প্ৰথমবাৰৰ বাবে গুৱাহাটীত অনুষ্ঠিত হ’ব টেষ্ট মেচ, BCCIয়ে ঘোষণা কৰিলে খেলৰ সূচী

প্ৰথমবাৰৰ বাবে গুৱাহাটীত অনুষ্ঠিত হ'ব টেষ্ট মেচ

চলিত আইপিএল ২০২৫ত নিজৰ যোগ্যতা দেখুৱাইছে টীম ইণ্ডিয়াৰ প্ৰখ্যাত খেলুৱৈসকলে। ইয়াৰ মাজতে বিশ্বৰ আটাইতকৈ ধনী ক্ৰিকেট ব’ৰ্ড BCCIয়ে কৰিছে এক ডাঙৰ ঘোষণা। বিচিচিআইয়ে ২০২৫ চনত ভাৰতীয় দলৰ ঘৰুৱা ছিজন ঘোষণা কৰিছে য’ত টীম ইণ্ডিয়াই ৪খন টেষ্ট, ৩খন এদিনীয়া আৰু ৫খন টি-২০ মেচত অৱতীৰ্ণ হ’ব। ভাৰতৰ ক্ৰিকেট নিয়ন্ত্ৰণ ব’ৰ্ডে বুধবাৰে সন্ধিয়া ২০২৫ চনৰ ঘৰুৱা ছিজনৰ সূচী প্ৰকাশ কৰে। এই অনুসৰি টীম ইণ্ডিয়াই ৱেষ্ট ইণ্ডিজ আৰু দক্ষিণ আফ্ৰিকাৰ বিৰুদ্ধে টেষ্ট, এদিনীয়া আৰু টি-২০ খেলৰ মুখামুখি হ’ব লাগিব। ২ অক্টোবৰৰ পৰা আৰম্ভ হ’বলগীয়া এই ছিজন ১৯ ডিচেম্বৰলৈকে চলিব, য’ত বহু নতুন আৰু পৰম্পৰাগত খেলপথাৰত মেচসমূহ অনুষ্ঠিত হ’ব।

ৱেষ্ট ইণ্ডিজৰ ভাৰত ভ্ৰমণ

ভাৰতীয় দলৰ ছিজন আৰম্ভ হ’ব টেষ্ট শৃংখলাৰ পৰা, য’ত ৱেষ্ট ইণ্ডিজৰ বিৰুদ্ধে দুখন টেষ্ট মেচ অনুষ্ঠিত হ’ব। অহা ২ অক্টোবৰৰ পৰা ৬ অক্টোবৰলৈ আহমেদাবাদৰ নৰেন্দ্ৰ মোদী ষ্টেডিয়ামত প্ৰথমখন টেষ্ট অনুষ্ঠিত হোৱাৰ বিপৰীতে দ্বিতীয়খন টেষ্ট ১০ অক্টোবৰৰ পৰা ১৪ অক্টোবৰলৈ কলকাতাৰ ইডেন গাৰ্ডেনত অনুষ্ঠিত হ’ব।

দক্ষিণ আফ্ৰিকাৰ ভাৰত ভ্ৰমণ

ৱেষ্ট ইণ্ডিজৰ পিছত ভাৰতীয় দলটোৱে তিনিওটা ফৰ্মেটতে দক্ষিণ আফ্ৰিকাৰ বিৰুদ্ধে তীব্ৰ প্ৰতিদ্বন্দ্বিতা কৰিব। ১৪ নৱেম্বৰৰ পৰা আৰম্ভ হ’ব টেষ্ট শৃংখলা, য’ত প্ৰথমখন খেল অনুষ্ঠিত হ’ব দিল্লীৰ অৰুণ জেটলী ষ্টেডিয়ামত। দ্বিতীয়খন টেষ্ট ২২ নৱেম্বৰৰ পৰা ২৬ নৱেম্বৰলৈ গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হ’ব।এয়াই হ’ব বৰ্ষাপাৰাত অনুষ্ঠিত প্ৰথমখন টেষ্ট মেচ । ইয়াৰ পিছত তিনিখন এদিনীয়া খেল অনুষ্ঠিত হ’ব, যিবোৰ ৩০ নৱেম্বৰত ৰাঁচীত, ৩ ডিচেম্বৰত ৰায়পুৰত আৰু ৬ ডিচেম্বৰত বিশাখাপট্টনমত অনুষ্ঠিত হ’ব। একে সময়তে ৯ ডিচেম্বৰৰ পৰা আৰম্ভ হ’ব ৫ খন টি-২০ মেচৰ শৃংখলা, য’ত কটক, নিউ চণ্ডীগড়, ধৰ্মশালা, লক্ষ্ণৌ আৰু আহমেদাবাদে মেচৰ আয়োজন কৰিব।

উল্লেখ্য যে ভাৰত-দক্ষিণ আফ্ৰিকাৰ এই মেচৰ যোগেদি আন্তঃৰাষ্ট্ৰীয় টেষ্ট ক্ৰিকেটৰ জগতত খোজ পেলাব গুৱাহাটীৰ বৰ্ষাপাৰা ষ্টেডিয়াম। যাক লৈ এতিয়া ৰাজ্যৰ ক্ৰিকেটপ্ৰেমীৰ মাজত দেখা গৈছে যথেষ্ট উছাহ। কিছুদিন পূৰ্বে চলিত আইপিএলৰ দুখনকৈ মেচ অনুষ্ঠিত হৈছে বৰ্ষাপাৰা ষ্টেডিয়ামত। য’ত ঘৰুৱা দল ৰাজস্থান ৰয়েলছে কলকতা নাইট ৰাইডাৰ্ছ আৰু চেন্নাই চুপাৰ কিংছৰ মুখামুখি হৈছিল। ইয়াৰ পূৰ্বেও গুৱাহাটীৰ বৰ্ষাপাৰা ষ্টেডিয়াম অনুষ্ঠিত হৈছে আন্তঃৰাষ্ট্ৰীয়  এদিনীয়া আৰু টী-২০ মেচ। এতিয়া টেষ্ট ক্ৰিকেট আয়োজনৰ বাবে প্ৰস্তুতি চলাইছে অসম ক্ৰিকেট সন্থাই।