খাদ্য খোৱাৰ পিছত পেটৰ বিষ, শৌচাগাৰলৈ যাবলগীয়া হয় নেকি ? ই IBS ৰ লক্ষণ হ’ব পাৰে ! জানক সবিশেষ…

যদি প্ৰায়ে খাদ্য খোৱাৰ পিছত পেটৰ বিষ, গেছ বা বদহজম অনুভৱ কৰে, তেন্তে ইয়াক সহজভাৱে ল’ব নালাগে। এই সমস্যা ইৰিটেবল বাৱেল চিনড্ৰম (IBS)ৰ লক্ষণ হ’ব পাৰে। এই সমস্যাত পাচনতন্ত্ৰ সঠিকভাৱে কাম নকৰাৰ বাবে পেটৰ লগত জড়িত বহু সমস্যাৰ সৃষ্টি হ’ব পাৰে। ইয়াৰ লক্ষণ, কাৰণ আৰু প্ৰতিৰোধৰ উপায় জানো আহক ।

ইৰিটেবল বাৱেল চিণ্ড্ৰম (IBS) হৈছে হজম শক্তিৰ লগত জড়িত সমস্যা । য’ত অন্ত্ৰই সঠিকভাৱে কাম নকৰে যাৰ বাবে পেটৰ বিষ, কোষ্ঠকাঠিন্য, ডায়েৰিয়া, গেছ আৰু পেট ফুলাৰ দৰে সমস্যা হ’ব পাৰে। বহু সময়ত মানুহে ইয়াক সাধাৰণ সমস্যা বুলি গণ্য কৰি আওকাণ কৰে । কিন্তু যদি এই সমস্যাটো দীৰ্ঘদিন ধৰি থাকে তেন্তে ই গুৰুতৰ ৰূপ ল’ব পাৰে।

আই বি এছৰ লক্ষণসমূহ কেনেকৈ চিনাক্ত কৰিব পাৰি?

খাদ্য খোৱাৰ পিছত পেটৰ বিষ, সঘনাই ডায়েৰিয়া বা কোষ্ঠকাঠিন্য হোৱা, পেটত গেছ হোৱা আদি আই বি এছৰ লক্ষণ হ’ব পাৰে। ইয়াৰ উপৰিও ভোক কমি যোৱা বা সোনকালে পূৰ্ণ অনুভৱ কৰা বা খাদ্য খোৱাৰ লগে লগে শৌচাগাৰলৈ যোৱাৰ প্ৰয়োজন অনুভৱ কৰা আদি লক্ষণো আই বি এছৰ লক্ষণ হ’ব পাৰে। যদি আপোনাৰ লগত এনেকুৱা পৰিস্থিতি হয় তেন্তে ইয়াক আওকাণ নকৰিব। লগে লগে চিকিৎসকৰ লগত যোগাযোগ কৰক ।

ইৰিটেবল বাৱেল চিনড্ৰম অৰ্থাৎ আই বি এছ হৈছে পাচনতন্ত্ৰৰ সৈতে জড়িত সমস্যা। ভজা আৰু টেঙা খাদ্যৰ দৰে ভুল খাদ্য সামগ্ৰী দীৰ্ঘদিন ধৰি সেৱন কৰিলে এই অৱস্থাৰ সৃষ্টি হয়। বেছিকৈ টেঙা আৰু তিতা খাদ্য খালে আই বি এছৰ সমস্যা হ’ব পাৰে। ইয়াৰ উপৰিও মানসিক চাপ আৰু উদ্বেগেও আই বি এছৰ সৃষ্টি কৰিব পাৰে। মানসিক চাপৰ ফলত অন্ত্ৰত প্ৰভাৱ পৰে, যাৰ ফলত এই সমস্যা বৃদ্ধি পাব পাৰে । একে সময়তে সঠিক সময়ত খাদ্য গ্ৰহণ নকৰা, পৰ্যাপ্ত পৰিমাণে টোপনি নোপোৱা আৰু ব্যায়াম নকৰাৰ ফলত পাচনতন্ত্ৰ দুৰ্বল হৈ পৰে। কিছুমান মানুহৰ গাখীৰ বা দুগ্ধজাত সামগ্ৰী হজম কৰাত অসুবিধা হয়, যাৰ ফলত আই বি এছৰ লক্ষণ বৃদ্ধি পাব পাৰে।

আই বি এছৰ পৰা হাত সাৰিবলৈ কি কৰিব লাগে?

• আঁহযুক্ত খাদ্য খোৱাৰ ওপৰত গুৰুত্ব দিব । খাদ্যৰ তালিকাত দাইল, সেউজীয়া শাক-পাচলি, ফল-মূল আদি অন্তৰ্ভুক্ত কৰক ।
• প্ৰচেছড ফুড পৰিহাৰ কৰক । ভাজি, টেঙা আৰু জাংক ফুড কমকৈ খাবলৈ চেষ্টা কৰক ।
• পানী বেছিকৈ খাব লাগে । দিনটো কমেও ৮-১০ গিলাচ পানী খাব লাগে।
• মানসিক চাপ কমাব। যোগাসন, ধ্যান আৰু লঘু ব্যায়ামৰ দ্বাৰা মনক শান্ত কৰি ৰাখক।
• কেফেইন আৰু মিঠা পানীয় পৰিহাৰ কৰক । চাহ, কফি, শীতল পানীয় আৰু মিঠাইৰ সেৱন কম কৰক।
• লাহে লাহে আহাৰ গ্ৰহণ কৰক । খৰখেদাকৈ খালে পেটত গেছ হ’ব পাৰে।