এটা এপাৰ্টমেন্ট ভাৰা দিয়াৰ বাবদ মাহে ২.৬ লাখ টকা পায় এইগৰাকী ভাৰতীয় ক্ৰিকেটাৰে

ৰোহিত শৰ্মা

ভাৰতীয় ক্ৰিকেট দলৰ অধিনায়ক তথা বিষ্ফোৰক অপেনাৰ ৰোহিত শৰ্মাক কোনেনো চিনি নাপায় । ক্ৰিকেট অনুৰাগীৰ মাজত হিটমেন হিচাপে পৰিচিত ৰোহিতৰ নামত আছে বহুকেইটা অভিলেখ । এদিনীয়াত এখন মেচত সৰ্বাধিক ব্যক্তিগত ৰাণৰ পৰা আৰম্ভ কৰি তিনিটাকৈ দ্বিশতকলৈকে ৰোহিতে নিজৰ দক্ষতাৰ পৰিচয় দিছে ক্ৰীড়াক্ষেত্ৰত । আজি পিছে আমি ৰোহিত শৰ্মাৰ খেলৰ বিষয়ে আলোচনা কৰিব খোজা নাই । আন এটা কথাহে আলোচনা কৰিব খুজিছোঁ ।

আপোনাৰ থকা ঘৰটোত যদি অতিৰিক্ত মহলা থাকে, বা আপোনাৰ যদি একাধিক বাসোপযোগী ঘৰ থাকে তেন্তে আপুনি নিশ্চয় সেয়া ভাৰালৈ দিয়ে । ক্ৰিকেটাৰ ৰোহিত শৰ্মায়ো নিজৰ এটা ঘৰ ভাৰালৈ দিছে । মুম্বাই মহানগৰীৰ ল’ৱাৰ পেৰেলত থকা এই এপাৰ্টমেন্টটো ভাৰতীয় টেষ্ট আৰু এদিনীয়া ক্ৰিকেট দলৰ অধিনায়ক ৰোহিত শৰ্মাৰ মালিকানাধীন । তেওঁৰ নামত আছে এই সম্পত্তিৰ নথি-পত্ৰ ।

কিমান টকাত এই এপাৰ্টমেন্টটো হিটমেনে ভাৰাত দিছে জানেনে । স্কোৱাৰ য়াৰ্ডে প্ৰকাশ কৰা তথ্য মতে, প্ৰতিমাহে ২.৬০ লাখ টকাৰ বিনিময়ত ৰোহিত শৰ্মাই এই এপাৰ্টমেন্টটো ভাৰালৈ দিছে ।

“ৰোহিত শৰ্মাই ভাৰালৈ দিয়া এপাৰ্টমেণ্টটো মেক্ৰ’টেক ডেভেলপাৰ্ছ লিমিটেডে (লোধা গ্ৰুপ) নিৰ্মাণ কৰা লোধা মাৰ্কিজ – দ্য পাৰ্কত অৱস্থিত । ৭ একৰ মাটিত বিস্তৃত ই এটা ৰেডি টু মুভ আৱাসিক প্ৰকল্প । এপাৰ্টমেণ্টটোৰ কাৰ্পেট এলেকা ১২৯৮ বৰ্গফুট (১২৯.৮ বৰ্গমিটাৰ) আৰু ইয়াত দুটা গাড়ী পাৰ্কিং স্থান অন্তৰ্ভুক্ত কৰা হৈছে ।” স্কোৱাৰ য়াৰ্ডছৰ উদ্ধৃতিৰে এই তথ্য প্ৰকাশ কৰিছে পিটিআয়ে ।

স্কোৱাৰ য়াৰ্ডছে জনোৱা মতে, ২০১৩ চনৰ মাৰ্চ মাহত ৰোহিত শৰ্মা আৰু তেওঁৰ পিতৃ গুৰুনাথ শৰ্মাই ৫.৪৬ কোটি টকাত ক্ৰয় কৰা এই এপাৰ্টমেণ্টটো ২.৬ লাখ টকাত ভাৰালৈ দিয়া হৈছে । উল্লেখযোগ্য যে এই প্ৰকল্পত ৰোহিত শৰ্মা আৰু তেওঁৰ পিতৃৰ আন এটা এপাৰ্টমেণ্ট আছে আৰু সেইটো ২০২৪ চনৰ অক্টোবৰ মাহত প্ৰতিমাহে ২.৬৫ লাখ টকাত ভাৰালৈ দিয়া হৈছিল ।