হৃদৰোগক লৈ চিন্তিত নেকি ? এইসমূহ খাদ্য গ্ৰহণে হৃদযন্ত্ৰ সুস্থ কৰি ৰখাত কৰিব সহায়

হৃদযন্ত্ৰ সুস্থ কৰি ৰাখিবলৈ খাওক এইবোৰ খাদ্য

কৰ’ণা মহামাৰীৰ পিছত ভাৰতত হৃদৰোগীৰ সংখ্যা দ্ৰুতগতিত বৃদ্ধি পাইছে । বিশেষকৈ কম বয়সীয়া লোকসকল হাৰ্ট এটেক, কাৰ্ডিয়াক এৰেষ্টকে ধৰি হৃদৰোগৰ বলি হৈছে । ইয়াৰ আঁৰৰ কাৰণ হৈছে ভাৰসাম্যহীন খাদ্য আৰু ভুল জীৱনশৈলী, যিয়ে মানুহক মেদবহুলতা, ডায়েবেটিছ আৰু উচ্চ ৰক্তচাপৰ বলি কৰি তুলিছে । এই সমস্যাই হৃদৰোগ বৃদ্ধিত আৰু অধিক সহায় কৰিছে । এনে পৰিস্থিতিত আজি মানুহ নিজৰ স্বাস্থ্যৰ প্ৰতি চিন্তিত আৰু সচেতন হৈ পৰিছে ।

মানুহে জানিব বিচাৰে যে তেওঁলোকে কি খাব লাগে, যিয়ে তেওঁলোকক এই ৰোগবোৰৰ পৰা আঁতৰাই ৰাখিব পাৰে । গতিকে এনে কিছুমান খাদ্যৰ বিষয়ে জানো আহক, যিবোৰ খালে আপুনি হৃদৰোগৰ পৰা আঁতৰি থাকিব পাৰে আৰু এটা সুস্থ শৰীৰ গঢ়ি তুলিব পাৰে ।

সেউজীয়া পাতৰ শাক-পাচলি

সেউজীয়া শাক-পাচলি খোৱাৰ উপকাৰিতাৰ কথা সকলোৱে জানে । সেউজীয়া শাক-পাচলি আমাৰ শৰীৰৰ বাবে কিমান উপকাৰী সেয়া দুনাই কোৱাৰ প্ৰয়োজন নিশ্চয় নাই । সেউজীয়া শাক-পাচলিত প্ৰচুৰ পৰিমাণে ভিটামিন, খনিজ পদাৰ্থ আৰু আঁহ থাকে । ইয়াক হৃদযন্ত্ৰৰ বাবে ভাল বুলি গণ্য কৰা হয় । কচু, মেথি, সৰিয়হ, ব্ৰকলিকে ধৰি বহু শাক-পাচলিত আঁহৰ পৰিমাণ বেছি আৰু ই আমাৰ শৰীৰত কলেষ্টেৰলৰ পৰিমাণ কমাই হৃদৰোগ প্ৰতিৰোধ কৰে । গতিকে আমি সেউজীয়া শাক-পাচলি গ্ৰহণ কৰা উচিত ।

সতেজ ফল-মূল খাওক

ফল-মূলত কেলৰি কম আৰু পুষ্টিকৰ উপাদান বেছি থাকে । ইয়াত এনে বহু উপাদান থাকে যিয়ে কলেষ্টেৰল হ্ৰাস কৰে আৰু হৃদযন্ত্ৰক সুস্থ কৰি ৰাখে । ব্লুবেৰী, ষ্ট্ৰবেৰী, এভোকেডো, জামুকে ধৰি বহুতো ফল আমাৰ শৰীৰৰ বাবে উপকাৰী । বহু ফল-মূলত প্ৰচুৰ পৰিমাণে এন্টিঅক্সিডেন্ট থাকে। ই শৰীৰৰ বেয়া তেজবোৰ আঁতৰাই বিশুদ্ধ তেজৰ সৃষ্টি কৰে । ইয়াৰ ফলত হৃদৰোগৰ সম্ভাৱনা কম হয় ।

