Rongali Bihu 2025: কেনেদৰে পালন কৰা হয় সাত বিহু? ইয়াৰ আঁৰৰ পৰম্পৰাৰ বিষয়ে জানক…

ৰঙালী বিহু

সমাগত অসমীয়াৰ হেঁপাহৰ উৎসৱ ৰঙালী বিহু। সাতখন-আঠখন হৈছে এতিয়া অসমীয়াৰ গা। গছক ডালত কুলিৰ মাত, ঢোল-পেপাঁৰ মাতে ৰজনজনাইছে চৌপাশ। চলিছে বিহুৰ আখৰা। কঁকাল ভাঙিবলৈ সাজু হৈছে নাচনী। তিনিটা বিহুৰ ভিতৰত ব’হাগ বিহু বা ৰঙালী বিহুৱেই প্ৰধান। চ’ত মাহৰ শেষ দিনা বা সংক্ৰান্তিৰ পৰা ব’হাগ বিহু আৰম্ভ হয়। ইয়াক সাধাৰণতে চ’তৰ বিহু বুলিও জনা যায়।

ব’হাগ বিহু কেতিয়া?

ৰঙালী বা ব’হাগ বিহু এপ্ৰিল মাহত উদযাপন কৰা হয় আৰু উদযাপন সাত দিন ধৰি চলি থাকে। এই সাতদিন ‘গৰু বিহু’, ‘মানুহ বিহু’, ‘গোসাঁই বিহু’, ‘তাতোৰ বিহু’, ‘নাঙলৰ বিহু’, ‘জীয়ৰী বা চেনেহী বিহু’, আৰু ‘চেৰা বিহু’। চ’তৰ সংক্রান্তিৰ দিনাৰ পৰা আৰম্ভ হোৱা বিহু শেষ হয় ব’হাগ মাহৰ ৬ তাৰিখে। অৰ্থাৎ এইবাৰ ১৪ এপ্ৰিলৰ পৰা ২০ এপ্ৰিললৈ পালন কৰা হ’ব  ৰঙালী বা ব’হাগ বিহু।

সাত বিহুৰ পৰম্পৰা

চ’তৰ সংক্ৰান্তিৰ পৰা আৰম্ভ হৈ ব’হাগৰ ছয় দিনলৈ মুঠ সাতদিন পালন কৰা হয় ব’হাগ বিহু। ইয়াকে প্ৰত্যেকটো দিনৰে সুকীয়াকৈ নামকৰণ কৰা হৈছে। সেয়া হ’ল- গৰু বিহু, মানুহ বিহু, গোঁসাই বিহু, তাঁতৰ বিহু, নাঙলৰ বিহু,জীয়ৰী বা চেনেহী বিহু আৰু চেৰা বিহু। এই সাতটা বিহুকে অসমীয়াৰ সাত বিহু বুলি জনা যায়।

গৰু বিহু

চ’ত আৰু ব’হাগ মাহৰ সংক্ৰান্তিৰ দিনা গৰু বিহু পালন কৰা হয়। অসমৰ গ্ৰাম্য সমাজৰ অন্যতম উৎসৱ এই গৰু বিহু। গৰু বিহুত গাঁৱৰ কৃষকসকলে ঘৰৰ গৰুকেইটাক ওচৰৰ নৈ অথবা জান-জুৰিৰ ঘাটলৈ লৈ গৈ নোৱায়-ধুৱায়। দীঘলতি, মাখিয়তি পাতেৰে গৰুৰ গাত কোবাই, লাও-বেঙেনা খুৱাই ঘৰৰ গৰুকেইটাৰ দীৰ্ঘায়ু আৰু নশক্তি কামনা কৰে।। সন্ধিয়া ঘৰলৈ ঘূৰি অহাৰ পাছত মাখিয়তী পাতৰে ‘মাখিয়তী মাখিপাত মাখি মাৰো জাক-জাক’ বুলি গাই গৰুক বিছি দিয়া হয় আৰু পিঠা-পনা খাবলৈ দি নতুন পঘাৰে বন্ধা হয়। সেই দিনা গৰুক দিয়া তেল মানুহে গাত ঘঁহিলে চৰ্মৰোগ নহয় বুলি বিশ্বাস আছে।

