CSK vs DC Live Score, IPL 2025: জয়ৰ ধাৰা অব্যাহত ‘বাপু’ৰ দিল্লীৰঃ মন্থৰ বেটিঙেৰে ঘৰৰ মাটিত পুনৰ মুখ থেকেচা চেন্নাইৰ
Chennai Super Kings vs Delhi Capitals Live Score in Assamese: ক্ৰমাগত তৃতীয় পৰাজয়ৰ সন্মুখীন হৈছে চেন্নাই চুপাৰ কিংছ। ঘৰৰ মাটিতে আজি দিল্লী কেপিটেলছৰ বিপক্ষে ২৫ ৰানত পৰাজয় সহিবলগা হৈছে চেন্নায়ে। আনহাতে আজিৰ জয়েৰে অপৰাজেয় ধাৰা অব্যাহত ৰাখি পইণ্ট তালিকাৰ প্ৰথম স্থানলৈ উন্নীত হৈছে দিল্লী কেপিটেলছ।
ঘৰুৱা ভূমি চেপ’কত আজি দিল্লী কেপিটেলছৰ সন্মুখীন হ’ব চেন্নাই চুপাৰ কিংছ। মুম্বাইৰ বিপক্ষে জয়েৰে ছিজনৰ আৰম্ভণি ঘটালেও পৰৱৰ্তী দুখন মেচত ধাৰাবাহিকভাৱে পৰাজয়ৰ সন্মুখীন হৈ চাপত পৰিছে আই পি এল ইতিহাসৰে শ্ৰেষ্ঠতম দলটো। এই চাপৰ পৰা মুক্ত হৈ গৃহ চহৰত আজি জয়ৰ পথলৈ ঘূৰিবলৈ চেন্নায়ে চলাব পূৰ্ণ প্ৰচেষ্টা। অৱশ্যে দুৰন্ত প্ৰদৰ্শনেৰে প্ৰথম দুয়োখন মেচতে জয়েৰে পইণ্ট তালিকাৰ দ্বিতীয় স্থানত থকা দিল্লীৰ বিপক্ষে চেন্নাইৰ এই প্ৰচেষ্টা সহজো নহ’ব। ফলাফল যিয়েই নহওক কিয়, ক্ৰিকেট অনুৰাগীয়ে আজি দুয়োটা দলৰ মাজত এক ৰোমাঞ্চকৰ যুঁজৰ আশা কৰিছে।
LIVE NEWS & UPDATES
-
ক্ৰমাগত তৃতীয় পৰাজয় চেন্নাইৰ
ক্ৰমাগত তৃতীয় পৰাজয়ৰ সন্মুখীন হৈছে চেন্নাই চুপাৰ কিংছ। ঘৰৰ মাটিতে আজি দিল্লী কেপিটেলছে ২৫ ৰানত পৰাস্ত কৰিছে চেন্নাক। আনহাতে আজিৰ জয়েৰে অপৰাজেয় ধাৰা অব্যাহত ৰাখি পইণ্ট তালিকাৰ প্ৰথম স্থানলৈ উন্নীত হৈছে দিল্লী কেপিটেলছ।
-
ক্ৰীজত ধোনী আৰু বিজয় শংকৰ
২ অভাৰত জয়ৰ বাবে ৫৪ ৰাণ লাগে চেন্নাইক । ক্ৰীজত ধোনী আৰু বিজয় শংকৰ ।
-
অৱশেষত আহিল বাউণ্ডেৰী
এতিয়াও জয়ৰ বাবে প্ৰতি অভাৰত ১৪ ৰানতকৈও অধিক ৰানৰ প্ৰয়োজন চেন্নাইৰ। তাৰ পিছতো বাউণ্ডেৰী কোবোৱাত বিফল হৈছিল চেন্নাইৰ বেটাৰ। অৱশেষত ২৮টা বলৰ পিছত বিজয় শংকৰৰ বেটৰ পৰা আহিছে এটা বাউণ্ডেৰী।
-
জাদেজাক বিদায় দিলে কুলদীপে
মাত্ৰ ৭৪ ৰানতে পঞ্চমটো উইকেট হেৰুৱাইছে ঘৰুৱা দল চেন্নাই চুপাৰ কিংছে। কুলদীপ যাদৱে নিজ স্পেলৰ দ্বিতীয়টো অভাৰত বিদায় দিছে জাদেজাক। এই উইকেট পতনৰ পিছতে ক্ৰীজলৈ আহিছে মহেন্দ্ৰ সিং ধোনী।
-
ডুবেও পেভিলিয়নলৈ
