CSK vs DC Predicted Playing XI IPL 2025: নেতৃত্বলৈ উভতিব নেকি ধোনী! অক্ষৰৰ সমুখতো কঠিন প্ৰত্যাহ্বানঃ চাওক সম্ভাৱ্য একাদশ
Chennai Super Kings vs Delhi Capitals Preview: চেন্নাইত আজি মুখামুখি হ’ব চেন্নাই চুপাৰ কিংছ আৰু দিল্লী কেপিটেলছ। অক্ষৰ পেটেলৰ নেতৃত্বত দিল্লীয়ে এতিয়ালৈকে খেলা দুয়োখন মেচতে দলটোৱে জয়লাভ কৰি পইণ্ট তালিকাৰ দ্বিতীয় স্থানত আছে। আনহাতে তিনিখন মেচৰ মাত্ৰ এখনত জয়েৰে সম্প্ৰতি অষ্টম স্থানত আছে চেন্নাই।

আগবাঢ়িছে আই পি এল ২০২৫। নিত্য নতুন অভিলেখৰ সমাহাৰ আৰু যুৱ খেলুৱৈৰ উত্থানৰ মাজত অনুৰাগীয়ে উপভোগ কৰিছে আই পি এলৰ ৰোমাঞ্চ। আজি প্ৰতিযোগিতাখনত দুখন মেচ অনুষ্ঠিত হ’ব। প্ৰথমখন মেচত প্ৰতিদ্বন্দিতা আগবঢ়াব চেন্নাই চুপাৰ কিংছ আৰু দিল্লী কেপিটেলছে। চেন্নাইত বিয়লি ৩.৩০ বজাৰ পৰা এই মেচখন অনুষ্ঠিত হ’ব। অক্ষৰ পেটেলৰ নেতৃত্বত দিল্লীয়ে এই ছিজনত বৰ্তমানলৈকে চমকপ্ৰদ প্ৰদৰ্শন আগবঢ়াইছে। এতিয়ালৈকে খেলা দুয়োখন মেচতে দলটোৱে জয়লাভ কৰি পইণ্ট তালিকাৰ দ্বিতীয় স্থানত আছে।
প্ৰথম মেচত অনুপস্থিত কে এল ৰাহুলেও দ্বিতীয় মেচৰ পূৰ্বে দলত যোগদান কৰিছে আৰু মেচখনত ৰাহুলে আক্ৰমণাত্মক বেটিঙৰ উমান দিছিলে। অধিনায়ক হিচাপে অক্ষৰ পেটেলেও দৃষ্টি আকৰ্ষণ কৰিছে। ইফালে অভিজ্ঞ পেচাৰ মিচেল ষ্টাৰ্কে দলক দিছে প্ৰত্যাশিত প্ৰদৰ্শন। ইতিপূৰ্বে দুয়োখন মেচ ঘৰুৱা খেলপথাৰত খেলাৰ পিছত দিল্লী কেপিটেলছে আজি ছিজনৰ প্ৰথমখন এৱে মেচ খেলিব।
ঘৰৰ মাটিত চেন্নাই চুপাৰ কিংছক পৰাস্ত কৰাতো দিল্লীৰ বাবে যথেষ্ট প্ৰত্যাহ্বানপূৰ্ণ হ’ব। ইফালে জয়েৰে ছিজনৰ আৰম্ভণি ঘটালেও পৰৱৰ্তী দুয়োখন মেচত পৰাস্ত হৈছে চেন্নাই চুপাৰ কিংছ। সম্প্ৰতি পইণ্ট তালিকাৰ অষ্টম স্থানত থকা চেন্নাই আজিৰ মেচৰ পূৰ্বে আন এক সমস্যাতো পৰিছে। আঘাতপ্ৰাপ্ত হৈছে দলৰ অধিনায়ক ৰুতুৰাজ গায়কোৱাড। আজিৰ মেচত গায়কোৱাডে খেলিব পাৰিব নে নোৱাৰে, দলে এতিয়ালৈকে প্ৰকাশ কৰা নাই।
এনে পৰিস্থিতিত মহেন্দ্ৰ সিং ধোনীক পুনৰ এবাৰ চেন্নাইৰ অধিনায়ক হিচাপে দেখা যাব পাৰে বুলিও চৰ্চা চলা পৰিলক্ষিত হৈছে। দলৰ অপেনিং যুটিয়ে প্ৰথম কেইখন মেচত এক প্ৰত্যাশিত আৰম্ভণি দিয়াত ব্যৰ্থ হোৱা পৰিলক্ষিত হৈছে। তথাপি আজি পুনৰ ৰচিন-ত্ৰিপাঠীৰ যুটিকে দলৰ ইনিংছ মুকলিৰ দায়িত্ব দিয়াৰ সম্ভাৱনা আছে। আনহাতে দিল্লীৰ মূল একাদশত আজি টি নটৰাজনে প্ৰথমবাৰৰ বাবে স্থান পাব পাৰে বুলি ধাৰণা কৰা হৈছে।
চেন্নাই চুপাৰ কিংছৰ সম্ভাৱ্য একাদশ আৰু ইম্পেক্ট চাবঃ ৰচিন ৰবীন্দ্ৰ, ৰাহুল ত্ৰিপাঠী, ৰুতুৰাজ গায়কোৱাড, শিৱম ডুবে, চেম কুৰাণ, বিজয় শংকৰ, ৰবীন্দ্ৰ জাদেজা, এম এছ ধোনী, নূৰ আহমদ, মথিছা পাথিৰানা, খলিল আহমেদ।
দিল্লী কেপিটেলছৰ সম্ভাৱ্য একাদশ আৰু ইম্পেক্ট চাবঃ জেক ফ্ৰেজাৰ-মেকগুৰ্ক, ফাফ ডু প্লেচিছ, অভিষেক প’ৰেল, কে এল ৰাহুল, অক্ষৰ পেটেল, ট্ৰিষ্টান ষ্টবছ, আশুতোষ শৰ্মা, বিপৰাজ নিগম, মিচেল ষ্টাৰ্ক, কুলদীপ যাদৱ, মোহিত শৰ্মা, মুকেশ কুমাৰ।