বাপুৰ খাটাত নাই এটাও উইকেট, অধিনায়কত্বই বঢ়াইছে নেকি চাপ?

অক্ষৰ পেটেল

ভাৰতীয় ক্ৰিকেটতো জনপ্ৰিয় বাপু । ভাৰতীয় ক্ৰিকেটপ্ৰেমীয়ে তেওঁক এই নামেৰেই জানে । তাৰকা স্পিনাৰ অক্ষৰ পেটেল, যাৰ ডাক নাম বাপু । ১৮ সংখ্যক আই পি এল আৰম্ভ হোৱাৰ পূৰ্বে দিল্লী কেপিটেলছ অধিনায়কৰ দায়িত্ব লাভ বাপুৰ । তাৰ পাছত তেওঁ কৈছিল, বাপুৰ ওপৰত ভৰষা ৰাখক । তেওঁ দলে ছন্দোবদ্ধভাৱে আগুৱাইছিল আই পি এলত ।

শেহতীয়াকৈ অৰুণ জেটলি ষ্টেডিয়ামত মুম্বাই ইণ্ডিয়ানছৰ হাতত পৰাজিত হোৱাৰ বাহিৰে দিল্লীৰ গতি ৰোধ কৰিব পৰা নাই আন দলে । কিন্তু অক্ষৰৰ গতি? অধিনায়ক হোৱাৰ পাছত চাপ বাঢ়িছে নেকি তেওঁৰ? জানিবলৈ উদগ্ৰীৱ ক্ৰিকেট মহল । উত্তৰ বিচাৰিছে যেন অক্ষৰেও । পূৰ্বতে আই পি এলত বা জাতীয় দলত একাধিক মেচত প্ৰতিপক্ষক বিধ্বস্ত কৰিছিল বাপুৱে । কিন্তু এইবাৰ আই পি এলত প্ৰদৰ্শন নিস্তেজ । যি বাপু প্ৰতিপক্ষৰ বেটাৰৰ বাবে ‘হানিকাৰক’ আছিল, তেওঁৰ এনে অৱস্থা কিয়?

এইবাৰৰ আই পি এলত হাতত বল লৈ এখনো মেচ জিকোৱা দেখা পোৱা নাই অক্ষৰে । দিল্লীয়ে এই ছিজনত ৫খন খেল খেলিছে । তাৰে প্ৰথম ৪ খনত জয়ী হয় । শেষৰখন মেচত পৰাস্ত হয় মুম্বাইৰ হাতত । এই ৪ খন মেচত অক্ষৰে বলিঙত ১৩৭ ৰান ব্যয় কৰিছে । কিন্তু এটাও উইকেট দখল কৰিব পৰা নাই ।

বেটিঙত তেওঁৰ অৱদান ৫খন মেচত ৪ টা ইনিংছত ৬৭ ৰান! তেওঁ এজন অলৰাউণ্ডাৰ । ফলত বেটিং আৰু বলিং দুয়োটা বিভাগতে তেওঁৰ প্ৰদৰ্শনৰ ওপৰত নজৰ ৰখা হৈছে । অৱশ্যে বলিং কৰি থাকোঁতে সকলোৰে দৃষ্টি তেওঁৰ ওপৰত বেছি । সেই বলিং বিভাগত তেওঁ কি অৱদান আগবঢ়াবলৈ সক্ষম হৈছে ?

দিল্লীয়ে লক্ষ্ণৌ ছুপাৰ জায়েন্টছৰ বিৰুদ্ধে ছিজনৰ প্ৰথমখন মেচ খেলিছিল, য’ত কেপিটেলছৰ অধিনায়ক অক্ষৰে ৩ অভাৰত ১৮ ৰান দিছিল । কোনো উইকেট নাপালে । পৰৱৰ্তী খেলখনত ছানৰাইজাৰ্ছ হায়দৰাবাদৰ বিৰুদ্ধে ৪ অভাৰত ৪৩ ৰান দিয়ে । তাৰ পিছত চেন্নাই ছুপাৰ কিংছৰ বিৰুদ্ধে ১ অভাৰত ৫ ৰান, আৰ চি বিৰ বিৰুদ্ধে ৪ অভাৰত ৫২ ৰান, আৰু শেষৰখন মেচত মুম্বাইৰ বিৰুদ্ধে ২ অভাৰত ১৯ ৰান দিয়ে । কিন্তু অক্ষৰে এই ছিজনত এটাও উইকেট ল’ব পৰা নাই ।

অধিনায়কত্বৰ অত্যধিক চাপতেই তেওঁ নিস্প্ৰভ হৈ পৰিছে নেকি? ক্ৰিকেট জগতৰ বহু লোকে এই কথা কৈছে । অক্ষৰেও হয়তো পুনৰ ছন্দ ঘূৰাই পাবলৈ অপেক্ষা কৰি আছে । তেওঁৰ প্ৰতিভাক লৈ কোনো সন্দেহ নাই । মাত্ৰ বেট আৰু বলৰ সৈতে জিলিকিবলৈহে অপেক্ষা ।