শৰীৰত উৎপাদন হোৱা নাই নেকি পৰ্যাপ্ত বীৰ্য? হ’ব পাৰে এনে ৰোগৰ লক্ষণ…

সাম্প্ৰতিক সময়ত অস্বাস্থ্যকৰ জীৱনশৈলীৰ লগতে আন বিভিন্ন কাৰণত মানুহৰ মাজত যৌন সমস্যা বৃদ্ধি পাইছে। এনে সমস্যাসমূহৰ প্ৰভাৱ ব্যক্তিৰ মানসিকতাত পৰাও পৰিলক্ষিত হয়। পুৰুষৰ ক্ষেত্ৰত দেখা দিয়া এনে যৌন সমস্যাৰ ভিতৰত শুক্ৰাণুজনিত সমস্যা অন্যতম। শুক্ৰাণুৰ সংখ্যা কম হোৱাটোৱে কেৱল পুৰুষৰ বন্ধ্যাত্বৰ ক্ষেত্ৰতে প্ৰভাৱ পেলায় এনে নহয়, পুৰুষৰ ৰোগৰ সম্ভাৱনাও বৃদ্ধি কৰিব পাৰে। গৱেষকসকলৰ মতে এজন পুৰুষৰ শুক্ৰাণুৰ সংখ্যা তেওঁৰ সাধাৰণ স্বাস্থ্যৰ সূচক আৰু প্ৰজনন ক্ষমতাৰ মূল্যায়ন।

শুক্ৰাণুৰ সংখ্যাই পুৰুষৰ স্বাস্থ্য মূল্যায়ন আৰু ৰোগ প্ৰতিৰোধৰ ক্ষেত্ৰত বিশেষ ভূমিকা পালন কৰে। ইটালীৰ ব্ৰেচিয়া বিশ্ববিদ্যালয়ৰ সহযোগী অধ্যাপক এলবাৰ্টো ফাৰ্লিনৰ নেতৃত্বত এই সন্দৰ্ভত এক অধ্যয়ন কৰা হৈছিল। অধ্যাপক এলবাৰ্টো ফাৰ্লিনে উল্লেখ কৰা মতে এই অধ্যয়নে শুক্ৰাণুৰ সংখ্যা কম হোৱাটো বিপাকীয় পৰিৱৰ্তন, হৃদৰোগৰ আশংকা আৰু হাড়ৰ ঘনত্ব কম হোৱাৰ সৈতেও জড়িত বুলি স্পষ্টভাৱে দেখুৱাইছে।

অধ্যাপক ফাৰ্লিনে কয় যে বন্ধ্যাত্ব পুৰুষৰ উল্লেখযোগ্য স্বাস্থ্যজনিত সমস্যাৰ ইংগিত হ’ব পাৰে। ENDO 2018: The Endocrine Society’s 100th Annual Meeting and Expo ত উপস্থাপন কৰা এই অধ্যয়নৰ বাবে গৱেষকসকলে বন্ধ্যা দম্পতীৰ ৫,১৭৭ জন পুৰুষৰ ওপৰত অধ্যয়ন কৰিছিল। অধ্যয়নত অংশগ্ৰহণ কৰা সকলো পুৰুষৰ শুক্ৰাণু বিশ্লেষণ কৰা হৈছিল, য’ত তেওঁলোকৰ প্ৰজনন হৰম’ন অন্তৰ্ভুক্ত কৰা হৈছিল।

গৱেষকসকলে জানিব পাৰিছে যে প্ৰায় আধা পুৰুষৰ শুক্ৰাণুৰ সংখ্যা কম আৰু স্বাভাৱিক শুক্ৰাণুৰ সংখ্যা থকা পুৰুষতকৈ শৰীৰৰ চৰ্বি বেছি হোৱাৰ সম্ভাৱনা ১.২ গুণ বেছি। এই লোকসকলৰ উচ্চ ৰক্তচাপ, বেয়া কলেষ্টেৰল (LDL) আৰু ট্ৰাইগ্লিচাৰাইডৰ মাত্ৰা অধিক আছিল। তাৰ বিপৰীতে ভাল কলেষ্টেৰল (HDL)ৰ মাত্ৰা কম। গৱেষকসকলে লগতে এই লোকসকলৰ মেটাবলিক চিনড্ৰমৰ প্ৰাদুৰ্ভাৱ বেছি বুলিও জানিবলৈ দিছে।

ইয়াৰ ফলত ডায়েবেটিছ, হৃদৰোগ আৰু ষ্ট্ৰোকৰ সম্ভাৱনা বৃদ্ধি পায় বুলি গৱেষকসকলে লগতে কয়। অধ্যয়নত লগতে ডায়েবেটিছ ৰোগত আক্ৰান্ত হ’ব পৰা ইনচুলিন প্ৰতিৰোধ ক্ষমতাৰ এটা পৰিমাপো কম শুক্ৰাণুৰ সংখ্যা থকা পুৰুষৰ ক্ষেত্ৰত বেছি আছিল বুলি প্ৰকাশ পাইছে। গৱেষকসকলে প্ৰকাশ কৰিছে যে শুক্ৰাণুৰ সংখ্যা কম থকা পুৰুষৰ হাইপ’গ’নাডিজম বা টেষ্টষ্টেৰনৰ মাত্ৰা কম হোৱাৰ সম্ভাৱনা ১২গুণ বৃদ্ধি পায়।