গৰু বিহুৰ দিনা অসমীয়াই এনেদৰে গায়-

দীঘলতিৰ দীঘল পাত, গৰু কোবাওঁ জাত জাত
মাখিয়তীৰ মাখি পাত, মাখি মাৰোঁ জাত জাত

লাউ খা বেঙেনা খা, বছৰে বছৰে বাঢ়ি যা।
মাৰ সৰু বাপেৰ সৰু, তই হ’বি বৰ বৰ গৰু

সন্ধিয়া পথাৰৰ পৰা ঘৰৰ গৰু ঘূৰি অহাৰ পাছতেই খেৰ, বিহলঙনী আদিৰে জুই জ্বলাই গৰুৰ আগত তাৰ ধোঁৱা বিচনীৰে বিচি দিয়া হয়। অসমবাসীৰ মাজত ইয়াক ‘জাগ দিয়া’ বুলি কোৱা হয়। প্ৰবাদ আছে যে, অসমবাসীয়ে গৰু বিহুৰ দিনা ঘৰৰ গৰুকেইটাক জাগ দিয়াৰ পিছতহে বিচনী ব্যৱহাৰ কৰে।

মানুহ বিহু

গৰু বিহুৰ পাছদিনা অৰ্থাৎ পহিলা বহাগৰ দিনা মানুহৰ বিহু পালন কৰা হয়। মানুহৰ বিহুত ৰাতিপুৱাই সকলোৱে গা-পা ধুই সৰুৱে ডাঙৰক সেৱা কৰি আৰ্শীবাদ লয়।মানুহ বিহুৰ দিনা সকলোৱে নতুন কাপোৰ পিন্ধি ইজনে-সিজনক বিহুৱান উপহাৰ দিয়ে।

গোঁসাই বিহু

ৰঙালী বিহুৰ তৃতীয় দিনা গোঁসাই বিহু পালন কৰা হয়। সেইদিনা ভগৱানক স্তুতি কৰি বছৰটোৰ বাবে সকলোৰে মংগল কামনা কৰা হয়। সকলোৰে অপায়-অমংগল দূৰ কৰিবলৈ নামঘৰ-মন্দিৰ আদিত নাম-প্ৰসংগ কৰে।

তাঁতৰ বিহু 

অসমীয়া জনজীৱনৰ এক অনবদ্য সম্পদ হৈছে তাঁতশালখন। ব’হাগ বিহুৰ  চতুৰ্থটো দিনটোত অসমীয়া সমাজত তাঁতৰ বিহু পালন কৰা হয়। সেইদিনা তাঁতশালত চাকি-বন্তি জ্বলাই সেৱা জনায় শিপিনীয়ে।

নাঙলৰ বিহু

মূলত কৃষি-কৰ্মতেই নিৰ্ভৰশীল অসমীয়াৰ অন্যতম এপদ সম্পদ নাঙল।সেয়েহে কৃষিকৰ্মক  প্ৰাধান্য দি বিহুৰ পঞ্চম দিনা নাঙলৰ বিহু বুলি পালন কৰা হয়। নাঙল বিহুৰ তাৎপৰ্য হ’ল ব’হাগ বিহুৰ ৰং-ৰহইচৰ অন্তত পথাৰ উপচোৱা বৰষুণজাকৰ সৈতে খেতিৰ বাবে পথাৰত নমাৰ পূৰ্বে কৃষিকাৰ্যত ব্যৱহাৰ হোৱা সা-সজুঁলিসমূহৰ ওচৰত চাকি বন্তি জ্বলাই বছৰটোৰ সমৃদ্ধি কামনা কৰে৷

চেনেহী বা জীয়ৰী বিহু

বিহুৰ ষষ্ঠদিনা চেনেহী বা জীয়ৰী বিহু পালন কৰা হয়। এই বিহুত বিয়া দিয়া জীয়ৰী নিজৰ ঘৰলৈ আহে।সেয়েহে সেইদিনা ‘চেনেহী বা জীয়ৰী বিহু’।

চেৰা বিহু

সাত বিহুৰ শেষৰ দিনা চেৰা বিহু। চেৰা শব্দৰ অৰ্থ হ’ল অৱসান বা ত্যাগ৷  এই বিহুক কোনো কোনোয়ে এৰা বিহু বুলিও কয়।এই বিহুত বহু আঞ্জাৰে ভাত আৰু ঠাই বিশেষে এশ এবিধ শাক খোৱাৰ নিয়ম আছে। কিছুমানে  সাতবিধ শাক খায় এই নিয়ম পালন কৰে। যাক সাতশাকী বুলি কোৱা হয়।

লগতে পঢ়ক: কেতিয়া পালন কৰা হ’ব ব’হাগ বিহু? জানক ৰঙালীৰ পৰম্পৰা, তাৎপৰ্য, ইতিহাস সকলো…