২০ নৱেম্বৰত মহাৰাষ্ট্ৰ বিধানসভাৰ নিৰ্বাচন ৷ মঙলবাৰে গুৱাহাটীত উপস্থিত হৈ আজি কামাখ্যা দেৱালয়ত আশিস ল'লে মহাৰাষ্ট্ৰৰ মুখ্যমন্ত্ৰী একনাথ সিন্ধেই।
মঙলবাৰে নিশা এদিনৰ বাবে গুৱাহাটীত উপস্থিত হৈছিল মহাৰাষ্ট্ৰৰ মুখ্যমন্ত্ৰীগৰাকী । নিশা গুৱাহাটীৰ ৰেডিশ্যন ব্লু হোটেলত কটাই পুৱাই কামাখ্যা মন্দিৰ দৰ্শন কৰাৰ বাবে নীলাচল পাহাৰত উপস্থিত হয়।
সাংবাদিকৰ আগত সমাগত মহাৰাষ্ট্ৰ বিধানসভা নিৰ্বাচনত ভাল ফলাফল প্ৰদৰ্শন কৰিব বুলি মতামত ব্যক্ত কৰে মুখ্যমন্ত্ৰী একনাথ সিন্ধেই ৷ মা কামাখ্যাৰ আৰ্শীবাদত নিৰ্বাচনত জয়ী হৈ পুনৰ শাসনত আহিব বুলিও মন্তব্য কৰে জ্যেষ্ঠ ৰাজনীতিবিদজনে ৷
সিন্দেই কয় - “কামাখ্যা মাৰ দৰ্শন কৰি মই সুখী আনন্দিত ৷ যোৱাবাৰ চৰকাৰ গঠনৰ পূৰ্বে আৰু তাৰ পিছতো কামাখ্যা দৰ্শন কৰিবলৈ আহিছিলো ৷ এইবাৰে কামাখ্যা মাৰ আশীৰ্বাদ লৈ ইয়াৰ পৰা যাম ৷ এই পৰাই আমাৰ কামৰ সূচনা হ’ব ৷”
ইতিমধ্যে অসমৰ পৰা ৰাওনা হৈছে একনাথ সিন্ধে। গৃহাভিমুখী যাত্ৰাৰ প্ৰাকক্ষণত গুৱাহাটী বিমান বন্দৰত মহাৰাষ্ট্ৰৰ মুখ্যমন্ত্ৰীগৰাকীক বিদায় জনাই মন্ত্ৰী অশোক সিংঘালে।