বৃ্দ্ধি হ’ল অনুৰাগীৰ অপেক্ষা! এতিয়াও IPLৰ দৌৰৰ পৰা বাহিৰত যশপ্ৰীত বুমৰাহ

এই মুহূৰ্তত IPL 2025 ত খেলাৰ বাবে সুস্থ হৈ উঠা নাই যশপ্ৰীত বুমৰাহ। খেলুৱৈগৰাকীৰ সন্দৰ্ভত আহিছে নতুন আপডেট, সেই অনুসৰি তেওঁৰ উভতি অহাৰ সময়ক লৈ এতিয়া অব্যাহত আছে ছাচপেন্স।  ইফালে আন এজন বলাৰ আকাশদীপে ১০ এপ্ৰিলৰ ভিতৰত ক্ৰিকেট খেলপথাৰলৈ ঘূৰি আহিব পাৰে বুলি সম্ভাৱনা ব্যক্ত কৰা হৈছে। ইয়াৰ পূৰ্বে বুমৰাহক লৈ খবৰ আহিছিল যে তেওঁ ১ এপ্ৰিলৰ পৰা মুম্বাই ইণ্ডিয়ানছত যোগদান কৰিব। কিন্তু নতুনকৈ অহা আপডেটট অনুসৰি তেওঁৰ কামবেকৰ তাৰিখ এতিয়াও নিৰ্ধাৰণ হোৱা নাই। তেওঁৰ উভতি অহাৰ বাবে এপ্ৰিল মাহৰ মাজভাগলৈকে সময় লাগিব পাৰে।

টাইমছ অৱ ইণ্ডিয়াৰ প্ৰতিবেদন অনুসৰি বুমৰাহ এতিয়া সম্পূৰ্ণ ফিট। কিন্তু বিচিচিআইৰ চিকিৎসা দলটোৱে অনুভৱ কৰিছে যে তৎক্ষণাত তেওঁৰ কামৰ বোজা বৃদ্ধি কৰাটো পুনৰ বিপদক আমন্ত্ৰণ জনোৱাৰ দৰে হ’ব পাৰে। সেয়ে তেওঁ বুমৰাহক অধিক জিৰণি দিয়াৰ সিদ্ধান্ত লৈছে। এই সিদ্ধান্তৰ আঁৰৰ কাৰণ হৈছে আইপিএল ২০২৫ৰ ঠিক পিছতেই ইংলেণ্ডত অনুষ্ঠিত হ’বলগীয়া টেষ্ট শৃংখলা।

বিচিচিআইৰ সূত্ৰৰ উদ্ধৃতি দি প্ৰকাশ কৰা এক প্ৰতিবেদনত লিখা হৈছে যে, বুমৰাহৰ আঘাত কিছু গুৰুতৰ। এনে পৰিস্থিতিত তেওঁ যাতে পুনৰ ষ্ট্ৰেছ ফ্ৰেক্টৰত ভুগিব লগা নহয় তাৰ প্ৰতি যত্ন লোৱা হৈছে। বুমৰাহ নিজেই এই বিষয়ক লৈ অতি সাৱধান। বিচিচিআইৰ চেণ্টাৰ অৱ এক্সেলেন্সত বলিঙৰ আৰম্ভণি কৰিছে বুমৰাহ। কিন্তু তেওঁক পুনৰ পূৰ্ণ গতিত আহিবলৈ সময় লাগিব পাৰে। বৰ্তমান তেওঁৰ উভতি অহাৰ কোনো তাৰিখ নিৰ্ধাৰণ কৰা হোৱা নাই। কিন্তু, সম্ভৱ যে এপ্ৰিলৰ মাজভাগলৈকে তেওঁ ঘূৰি আহিব পাৰে। আকাশদীপৰ সন্দৰ্ভত সূত্ৰই জনোৱা মতে, ১০ এপ্ৰিলৰ ভিতৰত তেওঁ ঘূৰি আহিব পাৰিব।

উল্লেখ্য যে, অষ্ট্ৰেলিয়াত অনুষ্ঠিত ছিডনী টেষ্টৰ সময়ত কঁকালৰ তলৰ অংশত পোৱা আঘাতৰ পৰা সুস্থ হৈ উঠিছে যশপ্ৰীত বুমৰাহ। ইফালে পিঠিৰ আঘাত পোৱাৰ অভিযোগ আকাশদীপৰ। অষ্ট্ৰেলিয়া ভ্ৰমণৰ পিছত দুয়োগৰাকী খেলুৱৈয়ে কোনো প্ৰতিযোগিতামূলক ক্ৰিকেটত খেলা দেখা পোৱা নাই। আঘাতৰ বাবে চেম্পিয়নছ ট্ৰফীত টীম ইণ্ডিয়াত অন্তৰ্ভুক্ত নাছিল বুমৰাহ।