Ram Navami Worship: দেশৰ এইসমূহ মন্দিৰত প্ৰতিদিনেই দেখা যায় ৰামভক্তৰ ভিৰঃ আপুনিও কৰিব পাৰে পৰিকল্পনা

ৰামভক্তৰ তীৰ্থস্থান

হিন্দু ধৰ্মত ভগৱান শ্ৰী বিষ্ণুৰ সপ্তম অৱতাৰ হিচাপে গণ্য কৰা হয় ভগৱান ৰামচন্দ্ৰক। ভক্তসকলে আৰাধ্য ভগৱান ৰামৰ আশীৰ্বাদ লাভেৰে মনোকামনা পূৰণৰ বাবে তেওঁৰ চৰণত প্ৰাৰ্থনা আগবঢ়ায়। ৰাম নৱমী উপলক্ষে এতিয়া ৰামভক্তসকলৰ মাজত ভগৱান ৰামৰ প্ৰতি ভক্তিভাৱ স্বাভাৱিকতেই অধিক জাগ্ৰত হ’ব। প্ৰচলিত আখ্যান অনুসৰি ভগৱান ৰামচন্দ্ৰই নিৰ্বাসনৰ সময়ত যিসমূহ স্থানলৈ গৈছিল, সেই স্থানসমূহ কালক্ৰমত তীৰ্থস্থানত পৰিণত হৈছিল। ভগৱান ৰামৰ প্ৰতি ভক্তৰ বিশ্বাসৰ লগত জড়িত এনে পবিত্ৰ তীৰ্থস্থানৰ বিষয়ে জানো আহক।

১) শ্ৰী ৰাম জন্মভূমি, অযোধ্যাঃ উত্তৰ প্ৰদেশৰ অযোধ্যা চহৰত অৱস্থিত এই পবিত্ৰ স্থানক ভগৱান ৰামৰ জন্মস্থান হিচাপে জনা যায়। হিন্দু বিশ্বাস অনুসৰি ত্ৰেতা যুগৰ সময়ত ভগৱান শ্ৰীৰামৰ আবিৰ্ভাৱ হোৱা ঠাইখনেই এইখন। প্ৰতিদিনে দেশৰ লগতে বিদেশৰ পৰাও ৰামলালা দৰ্শনৰ বাবে হাজাৰ হাজাৰ তীৰ্থযাত্ৰী উপস্থিত হয় এই স্থানত সমবেত হয়।

২) কনক ভৱন, অযোধ্যাঃ ভগৱান ৰামৰ জন্মস্থান অযোধ্যাৰ ৰাম জন্মভূমিৰ দৰে কনক ভৱনৰ মন্দিৰো তেওঁৰ ভক্তসকলৰ বাবে বিশ্বাসৰ এক অনন্য স্থান। ভক্তৰ বিশ্বাস অনুসৰি, ৰাম আৰু সীতাৰ বিবাহৰ সময়ত মাতৃ কৈকেয়ীয়ে এই ভৱনটো দেৱী সীতাক উপহাৰ হিচাপে দিছিল। কনক ভৱনত ভগৱান ৰাম, সীতা আৰু লক্ষ্মণৰ অতি সুন্দৰ প্ৰতিমূৰ্তি আছে।

৩) ৰাজা ৰাম মন্দিৰ, অৰ্ছাঃ মধ্যপ্ৰদেশৰ অৰ্ছাত অৱস্থিত ভগৱান ৰাম মন্দিৰ ৰামভক্তসকলৰ বাবে আস্থাৰ এক অনন্য তীৰ্থস্থান। বিশ্বাস অনুসৰি, ভগৱান ৰাম প্ৰতি নিশা ইয়ালৈ জিৰণিৰ বাবে আহে আৰু পুৱা হনুমানে তেওঁক পুনৰ অযোধ্যালৈ লৈ যায়।

৪) কলাৰাম মন্দিৰ, নাচিকঃ মহাৰাষ্ট্ৰৰ নাচিক জিলাত অৱস্থিত ভগৱান ৰামৰ মন্দিৰ ৰামভক্তসকলৰ বাবে আন এক পবিত্ৰ স্থান। এই মন্দিৰত প্ৰায় ২ ফুট উচ্চতাৰ ক’লা শিলেৰে নিৰ্মিত ভগৱান ৰামৰ প্ৰতিমূৰ্তি স্থাপন কৰা হৈছে। ১৪ বছৰীয়া নিৰ্বাসনৰ সময়ছোৱাত ভগৱান ৰামে পত্নী দেৱী সীতা আৰু ভাতৃ লক্ষ্মণৰ সৈতে ইয়াত কিছুদিন থাকিছিল বুলি বিশ্বাস কৰা হয়।

