বিশ্ব ক্ৰিকেটত পুনৰ আফগানিস্তানৰ বিস্ময়কৰ প্ৰদৰ্শন! চেম্পিয়নছ ট্ৰফীৰ পৰা বাহিৰ কৰিলে ইংলেণ্ডক

২০২৫ চনৰ চেম্পিয়নছ ট্ৰফীত এতিয়ালৈকে হোৱা আটাইতকৈ ৰোমাঞ্চকৰ মেচখনত ইংলেণ্ডক পৰাস্ত কৰি প্ৰতিযোগিতাখনৰ পৰা বাহিৰ কৰিলে আফগানিস্তানে । ইব্ৰাহিম জাদ্ৰানৰ (১৭৭) উজ্জ্বল শতক আৰু আজমতুল্লাহ ওমৰজাইৰ (৪১ ৰান আৰু ৫ উইকেট) অল ৰাউণ্ড  প্ৰদৰ্শনৰ ভিত্তিত আফগানিস্তানে শেষ অভাৰলৈকে চলি থকা মেচখনত প্ৰাক্তন বিশ্ব চেম্পিয়ন দলটোক মাত্ৰ ৮ ৰানৰ ব্যৱধানত পৰাস্ত কৰে। এই জয়েৰে ছেমি ফাইনেলত প্ৰৱেশৰ আশা অব্যাহত  ৰাখিছে আফগানিস্তানে। ইয়াৰ লগে লগে আকৌ এবাৰ ছিন্নভিন্ন হৈ পৰিল ইংলেণ্ডৰ চেম্পিয়নছ ট্ৰফী জয়ৰ সপোন। প্ৰথমখন মেচতে অষ্ট্ৰেলিয়াৰ হাতত পৰাস্ত হৈছিল ইংলেণ্ড। একেৰাহে ২ খন মেচত পৰাজয়ৰ সৈতে ছেমি ফাইনেলৰ দৌৰৰ পৰা বাহিৰ হ’ল জোছ বাটলাৰৰ দলটো। লগতে বিশ্বকাপ ২০২৩ৰ পিছত  দ্বিতীয়বাৰৰ বাবে পুনৰ ইংলেণ্ডক পৰাস্ত কৰিছে আফগানিস্তানে ।

লাহোৰৰ গাদ্দাফি ষ্টেডিয়ামত খেলা মেচখনত দুয়োটা দলৰ আৰম্ভণিৰ প্ৰদৰ্শন বেয়া হৈছিল যদিও পিছলৈ দুজন বেটছমেনৰ শতকৰে পুনৰ ফৰ্মলৈ উভতি আহিছিল। প্ৰথমে আফগানিস্তানৰ হৈ এই কাম কৰিছিল  যুৱ অ’পেনাৰ ইব্ৰাহিম জাদ্ৰানে। চেম্পিয়নছ ট্ৰফীত আফগানিস্তানৰ হৈ প্ৰথম শতক অৰ্জন কৰাৰ পিছত জাড্ৰানে এই প্ৰতিযোগিতাৰ ইতিহাসৰ সৰ্ববৃহৎ ইনিংছ খেলি ১৭৭ ৰান সংগ্ৰহ কৰে। ইয়াৰ প্ৰতিক্ৰিয়া স্বৰূপে প্ৰখ্যাত বেটছমেন জ’ ৰুটে ইংলেণ্ডৰ হৈ অগ্ৰগতি লাভ কৰে আৰু প্ৰায় ৬ বছৰ দীঘলীয়া অপেক্ষাৰ অন্তত এদিনীয়া ক্ৰিকেটত শতক অৰ্জন কৰি দলৰ পুনৰ প্ৰত্যাৱৰ্তন কৰে। কিন্তু শেষত আফগানিস্তানেই মেচখনত জয়লাভ কৰিছিল।

আফগানিস্তানৰ আৰম্ভণি বেয়া আছিল আৰু দলটোৱে ৯ অভাৰৰ ভিতৰত ৩টা উইকেট হেৰুৱাইছিল। এই তিনিটা উইকেট দখল কৰি তাৰকা বেগী বলাৰ জফ্ৰা আৰ্চাৰে আফগানিস্তানক বিপদত পেলাইছিল। কিন্তু ইয়াৰ পৰাই ইংলেণ্ডৰ বলিঙৰ  অৱস্থাৰ অৱনতি ঘটিছিল, যি অৱস্থা অষ্ট্ৰেলিয়াৰ বিৰুদ্ধে হৈছিল। অধিনায়ক হাছমাতুল্লাহ শ্বাহিদী (৪০) আৰু আজমাতুল্লাহ ওমৰজাই (৪১)ৰ সৈতে ইব্ৰাহিম জাদ্ৰানে দলটোক ২০০ ৰানৰ বাহিৰলৈ লৈ যায়। ।য’ত জাদ্ৰানে নিজৰ এদিনীয়া কেৰিয়াৰৰ ষষ্ঠ শতক সম্পূৰ্ণ কৰিছিল আৰু তাৰ পিছত মহম্মদ নবী (৪০)ৰ সৈতে মাত্ৰ ৫৫টা বলত ১১১ ৰানৰ বিস্ফোৰক অংশীদাৰিত্ব গঢ়ি দলটোক ৩২৫ ৰানৰ ডাঙৰ স্ক’ৰলৈ লৈ গৈছিল।

প্ৰত্যুত্তৰত ইংলেণ্ডৰো আৰম্ভণি বেয়া আছিল আৰু ৩০ ৰানত ২ উইকেট হেৰুৱাইছিল। ইয়াৰ পৰাই জ’ ৰুটে ক্ৰীজত প্ৰৱেশ কৰি প্ৰথমে অ’পেনাৰ বেন ডাকেট (৩৮)ৰ সৈতে অৰ্ধশতিকাৰ অংশীদাৰিত্ব কৰে আৰু তাৰ পিছত অধিনায়ক জোছ বাটলাৰৰ সৈতে দলটোক লক্ষ্যৰ দিশে লৈ গৈছিল। কিন্তু ডাকেট আৰু বাটলাৰে নিজৰ আৰম্ভণিক ডাঙৰ স্ক’ৰলৈ ৰূপান্তৰিত কৰিব নোৱাৰিলে, আনহাতে হেৰী ব্ৰুকেও একে ভুল কৰিলে। অৱশ্যে প্ৰায় ৬ বছৰৰ পাছত এদিনীয়া ক্ৰিকেটত প্ৰথম শতক অৰ্জন কৰে ৰুটে। যেতিয়ালৈকে ৰুট (১২০) ক্ৰীজত আছিল, ইংলেণ্ডৰ আশা অক্ষত আছিল যদিও ওমৰজাই (৫/৫৮) প্ৰথম ৰুট আৰু তাৰ পিছত জেমী অভাৰটন (৩২)ৰ উইকেট দখল কৰি ইংলেণ্ডক পৰাজয়ৰ দিশে ঠেলি দিছিল। তাৰ পাছত শেষৰ অভাৰত ওমৰজাইয়ে আদিল ৰছিদৰ উইকেট দখল কৰি  ইনিংছ আৰু মেচখন সমাপ্ত কৰে।