বাদাম

হৃদৰোগীৰ বাবে আলমণ্ড আৰু আখৰোট উপকাৰী । আঁহৰ লগতে মনোঅনচেচুৰেটেড আৰু পলিঅনচেচুৰেটেড ফেট আখৰোট আৰু আলমণ্ডত পোৱা যায় । যিয়ে কলেষ্টেৰলৰ মাত্ৰা হ্ৰাস কৰাত সহায় কৰে আৰু হৃদযন্ত্ৰৰ স্বাস্থ্য উন্নত কৰে । ইয়াৰ উপৰিও চিয়া গুটি আৰু শণৰ গুটিও হৃদযন্ত্ৰ সুস্থ কৰি ৰখাৰ বাবে ভাল বুলি বিবেচিত হয় ।

মাছ

হৃদযন্ত্ৰৰ লগত জড়িত ৰোগবোৰ আঁতৰাই ৰখাত মাছে সহায় কৰে । মাছ প্ৰতিমাহত ৩ৰ পৰা ৪ সাঁজ খাব লাগে । কাৰণ মাছত ওমেগা-৩ ফেটি এচিড থাকে, যিয়ে উচ্চ ৰক্তচাপ নিয়ন্ত্ৰণত আৰু প্ৰদাহ কমোৱাত সহায় কৰে ।

গোটা শস্য

খাদ্যত গোটা শস্য অন্তৰ্ভুক্ত কৰিলে হৃদ ৰোগৰ পৰা হাত সাৰিব পাৰি । গোটা শস্যত মেগনেছিয়াম আৰু পটাছিয়ামৰ দৰে খনিজ পদাৰ্থও প্ৰচুৰ পৰিমাণে থাকে। ইয়াৰ উপৰিও ইয়াত অধিক আঁহ থাকে, যিয়ে কলেষ্টেৰল হ্ৰাস কৰে আৰু তেজৰ চেনিৰ মাত্ৰা নিয়ন্ত্ৰণ কৰে ।

মচুৰ দাইল

দাইল হৈছে প্ৰটিন আৰু আঁহৰ আটাইতকৈ ডাঙৰ উৎস । হৃদযন্ত্ৰৰ সমস্যা দূৰ কৰিবলৈ অধিক প্ৰটিন আৰু আঁহৰ প্ৰয়োজন হয় আৰু দাইলত এই দুয়োটা প্ৰচুৰ পৰিমাণে থাকে । হৃদযন্ত্ৰৰ স্বাস্থ্যৰ বাবে উপকাৰী ।

চকলেট

শৰীৰত ৰক্ত সঞ্চালন সৃষ্টি কৰিবলৈ এন্টিঅক্সিডেন্টৰ প্ৰয়োজন । চকলেট বিশেষকৈ ডাৰ্ক চকলেটত এন্টিঅক্সিডেন্ট প্ৰচুৰ পৰিমাণে পোৱা যায় । ইয়াৰ ফলত ৰক্তচাপ নিয়ন্ত্ৰণত থাকে । যদি ৰক্তচাপ নিয়ন্ত্ৰণ কৰা হয় তেন্তে হৃদযন্ত্ৰৰ লগত জড়িত ৰোগৰ সম্ভাৱনা হ্ৰাস পাব পাৰে ।

এই খাদ্যসমূহ আপোনাৰ খাদ্য তালিকাত অন্তৰ্ভুক্ত কৰিলে হাৰ্ট এটেক আৰু হৃদৰোগ সম্পৰ্কীয় সমস্যাৰ সম্ভাৱনা হ্ৰাস পাব পাৰে । ইয়াৰ উপৰিও হৃদযন্ত্ৰৰ স্বাস্থ্য বজাই ৰাখিবলৈ নিয়মীয়া ব্যায়াম আৰু সঠিক জীৱনশৈলীও প্ৰয়োজনীয় ।