International Women’s Day: কিয় পালন কৰে আন্তৰ্জাতিক নাৰী দিৱস, ইয়াৰ মহত্ব আৰু ইতিহাসৰ বিষয়ে জানক
প্ৰতি বছৰে ৮ মাৰ্চত আন্তৰ্জাতিক নাৰী দিৱস পালন কৰা হয়। যিটো সদায় বিভিন্ন বিষয়বস্তুৰে উদযাপন কৰা হয়। আন্তঃৰাষ্ট্ৰীয় নাৰী দিৱস উদযাপন কেতিয়া আৰু কেনেকৈ আৰম্ভ হৈছিল, লগতে এইবাৰৰ বিষয়বস্তুৰ বিষয়েও এই লেখাটোত পাব।
প্ৰতি বছৰে ৮ মাৰ্চত আন্তৰ্জাতিক নাৰী দিৱস পালন কৰা হয়। আজিকালি ঘৰৰ কাম-কাজৰ উপৰিও মহিলাসকলেও বিভিন্ন ক্ষেত্ৰত নিজৰ দক্ষতা প্ৰদৰ্শন কৰে। এই দিনটো নাৰীসকলৰ সামাজিক, অৰ্থনৈতিক, সাংস্কৃতিক আৰু ৰাজনৈতিক কৃতিত্বক সন্মান জনোৱাৰ এক সুযোগ। এই দিৱসৰ উদ্দেশ্য হৈছে নাৰীৰ অধিকাৰ সন্দৰ্ভত সজাগতা বিয়পাই তেওঁলোকক সমতাৰ দিশত আগবাঢ়ি যাবলৈ অনুপ্ৰাণিত কৰা।
ইতিহাস
এই দিৱস উদযাপনৰ লগত নাৰী শ্ৰমিকৰ অধিকাৰ আদায়ৰ সংগ্ৰামৰ ইতিহাস জড়িত হৈ আছে। ১৮৫৭ চনত মজুৰিৰ ক্ষেত্ৰত দেখা পোৱা বৈষম্য, কামৰ সময় নিৰ্দিষ্ট কৰা, কৰ্মক্ষেত্ৰৰ অমানৱিক পৰিৱেশৰ বিৰুদ্ধে প্ৰতিবাদ জনাবলৈ মাৰ্কিন যুক্তৰাষ্ট্ৰৰ নিউয়ৰ্কৰ সূতা কাৰখানাৰ নাৰী শ্ৰমিকসকলে আন্দোলন কৰিছিল। সেই আন্দোলন চৰকাৰে কঠোৰ হাতেৰে দমন কৰিছিল। ১৯০৮ চনত নিউয়ৰ্কৰ সামাজিক গণতান্ত্ৰিক নাৰী সংগঠনে আয়োজিত কৰা নাৰী সমাবেশত জাৰ্মান সমাজতান্ত্ৰিক নেত্ৰী ক্লাৰা জেটকিনৰ নেতৃত্বত সৰ্বপ্ৰথম আন্তৰ্জাতিক নাৰী সন্মিলন অনুষ্ঠিত হৈছিল। ক্লাৰা এগৰাকী জাৰ্মান ৰাজনীতিবিদ; জাৰ্মান কমিউনিষ্ট পাৰ্টিৰ সদস্য। তাৰপিছত ১৯১০ চনত ডেনমাৰ্কৰ কপেনহেগেনত অনুষ্ঠিত হয় দ্বিতীয় আন্তজাৰ্তিক নাৰী সন্মিলন। ১৭ খন দেশৰ পৰা ১০০ গৰাকী নাৰী প্ৰতিনিধিয়ে ইয়াত অংশগ্ৰহণ কৰিছিল। এই সন্মিলনতে ক্লাৰায়ে প্ৰতি বছৰে ৮ মাৰ্চক আন্তৰ্জাতিক নাৰী দিৱস হিচাপে পালন কৰাৰ প্ৰস্তাৱ দিয়ে। তাৰ ফলশ্ৰুতিত ১৯১১ চনৰপৰা নাৰীসকলৰ সম-অধিকাৰ দিৱস হিচাপে এই দিনটো পালন কৰা হয়। এই দিৱস পালন কৰিবলৈ বিভিন্ন দেশৰ সমাজ তাত্ত্বিকসকল আগবাঢ়ি আহে। ১৯১৪ চনৰপৰা কেইবাখনো দেশত ৮ মাৰ্চ দিনটো পালন কৰিবলৈ আৰম্ভ কৰা হ’ল। ১৯৭৫ চনত ৮ মাৰ্চক আন্তৰ্জাতিক স্বীকৃতি প্ৰদান কৰা হয়। এই দিৱস পালন কৰিবলৈ বিভিন্ন ৰাষ্ট্ৰক ৰাষ্ট্ৰসংঘই আহ্বান জনায়। তাৰ পিছৰ পৰা গোটেই পৃথিৱীজুৰি এই দিন নাৰীৰ সম অধিকাৰ আদায়ৰ প্ৰত্যয় পুনৰ্ব্যক্ত কৰাৰ অভিপ্সা লৈ পালন কৰা হৈছে।
এইবাৰৰ থীম কি?
এইবাৰ আন্তৰ্জাতিক নাৰী দিৱসৰ বিষয়বস্তু হৈছে “সকলো মহিলা আৰু ছোৱালীৰ বাবে: অধিকাৰ, সমতা, সৱলীকৰণ।” এই বিষয়বস্তুৰ অৰ্থ হ’ল সন্মান, অধিকাৰ, ক্ষমতা আৰু সুযোগৰ জৰিয়তে সকলো নাৰীৰ ভৱিষ্যত উন্নত কৰা।
এই দিৱস উদযাপন কৰাৰ অৰ্থ কেৱল আমি নাৰীক শলাগ লোৱাই নহয়, আমি তেওঁলোকক শক্তিশালী কৰাৰ বাবেও কাম কৰিব লাগে। মহিলাসকলৰ সন্মান, সুযোগ, নিৰাপত্তা, শিক্ষা আৰু স্বাস্থ্যৰ অৱস্থা উন্নত কৰাৰ বাবে সকলোৱে মিলি কাম কৰিব লাগিব। আন্তঃৰাষ্ট্ৰীয় নাৰী দিৱসে এই দিশত ইতিবাচক পৰিৱৰ্তন আনিবলৈ অনুপ্ৰাণিত কৰে।