৫) ৰামাস্বামী মন্দিৰ, তামিলনাডুঃ ৰামাস্বামী মন্দিৰক দক্ষিণৰ অযোধ্যা বুলি কোৱা হয়। এই মন্দিৰক দেশৰ একমাত্ৰ মন্দিৰ বুলি বিশ্বাস কৰা হয়, য’ত ভগৱান ৰাম আৰু মাতা সীতাৰ লগতে ৰামৰ চাৰি ভাতৃ লক্ষ্মণ, ভাৰত আৰু শত্ৰুঘনৰো মূৰ্তি আছে। এই মন্দিৰ চৌহদত আৰু বহুতো সৰু সৰু মন্দিৰ আছে।

৬) ৰঘুনাথ মন্দিৰ, জম্মুঃ জম্মু জিলাত অৱস্থিত এই মন্দিৰত কেৱল ভগৱান ৰামৰ মূৰ্তিয়েই নহয় ভগৱান বিষ্ণুৰ অন্যান্য অৱতাৰৰ মূৰ্তিও দেখা যায়। ৰঘুনাথ মন্দিৰ সাতটা ভিন্ন মন্দিৰেৰে গঠিত। বিশ্বাস কৰা হয় যে এই মন্দিৰ ভ্ৰমণৰ পিছত ৰামভক্তসকলে ৩৩ কোটি দেৱ-দেৱীৰ আশীৰ্বাদ লাভ কৰে।

৭) কৰ্ণাটকৰ কোডান্দৰামা মন্দিৰঃ দক্ষিণ ভাৰতৰ কৰ্ণাটক ৰাজ্যৰ চিকমাগালুৰ জিলাত অৱস্থিত কোডান্দৰাম মন্দিৰো ৰামভক্তসকলৰ বাবে এক অন্যতম প্ৰধান তীৰ্থস্থান। এই মন্দিৰৰ বিশেষত্ব হৈছে মাতা সীতা ভগৱান ৰাম আৰু লক্ষ্মণৰ সোঁফালে থিয় হৈ আছে।

৮) চিত্ৰকূট, উত্তৰ প্ৰদেশঃ উত্তৰ প্ৰদেশ আৰু মধ্যপ্ৰদেশৰ সীমান্তত অৱস্থিত এই স্থানত ভগৱান ৰামে সীতা আৰু লক্ষ্মণৰ সৈতে নিৰ্বাসনৰ সময় কটাইছিল। সেয়ে প্ৰতিগৰাকী ৰামভক্তই চিত্ৰকূটকো অন্যতম প্ৰধান তীৰ্থস্থান হিচাপে গণ্য কৰে।

৯) শ্ৰী ৰাম তীৰ্থ মন্দিৰ, অমৃতসৰঃ পঞ্জাৱৰ অমৃতসৰ কেৱল স্বৰ্ণ মন্দিৰৰ বাবেই নহয়, ভগৱান ৰাম মন্দিৰৰ বাবেও পৰিচিত। এই মন্দিৰটো ৰামায়ণ যুগৰ সৈতে জড়িত আৰু বিশ্বাস কৰা হয় যে যেতিয়া ভগৱান ৰামে লংকাৰ পৰা উভতি আহি সীতাক পৰিত্যাগ কৰিছিল তেতিয়া সীতাই এই ঠাইতে মহৰ্ষী বাল্মিকীৰ আশ্ৰমত আশ্ৰয় লৈছিল। এই ঠাইতে মাতৃ সীতাই লুভ আৰু কুশৰ জন্ম দিছিল বুলি কোৱা হয়।

১০) ত্ৰিপ্ৰায়ৰ শ্ৰীৰাম মন্দিৰ, কেৰেলাঃ কেৰেলাৰ থ্ৰিছুৰ চহৰত অৱস্থিত এই মন্দিৰ ৰামভক্তৰ মাজত অত্যন্ত বিখ্যাত। এই মন্দিৰত পূজা কৰিলে অপশক্তিৰ পৰা ৰক্ষা পোৱা যায় বুলি লোকবিশ্বাস প্ৰচলিত। মন্দিৰত স্থাপন কৰা ভগৱান ৰামৰ মূৰ্তি্ৰ আগত স্বয়ং ভগৱান শ্ৰীকৃষ্ণই পূজা কৰে বুলিও এক লোকবিশ্বাস প্ৰচলিত হৈ আহিছে।