হাৰ্দিকৰ জীৱনত নামিছে নতুন বসন্ত, শীঘ্ৰেই দিব পাৰে ভাল খবৰ!

সময়ৰ লগে লগে সলনি হয় বহু কথা । হাৰ্দিক পাণ্ডিয়াৰ জীৱনলৈও আহিছে তেনে বহু পৰিৱৰ্তন । সেয়া ক্ৰিকেটতেই হওক বা ব্যক্তিগত জীৱনতেই হওক । কেৰিয়াৰত বহুবাৰ ঘাত-প্ৰতিঘাতৰ সন্মুখীন হৈছে পাণ্ডিয়া । পুনৰ থিয় দিছে সংঘাত নেওচি । নানা বিতৰ্কতো সোমাই পৰিছিল তেওঁ । এটা টেলিভিশ্যন শ্ব’ত কৰা মন্তব্যৰ বাবে তীব্ৰ বিতৰ্কৰ সৃষ্টি হৈছিল হাৰ্দিকক লৈ । সেয়া বহু আগৰ কথা । সেই বিতৰ্কৰ পৰা ওলাই আহিছিল খেলুৱৈগৰাকী ।

এসময়ত কিংবদন্তি কপিল দেৱৰ সৈতে তুলনা কৰা হৈছিল হাৰ্দিক পাণ্ডিয়াক । কাৰণ তেওঁ দুদাৰ্ন্ত ফিটনেছৰ গৰাকী । ক্ৰিকেটৰ তিনিওটা ফৰ্মেটতে বিস্ফোৰক প্ৰদৰ্শন কৰি আহিছে পাণ্ডিয়াই । কপিল দেৱৰ পাছত ভাৰতীয় ক্ৰিকেটত তেনে এগৰাকী অলৰাউণ্ডাৰ পাণ্ডিয়া, সেইদৰেই ভাবিছিল সকলোৱে । কিন্তু আঘাতৰ বাবে টেষ্ট ক্ৰিকেটৰ পৰা যেন আঁতৰি আহিছে তেওঁ । দীঘলীয়া ফৰ্মেটত যেন হেৰুৱাইছে স্থান । অৱশ্যে এতিয়াও বগা বলৰ স্পেছিয়েলিষ্ট পাণ্ডিয়া ।

ইয়াৰ লগত যোগ হৈছে আই পি এলৰ কঠিন সময় । যোৱা ছিজনৰ কথা সকলোৱে জানে । গুজৰাট টাইটানছৰ পৰা ট্ৰেডিঙত মুম্বাই ইণ্ডিয়ানছলৈ উভতি আহিছিল পাণ্ডিয়া । ৰোহিতৰ ঠাইত অধিনায়ক হিচাপে মুম্বাইৰ দায়িত্ব দিয়াত ক্ষুব্ধ হৈ পৰে অনুৰাগীসকল । আনহাতে, ৰিটেনচন লিষ্ট প্ৰকাশ পোৱাৰ পিছত দল এৰি যোৱাৰ বাবে টাইটানছৰ অনুৰাগীসকলো ক্ষুব্ধ হৈ পৰিছিল । এই ছিজনত আহমেদাবাদত অনুষ্ঠিত হোৱা এখন খেলৰ জৰিয়তে হাৰ্দিকৰ আই পি এল যাত্ৰা আৰম্ভ হয় । মেচখনত পৰাস্ত হ’লেও অনুৰাগীৰ মৰমৰত পৰাস্ত হোৱা নাছিল । গেলেৰীৰ দৰ্শকে তেওঁক উপহাস কৰা নাছিল । ক’ব পাৰি যে হাৰ্দিক জয়ী হৈছিল ।

একেদৰে মুম্বাই ইণ্ডিয়ানছৰ ঘৰুৱা খেলপথাৰ ৱাংখেড়েৰ দৃশ্যও সলনি হৈছে । কলকাতা নাইট ৰাইডাৰ্ছৰ বিৰুদ্ধে খেলখনত সেয়া স্পষ্ট হৈ পৰিছিল । এইখন আছিল ছিজনৰ প্ৰথমখন ঘৰুৱা মেচ । হাৰ্দিকৰ অধিনায়কত্বত মুম্বাইৰ বৃহৎ জয় । গেলেৰীৰ দৰ্শকেও তেওঁক মৰমেৰে উপচাই দিলে । পুনৰবাৰ মুম্বাইৰ প্ৰিয় হৈ পৰিছে হাৰ্দিক পাণ্ডিয়া । কিন্তু ব্যক্তিগত জীৱনৰ ঘাঁবোৰ শুকাইছেনে ?

এই প্ৰশ্নৰ শুদ্ধ উত্তৰ কেৱল হাৰ্দিকেহে জানে । ছাৰ্বিয়ান মডেল নাটাছাৰ সৈতে বিবাহ বিচ্ছেদৰ পাছত অলশৰীয়া জীৱনৰ সৈতে ছন্দ মিলাবলৈ সময় লাগিছে । পুত্ৰ অগস্ত্য তেওঁৰ লগতে থাকে । সেয়াই এক বৃহৎ আশা । পুত্ৰৰ সৈতে লগত সময় কটালে খেলপথাৰৰ হতাশাবোৰ দূৰ হয় । হাৰ্দিক পাণ্ডিয়াই শীঘ্ৰে কিবা ভাল খবৰ দিব নেকি? দীৰ্ঘদিন ধৰি জল্পনা-কল্পনা চলি আছে । কে কে আৰ মেচৰ পিছত সেই জল্পনা-কল্পনা তীব্ৰতৰ হৈ পৰে ।

ব্ৰিটিছ কণ্ঠশিল্পী জেচমিন ৱালিয়াৰ সৈতে হাৰ্দিক পাণ্ডিয়াৰ সম্পৰ্কক লৈ দীৰ্ঘদিন ধৰি চৰ্চা চলি আহিছে । মুম্বাই ইণ্ডিয়ানছৰ ঘৰুৱা মেচতো ষ্টেণ্ডত আছিল জেচমিন । এয়া প্ৰথম নহয় যে তেওঁ কোনো মেচত অংশগ্ৰহণ কৰিছে । মুম্বাই ইণ্ডিয়ানছৰ পূৰ্বৰ খেলৰ সময়তো আহমেদাবাদত জেচমিনক দেখা গৈছিল ।

কেৱল সেয়াই নহয়, চেম্পিয়নছ ট্ৰফীৰ সময়ত ডুবাইতো উপস্থিত আছিল জেচমিন । ভাৰতীয় দলৰ ক্ৰিকেটাৰৰ পত্নী আৰু প্ৰেয়সীৰ সৈতে উপভোগ কৰিছিল খেল । মুম্বাইত সূৰ্যকুমাৰ যাদৱৰ পত্নী দেৱীশা শ্বেট্টীৰ সৈতে দেখা গৈছিল জেচমিনক । আনকি মেচ শেষ হোৱাৰ পিছত তেওঁলোকৰ লগত টিম বাছতো উঠিল । ইয়াৰ পৰাই ব্যাপক চৰ্চা আৰম্ভ হৈছে । ব্যক্তিগত জীৱনতো নতুন ইনিংছ আৰম্ভ কৰিছে নেকি হাৰ্দিকে ?

প্ৰতিবেদন- দীপাংকৰ ঘোষাল, ছিনিয়ৰ ছাব এডিটৰ, TV9-বাংলা