09 Apr 2025 19:03 PM
কাইলৈ (১০ এপ্ৰিল) ঘোষণা হোৱাৰ সম্ভাৱনা চলিত বৰ্ষৰ মেট্ৰিকৰ ফলাফল। অনলাইনৰ জৰিয়তে ছাত্ৰ-ছাত্ৰীয়ে চাব পাৰিব এই ফলাফল। ASSEB ৰ শীৰ্ষ সূত্ৰই জনাইছে এই তথ্য।
ফলাফল ঘোষণাৰ বাবে সম্পূৰ্ণৰূপে সাজু ASSEB, অৱশ্যে ফলাফলৰ ক্ষেত্ৰত এতিয়ালৈকে অৱশ্যে আনুষ্ঠানিক ঘোষণা হোৱা নাই। সম্ভৱতঃ কিছু সময় পাছত শিক্ষামন্ত্ৰীয়ে ইয়াৰ বিষয়ে সবিশেষ জনাব।
চলিত শিক্ষাবৰ্ষত প্ৰায় ৪.৩০ লাখ পৰীক্ষাৰ্থী অৱতীৰ্ণ হৈছিল হাইস্কুল শিক্ষান্ত পৰীক্ষাত। প্ৰতিটো বিষয়ৰ পৰীক্ষাতে আছিল বস্তুনিষ্ঠ আৰু বাখ্যাত্মক প্ৰশ্নকাকত। এইবাৰ উভয় প্ৰশ্নকাকততে উত্তীৰ্ণ হ'ব লাগিব ছাত্ৰ-ছাত্ৰী।
যদি দুয়োটা পদ্ধতিৰ পৰীক্ষাৰ উত্তীৰ্ণ নহয়, তেন্তে প্ৰাৰ্থীক অনুত্তীৰ্ণ হিচাপে ধৰা হ'ব। ইয়াৰোপৰি এইবাৰ মেট্ৰিকত নাথাকে শীৰ্ষ স্থানৰ ব্যৱস্থা। যোৱা বৰ্ষৰ পৰা শীৰ্ষস্থান বিলুপ্ত কৰা হৈছে। যাৰ বাবে এইবাৰো এই ব্যৱস্থা নাথাকে।
উল্লেখ্য যে, শিক্ষা বোৰ্ডৰ ইতিমধ্যে সকলো প্ৰস্তুতি সম্পূৰ্ণ হৈছে। সম্ভৱতঃ দিছপুৰৰ সেউজ সংকেত লাভ কৰাৰ পাছতে ইয়াৰ ক্ষেত্ৰত সিদ্ধান্ত চূড়ান্ত হ'ব। গতিকে কিছু সময়ৰ পাছতে পৰীক্ষাৰ ফলাফলৰ সময় স্পষ্ট হৈ পৰিব।
