে কৰি লওক। এই সময়ত পিঠিখন পোন কৰি ৰাখক আৰু শৰীৰটো অলপ আগলৈ বেঁকা কৰি ভাৰসাম্য ৰক্ষা কৰক। হাত দুখন আগলৈ আগবঢ়াই শৰীৰটো ভাৰসাম্য ৰক্ষা কৰিবলৈ চেষ্টা কৰক।

তেনে শাৰীৰিক অৱস্থানতে আঁঠু দুটা বেঁকা কৰি সৰু সৰু খোজেৰে আগবাঢ়ক। আঁঠু দুটা যিমান পাৰি বেঁকা কৰি ৰাখিব যাতে উৰু আৰু নিতম্বত অধিক চাপ পৰে আৰু আঁঠুবোৰ শক্তিশালী হয়। এইদৰে ৩০ ছেকেণ্ডৰ পৰা ১ মিনিটলৈকে কৰক আৰু তাৰ পিছত কিছু সময় জিৰণি লওক। এই নিৰ্দিষ্ট সময়ৰ পিছত লাহে লাহে থিয় হৈ পেশীবোৰ শিথিল কৰি তুলিব লাগে।