ইম্পেক্ট চাবৰ ৰূপত ক্ৰীজলৈ অহা শিৱম ডুবেয়ো দীঘলীয়া ইনিংছ খেলাত ব্যৰ্থ হৈছে। যুৱ স্পিনাৰ বিপৰাজ নিগমৰ বলত ষ্টাবচৰ হাতত কেচ দি ব্যক্তিগত ১৮ ৰান কৰি ডুবেই বিদায় লয়।
-
কনৱে’ৰো বিদায়
আই পি এল ২০২৫ ছিজনৰ প্ৰথমখন মেচ খেলা ডেভন কনৱে’ৰ ওপৰত অনুৰাগীয়ে যথেষ্ট আশা প্ৰকাশ কৰিছিল যদিও ব্যৰ্থ হৈছে খেলুৱৈগৰাকী। মাত্ৰ ১৩ ৰান সংগ্ৰহ কৰি বিপৰাজ নিগমৰ বলত অক্ষৰ পেটেলৰ হাতত কেচ তুলি বিদায় লয় কনৱে’ই।
-
গায়কোৱাডক বিদায় দিলে ষ্টাৰ্কে
ইনিংছৰ দ্বিতীয় অভাৰত মুকেশ কুমাৰে ৰচিন ৰবীন্দ্ৰক বিদায় দিয়াৰ পিছত তৃতীয় অভাৰত ষ্টাৰ্কৰ চিকাৰ হৈছে অধিনায়ক ৰুতুৰাজ গায়কোৱাড। এইদৰে মাত্ৰ ২০ ৰানতে দুটা উইকেট হেৰুৱাই বিপদত পৰিছে চেন্নাই।
-
চেন্নাইৰ সমুখত ১৮৪ ৰানৰ লক্ষ্য
ইনিংছৰ অন্তিম অভাৰত পাথিৰানাই কৰা মিতব্যয়ী বলিঙৰ ফলত স্ক’ৰ ২০০ ৰানৰ কাষ চপোৱাত বিফল হয় দিল্লী। দলটোৱে ৬ উইকেটত ১৮৩ ৰান সংগ্ৰহ কৰি ঘৰুৱা দলৰ সমুখত ১৮৪ ৰানৰ লক্ষ্য বান্ধি দিছে।
-
ৰাহুলে ল’লে বিদায়
৫১ টা বলত ৭৭ ৰানৰ এক দৰ্শনীয় ইনিংছ খেলি বিদায় লৈছে কে এল ৰাহুলে। ইনিংছৰ অন্তিম অভাৰত ৰাহুলক পেভিলিয়নৰ পথ দেখুৱায় পাথিৰানাই।
-
খলীলৰ আন এক সফলতা
পুনৰ এবাৰ বলিং কৰিবলৈ আহি দিল্লীৰ ইনিংছত আঘাত হানিছে খলীল আহমেদে। নিজৰ অন্তিম অভাৰৰ প্ৰথমটো বলতে খলীলে ২০ ৰান সংগ্ৰহেৰে ক্ৰীজত লাহে লাহে খোপনি পোৱা ৰিজভিক পেভিলিয়নৰ পথ দেখুৱায়।
-
ৰাহুলৰ অৰ্ধশতক
ছিজনত অপেনাৰ হিচাপে নিজৰ প্ৰথমখন মেচতে অৰ্ধশতক অৰ্জন কৰিছে কে এল ৰাহুলে। ধৈৰ্যশীল বেটিঙেৰে ইনিংছ আগুৱাই নিয়া ৰাহুলে ৩৩টা বলত সম্পূৰ্ণ কৰিছে অৰ্ধশতক।
-
অধিনায়ক অক্ষৰৰ বিদায়
বৰ্তমানলৈকে ছিজনৰ পাৰ্পল কেপৰ অধিকাৰী হৈ থকা নুৰ আহমেদৰ হাতলৈ আহিছে প্ৰথমটো সফলতা। নুৰৰ বলত আউট হৈ ক্ৰীজ এৰিছে দিল্লীৰ অধিনায়ক অক্ষৰ পেটেলে। অক্ষৰৰ বেটৰ পৰা আহে ১৪ বলত ২১ ৰান।
-
জাদেজাই বিদায় দিলে প’ৰেলক
নিজ স্পেলৰ প্ৰথম অভাৰতে সফলতা লাভ কৰিছে ৰবীন্দ্ৰ জাদেজাই। অভাৰৰ পঞ্চমটো বলত পাথিৰাণাৰা হাতত এক সহজ কেচ তুলি অভিষেক প’ৰেলে ক্ৰীজ এৰে।
-
পাৱাৰ প্লে’ত দিল্লীৰ সংগ্ৰহ ৰান
দিল্লীৰ ইনিংছৰ প্ৰথম পাৱাৰ প্লে’ অৰ্থাৎ ছয় অভাৰ অন্ত পৰিছে। এই ছয় অভাৰত দিল্লী কেপিটেলছে এটা উইকেট হেৰুৱাই ৫১ ৰান সংগ্ৰহ কৰিছে।
-
মুকেশৰ খৰচী অভাৰ
