অত্যাধিক গৰমত চকুৰ যত্ন কেনেকৈ ল’ব, সঠিক উপায় জানক…

গ্ৰীষ্মকালত প্ৰচণ্ড সূৰ্যৰ উত্তাপ আৰু গৰম বতাহে আমাৰ চকুত বেয়া প্ৰভাৱ পেলাব পাৰে। বহুতে এই সময়ছোৱাত চকুত জ্বলা-পোৰা, খজুৱতি আৰু শুকান অনুভৱ কৰে। বিশেষকৈ কৰ্ণিয়া বাৰ্ন (চকুৰ বাহিৰৰ তৰপ জ্বলা) আৰু চকু শুকান (চকুত আৰ্দ্ৰতাৰ অভাৱ) আদি সমস্যা বাঢ়ি যায়। এনে পৰিস্থিতিত আমি চকুৰ ভালদৰে যত্ন লোৱাটো প্ৰয়োজনীয়। আহক, এই গ্ৰীষ্মকালত আমাৰ চকুক সুৰক্ষিত কৰি ৰাখিব পৰা কিছুমান সহজ উপায় জানো আহক…

ৰ’দত ওলাই যোৱাৰ সময়ত চশমা পিন্ধিব

যদি আপুনি গৰম বতৰত বাহিৰলৈ ওলাই যাব লাগে তেন্তে নিশ্চিতভাৱে ছানগ্লাছ পিন্ধিব। ই সূৰ্যৰ প্ৰচণ্ড ৰশ্মিৰ পৰা চকুক ৰক্ষা কৰে আৰু লগতে চকুত ধূলি আৰু মলি সোমাব নোৱাৰে। UV protection থকা চশমা ল’বলৈ চেষ্টা কৰক, যাতে চকুৰ বিশেষ ক্ষতি নহয়।

চকু দুটা ঠাণ্ডা কৰি ৰাখিব

গ্ৰীষ্মকালত চকুৰ বিষ আৰু ভাগৰুৱা হোৱাটো সাধাৰণ কথা। এনে অৱস্থাত চকু ঠাণ্ডা কৰিবলৈ দিনে দুই-তিনিবাৰ ঠাণ্ডা পানীৰে ধুব লাগে। চকুত তিয়হৰ টুকুৰা বা গোলাপ জল লগাব পাৰে। ইয়াৰ ফলত চকুৱে গৰমৰ পৰা সকাহ পাব আৰু সতেজ অনুভৱ হ’ব।

স্ক্ৰীণৰ সময় হ্ৰাস কৰক

অত্যাধিক সময় মোবাইল, লেপটপ বা টিভিৰ ব্যৱহাৰৰ ফলত চকু ভাগৰুৱা হৈ পৰে আৰু শুকান অনুভৱ হয়। যদি আপুনি বেছি সময় স্ক্ৰীণৰ সন্মুখত থাকে তেন্তে প্ৰতি ২০ মিনিটৰ মূৰে মূৰে কেইছেকেণ্ডমান বিৰতি লৈ আঁতৰি যাওক। ইয়াৰ ফলত চকুত সকাহ পোৱাৰ লগতে চকু শুকান সমস্যা ৰোধ কৰিব পৰা যাব।

হাইড্ৰেটেড হৈ থাকক আৰু সঠিকভাৱে খাওক

গ্ৰীষ্মকালত শৰীৰত পানীৰ অভাৱ হয়, যাৰ বাবে চকুতো ক্ষতিগ্ৰস্ত হয়। দিনটো প্ৰচুৰ পৰিমাণে পানী খাব লাগে আৰু জুইচ বা নাৰিকল পানী সেৱন কৰিব লাগে। সেউজীয়া শাক-পাচলি, বিলাহী, গাজৰ আৰু ভিটামিন এ সমৃদ্ধ বস্তু খাদ্যত অন্তৰ্ভুক্ত কৰক, যাতে চকু সুস্থ হৈ থাকে।

আই ড্ৰপ ব্যৱহাৰ কৰক

যদি আপুনি চকুত অত্যধিক খজুৱতি বা শুকান অনুভৱ কৰে, তেন্তে চিকিৎসকৰ পৰামৰ্শ অনুসৰি আই ড্ৰপ ব্যৱহাৰ কৰক। ই চকুত আৰ্দ্ৰতা বজাই ৰখাত সহায় কৰে আৰু বিৰক্তিৰ পৰা উপশম দিয়ে।

পৰ্যাপ্ত টোপনি লওক

টোপনিৰ অভাৱত চকুত বিষ আৰু ফুলা সমস্যা হ’ব পাৰে। গতিকে প্ৰতিদিনে ৭-৮ ঘণ্টা সম্পূৰ্ণ টোপনি ল’বলৈ চেষ্টা কৰক। পৰ্যাপ্ত পৰিমাণে টোপনি গ’লে চকু সতেজ হৈ থাকে আৰু যিকোনো ধৰণৰ সমস্যা কমি যায়।