Boxing Day Test : কাইলৈ পৰা ভাৰত-অষ্ট্ৰেলিয়াৰ বক্সিং ডে’ টেষ্ট, কি পৰিকল্পনা কৰিছে অধিনায়ক ৰোহিত শৰ্মাই ?

ৰোহিত শৰ্মা

২৬ ডিচেম্বৰৰ পৰা মেলবৰ্ণত অনুষ্ঠিত হ’বলগীয়া ভাৰত আৰু অষ্ট্ৰেলিয়াৰ বক্সিং ডে’ টেষ্টলৈ সকলোৱে আগ্ৰহেৰে অপেক্ষা কৰি আছে। এই গুৰুত্বপূৰ্ণ খেলখনৰ বাবে ইতিমধ্যে অষ্ট্ৰেলিয়াৰ দলটোৱে মূল একাদশ ঘোষণা কৰিছে। ইফালে, টীম ইণ্ডিয়াই এতিয়াও ঘোষণা কৰা নাই মূল একাদশৰ তালিকা । কিন্তু অধিনায়ক ৰোহিত শৰ্মাই নতুন পৰিকল্পনা নিশ্চিতভাৱে কৰিছে । চৰ্চা হৈছে যে, WTC ফাইনেলৰ দৃষ্টিকোণৰ পৰা ভাৰতে যিকোনো মূল্যৰ বিনিময়ত এই মেচত জয়ী হোৱাটো প্ৰয়োজনীয় আৰু ইয়াৰ বাবে ভাৰতীয় অধিনায়কগৰাকীয়ে প্ৰচেষ্টা চলাব।

পাৰ্থ টেষ্টত খেলা নাছিল ৰোহিত শৰ্মাই। তাৰ পাছত কে এল ৰাহুল আৰু যশস্বী জয়ছৱালৰ যুটিয়ে আচৰিত ধৰণে বেটিং প্ৰদৰ্শন কৰিছিল। সেয়ে দললৈ ঘূৰি অহাৰ সময়ত তেওঁ অ’পেনিঙত কোনো সালসলনি কৰা নাছিল। তেওঁ নিজেই ৬ নম্বৰত বেটিং কৰা দেখা গৈছিল। কিন্তু যোৱা দুখন মেচত তেওঁৰ প্ৰদৰ্শন অতি দুৰ্বল আছিল। ৩ টা ইনিংছত ৬.৩৩ গড়ে মাত্ৰ ১৯ ৰানহে কৰিবলৈ সক্ষম হৈছিল। এতিয়া মেলবৰ্ণৰ খেলপথাৰখন বেটিং কৰাৰ বাবে অলপ সহজ হ’ব পাৰে। এনে পৰিস্থিতিত ৰোহিতে পুনৰ নিজৰ মূল স্থানলৈ ঘূৰি অহাৰ সিদ্ধান্ত লোৱাৰ সম্ভাৱনা আছে ।

টাইমছ অৱ ইণ্ডিয়াৰ প্ৰতিবেদন অনুসৰি যশস্বী জয়ছৱালৰ সৈতে অপেনিং কৰাৰ সম্ভাৱনা আছে  ৰোহিত শৰ্মাই। যদি তেওঁ আৰম্ভণিতে কিছু সময় ধৰি ৰাখিবলৈ সক্ষম হয় তেন্তে তেওঁ পুনৰ ফৰ্মলৈ ঘূৰি আহিব পাৰে। আনহাতে কে এল ৰাহুলক শুভমান গিলৰ সলনি ৩ নম্বৰত পঠিয়াব পাৰে । অৱশ্যে অ’পেনিং কৰাৰ সময়ত ৰাহুলে এই পৰ্যন্ত ছিৰিজত অতি ভাল বেটিং প্ৰদৰ্শন কৰিছে। তেওঁ গড়ে ৪৭ ৰানত ২৩৫ ৰান সংগ্ৰহ কৰিছে, য’ত ২ টা অৰ্ধশতক অন্তৰ্ভুক্ত।

মেলবৰ্ণৰ খেলপথাৰত স্পিনাৰসকলেও অধিক গুৰুত্ব লাভ কৰে। চতুৰ্থ আৰু পঞ্চম দিনত তেওঁলোকৰ ভূমিকা অতি গুৰুত্বপূৰ্ণ হৈ পৰে। পিটচ বিৰতিৰ পিছত তেওঁলোকে বেটছমেনৰ ওপৰত আধিপত্য বিস্তাৰ কৰিব পাৰে । প্ৰতিবেদন অনুসৰি, এই কথা বিবেচনা কৰিলে অধিনায়ক ৰোহিত শৰ্মাই দুজন স্পিনাৰক মূল একাদশত অন্তৰ্ভক্ত কৰিব পাৰে। ৰবীন্দ্ৰ জাডেজাৰ লগতে ৱাশ্বিংটন সুন্দৰেও হয়তো প্লেয়িং একাদশত স্থান লাভ কৰিব পাৰে। নীতিশ কুমাৰ ৰেড্ডী এই টেষ্টত নেখেলাৰ সম্ভাৱনা আছে ।