ইনিংছৰ দ্বিতীয় অভাৰত দিল্লীৰ ইনিংছত যোগ হৈছে ১৯ ৰান। মুকেশ কুমাৰৰ অভাৰটোত অভিষেক প’ৰেলে কোবায় ৩টা চাৰি আৰু এটা ছয়। এইদৰে ছিজনত নিজৰ প্ৰথমটো অভাৰতে খৰচী বিবেচিত হৈছে মুকেশ চৌধুৰী।
-
খলীলৰ দখলত প্ৰথমটো উইকেট
আই পি এল ২০২৫ত অব্যাহত আছে খলীল আহমেদৰ চমক। আজিও নিজৰ তথা ইনিংছৰ প্ৰথমটো অভাৰতে খলীলে মেকগুৰ্কক বিদায় দিছে। কোনো ৰান সংগ্ৰহ নকৰাকৈয়ে পেভিলিয়নলৈ উভতে মেকগুৰ্ক।
-
ক্ৰীজত মেকগুৰ্ক-ৰাহুল
দিল্লীৰ হৈ আজি ইনিংছ মুকলি কৰিবলৈ মেকগুৰ্কৰ সৈতে ক্ৰীজলৈ আহিছে কে এল ৰাহুল। আনহাতে চেন্নাইৰ হৈ বলিং আৰম্ভ কৰিছে খলীল আহমেদে।
-
চেপ’কত দিল্লীৰ ব্যৰ্থতা
চেপ’ক ষ্টেডিয়ামত চেন্নাই চুপাৰ কিংছ আৰু দিল্লী কেপিটেলছে শেহতীয়া সময়ছোৱাত খেলা সাতখন মেচৰ প্ৰতিখনতে জয়লাভ কৰিছে ঘৰুৱা দল চেন্নায়ে। আজি দিল্লীয়ে চেপ’কৰ এই ব্যৰ্থতাৰ অৱসান ঘটাব পাৰিবনে, সেয়া হ’ব লক্ষণীয়।
-
চেন্নাই চুপাৰ কিংছৰ মূল একাদশ আৰু ইম্পেক্ট চাব
চেন্নাইৰ মূল একাদশত আজি থাকিব ৰচিন ৰবীন্দ্ৰ, ডেভন কনৱে’, ৰুতুৰাজ গায়কোৱাড (অধিনায়ক), বিজয় শংকৰ, ৰবীন্দ্ৰ জাদেজা, এম এছ ধোনী, ৰবিচন্দ্ৰন অশ্বিন, নুৰ আহমেদ, মুকেশ চৌধুৰী, খলিল আহমেদ, মথিশা পাথিৰানাক। অৰ্থাৎ আজি ৰাহুল ত্ৰিপাঠী আৰু অভাৰট’নৰ স্থানত দললৈ আহিছে কনৱে’ আৰু মুকেশ। আনহাতে ইম্পেক্ট চাব হিচাপে থাকিব শিৱম ডুবে, জেমি অভাৰট’ন, ছাইক ৰছিদ, কমলেশ নগৰকট্টি, নাথান এলিছ।
-
দিল্লী কেপিটেলছৰ মূল একাদশ আৰু ইম্পেক্ট চাব
দিল্লী কেপিটেলছৰ মূল একাদশত দেখা যাব জেক ফ্ৰেজাৰ-মেকগুৰ্ক, কে এল ৰাহুল, অভিষেক প’ৰেল, ট্ৰিষ্টান ষ্টাবচ, সমীৰ ৰিজভি, অক্ষৰ পেটেল (অধিনায়ক), আশুতোষ শৰ্মা, বিপৰাজ নিগম, মিচেল ষ্টাৰ্ক, কুলদীপ যাদৱ, মোহিত শৰ্মাক। আনহাতে ইম্পেক্ট চাব হিচাপে থাকিব মুকেশ কুমাৰ, কৰুণ নায়াৰ, দৰ্শন নলকান্দে, ডোনোভান ফেৰেৰা, ত্ৰিপুৰানা বিজয়।
-
টছত জয়ী হৈ অক্ষৰৰ বেটিঙৰ সিদ্ধান্ত
ইতিমধ্যে দুয়ো দলৰ অধিনায়কদ্বয়ৰ মাজত টছ হৈ গৈছে। টছত জয়ী হৈ দিল্লী কেপিটেলছৰ অধিনায়ক অক্ষৰ পেটেলে প্ৰথমে বেটিং কৰাৰ সিদ্ধান্ত গ্ৰহণ কৰিছে। আঘাতৰ বাবে চেন্নাইৰ অধিনায়ক গায়কোৱাডৰ উপস্থিতিক লৈ কিছু চৰ্চা চলিছিল যদিও তেওঁ টছ কৰিবলৈ আগবাঢ়ি অহাৰ পিছত এই চৰ্চা ভিত্তিহীন হৈ পৰে।
Published On - Apr 05,2025 3:03 PM
