MS Dhoni: আজিয়েই যৱনিকা পৰিব নেকি ধোনীৰ ক্ৰিকেট কেৰিয়াৰৰ! চেপ’কৰ এনে দৃশ্যক লৈ হৈছে আলোড়ন
MS Dhoni: শেহতীয়া কেইটামান বছৰত আই পি এলৰ আৰম্ভণিৰ আগে আগে অনুৰাগীৰ মাজত ধোনীৰ অৱসৰৰ সম্ভাৱনাক লৈ যথেষ্ট আলোচনা চলা দেখা গৈছে। অৱশ্যে প্ৰতিবাৰেই নিজৰ উপস্থিতিৰে এনে আলোচনাক ভিত্তিহীন কৰি তুলিছে ধোনীয়ে। পিছে আজি চেপ’ক ষ্টেডিয়ামত দিল্লীৰ বিপক্ষে চলি থকা চেন্নাইৰ মেচৰ মাজতে এই চৰ্চা পুনৰ এবাৰ আৰম্ভ হৈছে।

ধোনীয়ে ল’ব নেকি অৱসৰ!
বিগত কেইবাটাও বৰ্ষ ধৰি ক্ৰিকেটপ্ৰেমীৰ মাজত দেখা গৈছে মহেন্দ্ৰ সিং ধোনীৰ সম্ভাৱ্য অৱসৰৰ চৰ্চা। শেহতীয়া কেইটামান বছৰত আই পি এলৰ আৰম্ভণিৰ আগে আগে অনুৰাগীৰ মাজত ধোনীৰ অৱসৰৰ সম্ভাৱনাক লৈ যথেষ্ট আলোচনা চলা দেখা গৈছে। অৱশ্যে প্ৰতিবাৰেই নিজৰ উপস্থিতিৰে এনে আলোচনাক ভিত্তিহীন কৰি তুলিছে ধোনীয়ে। ব্যতিক্ৰম নহ’ল আই পি এল ২০২৫- ও। এই ছিজনৰ আৰম্ভণিৰ পূৰ্বেও দেখা গৈছিল ‘থালা’ ধোনীৰ অৱসৰৰ চৰ্চা। কিন্তু এনে চৰ্চাৰ মাজতে ধোনীয়ে তেওঁ বিচৰালৈকে খেলি যাব বুলি মন্তব্য কৰি চৰ্চাৰ অন্ত পেলাইছিল।
পিছে আজি চেপ’ক ষ্টেডিয়ামত দিল্লীৰ বিপক্ষে চলি থকা চেন্নাইৰ মেচৰ মাজতে ধোনীৰ অৱসৰৰ চৰ্চা পুনৰ এবাৰ আৰম্ভ হৈছে। চেপ’ক ষ্টেডিয়ামত দেখা পোৱা এক বিশেষ দৃশ্যৰ বাবে পুনৰ আলোচিত হৈছে ধোনীৰ সম্ভাৱ্য অৱসৰৰ খবৰ। পিছে হঠাতে এইদৰে ধোনীৰ অৱসৰৰ আলোচনা হ’ব লগাকৈ খেলপথাৰত এনে কি ঘটিল! চেপ’কৰ ষ্টেডিয়ামত আজি দৰ্শকৰ আসনত দেখিবলৈ পোৱা গৈছে মহেন্দ্ৰ সিং ধোনীৰ পিতৃ-মাতৃক।
লক্ষণীয়ভাৱে ধোনীৰ সুদীৰ্ঘ প্ৰায় ২০ বছৰীয়া ক্ৰিকেট কেৰিয়াৰত এবাৰলৈও দৰ্শক হিচাপে দেখা পোৱা নাই তেওঁৰ পিতৃ-মাতৃক। এই সময়ছোৱাত ধোনীয়ে ভাৰতী দলক নেতৃত্ব দি আনকি টি-২০ বিশ্বকাপ, এদিনীয়া বিশ্বকাপ আৰু চেম্পিয়নছ ট্ৰফীও জয় কৰিছে। চেন্নাইক নেতৃত্ব প্ৰদান কৰিও তেওঁ জয় কৰিছে ৫টা আই পি এল খিতাপ। কিন্তু এই সময়ছোৱাতো আনকি ষ্টেডিয়ামত দেখা পোৱা নগৈছিল তেওঁৰ পিতৃ-মাতৃক।
মহেন্দ্ৰ সিং ধোনী
আজি হঠাতে সেয়ে ধোনীৰ পিতৃ পান সিং আৰু মাতৃ দেৱকী দেৱীয়ে দৰ্শকৰ আসনত দেখা পাই অনুৰাগীৰ মাজত দেখা গৈছে ধোনীৰ সম্ভাৱ্য অৱসৰৰ শংকা। উল্লেখ্য যে ২০২০ চনৰ ১৫ আগষ্টত কোনো আগতীয়া চৰ্চা অবিহনেই সকলোকে হচকিত কৰি আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল মহেন্দ্ৰ সিং ধোনীয়ে। ইয়াৰ পিছত তেওঁ কেৱল আই পি এলৰ জৰিয়তেই খেলপথাৰত দেখা দি আহিছে।
পিছে আজি তেওঁৰ পিতৃ-মাতৃক দৰ্শকৰ আসনত দেখাৰ পিছত এক অজানা আশংকাত আলোড়িত হৈ পৰিছে অনুৰাগী। ধোনীৰ পিতৰ-মাতৃক স্ক্ৰীণত দেখা পোৱাৰ পিছত ধাৰাভাষ্যকাৰ সকলৰ মুখতো শুনা গৈছে তেনে আশংকাই। গতিকে এতিয়া চলিত মেচখনৰ সমাপ্তিলৈ অজানা আশংকা মনত লৈ ৰৈ থাকিব ক্ৰিকেটপ্ৰেমীসকল। কিজানি ২০২০ চনৰ ১৫ আগষ্টৰ দৰেই আজি ২০২৫ চনৰ ৫ এপ্ৰিলত ধোনীয়ে আচম্বিতে ঘোষণা কৰে কোনেও আশা নকৰা অৱসৰৰ সিদ্ধান্ত!