অভিষেক মেচতে এইগৰাকী যুৱ খেলুৱৈয়ে কৰিলে এনে কাণ্ডঃ দেখি চকু কপালত উঠিল অনুৰাগীৰ…

কামিন্দুৰ চমক

আই পি এল মানেই ক্ৰিকেট অনুৰাগীৰ মাজত ৰোমাঞ্চ তথা উন্মাদনা, এফালে ক্ৰিকেটীয় প্ৰতিভাৰ চমক আৰু আনফালে মনোৰঞ্জনৰ চমকপ্ৰদ সংমিশ্ৰণ ক্ৰিকেট বিশ্বৰ এই ধনাঢ্য তথা জনপ্ৰিয় লীগ। প্ৰায় প্ৰতিখন মেচেই ক্ৰিকেট অনুৰাগীৰ মাজলৈ লৈ আনে উপভোগৰ অনন্য সুযোগ, দেখা যায় নতুন নতুন অভিলেখ, নতুন নতুন খেলুৱৈৰ উন্মেষ। পুনৰ এবাৰ আই পি এলে অনুৰাগীৰ মাজলৈ আনিছে এক বিশেষ মুহূৰ্ত। একপ্ৰকাৰে বিৰল ঘটনাৰ সাক্ষী হৈছে ক্ৰিকেট অনুৰাগী। এই বিৰল দৃশ্য দেখা গৈছে বৃহস্পতিবাৰে অনুষ্ঠিত হোৱা মেচত।

বৃহস্পতিবাৰে আই পি এলৰ মেচত মুখামুখি হৈছিল কলকাতা নাইট ৰাইডাৰ্ছ আৰু ছানৰাইজাৰ্ছ হায়দৰাবাদ। ইডেনত অনুষ্ঠিত হোৱা এই মেচখনত ঘৰুৱা দৰ্শকৰ সমুখত দুৰন্ত প্ৰদৰ্শন আগবঢ়াই সহজ জয় লাভ কৰে কলকাতাই। এই মেচখনত হায়দৰাবাদৰ অধিনায়ক পেট কামিন্সে টছত জয়ী হৈ প্ৰথমে বলিঙৰ সিদ্ধান্ত লৈছিল আৰু সেই অনুসাৰে প্ৰথমে বেটিং কৰিছিল ঘৰুৱা দলটোৱে। কলকাতাৰ ইনিংছৰ সময়তে খেলপথাৰত দেখা গৈছিল এক বিশেষ দৃশ্য।

এই মেচখনত হায়দৰাবাদৰ হৈ আই পি এল অভিষেক ঘটাইছিল শ্ৰীলংকাৰ অল-ৰাউণ্ডাৰ কামিন্দু মেণ্ডিছে। সেই মেচখনৰ ত্ৰয়োদশ অভাৰত মেণ্ডিছৰ হাতত বল তুলি দিয়ে অধিনায়ক কামিন্সে। বল হাতত লৈয়ে মেণ্ডিছে দেখুৱায় এক চমক। অভাৰটোৰ প্ৰথম তিনিটা বলত তেওঁ বাওঁহাতেৰে স্পিন বল কৰে। কিন্তু চতুৰ্থ বলৰ পৰা সকলোকে আচৰিত কৰি মেণ্ডিছে সোঁহাতেৰে অফ স্পাইন কৰিবলৈ আৰম্ভ কৰে।

উল্লেখ্য যে অভাৰটোৰ চতুৰ্থ বলত, অৰ্থাৎ মেণ্ডিছে সোঁহাতেৰে কৰা প্ৰথমটো বলতে অৰ্ধশতকীয় ইনিংছেৰে ক্ৰীজত খোপনি পুতি থকা অংকৃশ ৰঘুবংশীয়ে নিজৰ উইকেট হেৰুৱায়। অৱশ্যে ইয়াৰ পূৰ্বেও কামিন্দু মেণ্ডিছে বল হাতত লৈ এনে চমক দেখুৱাইছে। আন্তঃৰাষ্ট্ৰীয় পৰ্যায়তে তেওঁ দেখুৱাইছিল এই দক্ষতা। বিগত বৰ্ষৰ জুলাই মাহত শ্ৰীলংকাৰ বিৰুদ্ধে তিনিখন খেলৰ টি-২০ শৃংখলাৰ প্ৰথমখন খেলত ভাৰতে জয়লাভ কৰিছিল।

সেই মেচখনত ভাৰতৰ ইনিংছৰ সময়ত শ্ৰীলংকান খেলুৱৈগৰাকীয়ে এটা অভাৰত দুয়োহাতেৰে বলিং কৰা দেখা গৈছিল। ছচিয়েল মিডিয়াত ভাইৰেল হৈ পৰিছিল মেণ্ডিছৰ বলিঙৰ এই দৃশ্য। ইয়াৰ উপৰিও ১৯ বছৰ অনুৰ্ধ ক্ৰিকেট বিশ্বকাপৰ সময়তো তেওঁ দুয়োহাতেৰে বলিং কৰিছিল। সেই সময়ত তেওঁ শ্ৰীলংকাৰ ১৯ অনুৰ্ধ দলৰ অধিনায়ক আছিল। এতিয়া আই পি এলতো কামিন্দু মেণ্ডিছে তেওঁৰ এই বিশেষ প্ৰতিভা প্ৰদৰ্শন কৰিলে অনুৰাগীৰ সমুখত।