KKR vs SRH Live Score, IPL 2025: ইডেনত লজ্জাজনক আত্মসমৰ্পণ হায়দৰাবাদৰঃ ঘৰৰ মাটিত দুৰ্জয় ৰূপত কলকাতা

গৃহ ভূমিত কলকাতাৰ শক্তি প্ৰদৰ্শন

ছিজনত ক্ৰমাগত তৃতীয় পৰাজয়ৰ সন্মুখীন হৈছে যোৱাবাৰৰ ৰাণাৰ্ছ আপ ছানৰাইজাৰ্ছ হায়দৰাবাদ। ইডেনত অনুষ্ঠিত আজিৰ মেচত ঘৰুৱা দল কলকাতাই হায়দৰাবাদক সহজে ৮০ ৰানত পৰাস্ত কৰি ছিজনৰ দ্বিতীয় জয় লাভ কৰিছে। হায়দৰাবাদৰ ইনিংছৰ অন্তিমটো উইকেটৰ ৰূপত হৰ্ষল পেটেলক বিদায় দিয়ে ৰাছেলে।

দুই বলত দুই উইকেট বৰুণৰ

অধিনায়ক পেট কামিন্স আৰু চিমৰজিৎ সিঙক বিদায় দি হায়দৰাবাদৰ ইনিংছ চমু চপাইছে বৰুণ চক্ৰৱৰ্তীয়ে। এইদৰে তেওঁ হেট্ৰিকৰ সুযোগ লাভ কৰিছিল যদিও এই সুযোগ লোৱাত অলপৰ বাবে ব্যৰ্থ হয়।

ক্লাছেনৰো বিদায়

জয়ৰ আশা প্ৰায় নিৰ্বাচিত হৈছে হায়দৰাবাদৰ। দলটোৰ প্ৰধান ভৰসা হেনৰিখ ক্লাছেনো উভতিছে পেভিলিয়নলে। ইম্পেক্ট চাবৰ ৰূপত দললৈ অহা বৈভৱ আৰোৰাৰ হাতলৈ আহে ক্লাছেনৰ উইকেট।

বৰুণে বিদায় দিলে অনিকেতক

প্ৰায় পৰাজয়ৰ গৰাহত পৰিছে হায়দৰাবাদ। ২০১ ৰানৰ লক্ষ্য অনুসৰণ কৰি মাত্ৰ ৭৫ ৰানতে ৬টা উইকেট হেৰুৱাইছে দলটোৱে। অনিকেত বাৰ্মাক বিদায় দি মেচত নিজৰ প্ৰথমটো সফলতা লাভ কৰিছে বৰুণ চক্ৰৱৰ্তীয়ে।

নাৰাইণৰ চিকাৰ কামিণ্ডু

নিজৰ অভিষেক আই পি এল মেচত ২৭ ৰান সংগ্ৰহ কৰি বিদায় লৈছে কামিণ্ডু মেণ্ডিছে। সুনীল নাৰাইণৰ বলত অনুকুল ৰয়ৰ হাতত কেচ তুলি আউট লয় মেণ্ডিছ।

নীতিশো ব্যৰ্থ

১৫টা বলত ১৯ ৰান কৰি বিদায় লয় নীতিশ কুমাৰ ৰেড্ডীয়ে। নীতিশক বিদায় দিয়ে ৰাছেলে। ইফালে আই পি এল অভিষেক ঘটোৱা কামিণ্ডু মেণ্ডিছে কোনো ৰান নকৰোঁতেই জীৱনদান পোৱাৰ পিছত এতিয়া দৰ্শনীয় বেটিং কৰিছে।

বিপদত হায়দৰাবাদ

মাত্ৰ ২.১ অভাৰতে হায়দৰাবাদৰ শীৰ্ষক্ৰমৰ তিনগৰাকী বেটাৰক বিদায় দিছে কলকাতাই। প্ৰথম অভাৰত বৈভৱে হেডক বিদায় দিয়াৰ পিছত দ্বিতীয় অভাৰত হৰ্ষিতৰ চিকাৰ হয় অভিষেক। তৃতীয় অভাৰৰ প্ৰথমটো বলতে বৈভৱে বিদায় দিয়ে ঈশান কিষাণক।

ইম্পেক্ট বনাম ইম্পেক্টৰ যুঁজত বৈভৱৰ জয়

আৰম্ভণিতেই উজুটি খাইছে হায়দৰাবাদে। ইম্পেক্ট চাবৰ ৰূপত ক্ৰীজলৈ অহা ট্ৰেভিছ হেডে প্ৰথম বলতে এটা বাউণ্ডেৰী কোবোৱাৰ পিছতে দ্বিতীয় বলতো আক্ৰমণৰ চেষ্টাত হৰ্ষিত ৰাণাৰ হাতত কেচ দি বিদায় লয়। এইদৰে কলকাতাৰ ইম্পেক্ট চাব বৈভৱ আৰোৰাই আৰম্ভণিতেই পেলাইছে ইম্পেক্ট।

ক্ৰীজত হেড-অভিষেক

হায়দৰাবাদৰ হৈ ক্ৰীজলৈ আহিছে বিস্ফোৰক অপেনাৰদ্বয় ট্ৰেভিছ হেড আৰু অভিষেক শৰ্মা। আনহাতে কলকাতাৰ ইম্পেক্ট চাব বৈভৱ আৰোৰাই মুকলি কৰিছে বলিং।

হায়দৰাবাদৰ সমুখত ২০১ ৰানৰ লক্ষ্য

২০ অভাৰৰ অন্তত ৬উইকেট হেৰুৱাই ২০০ ৰান সংগ্ৰহ কৰিছে কলকাতা নাইট ৰাইডাৰ্ছে। ৰঘূবংশী, আয়াৰৰ অৰ্ধশতকৰ লগতে দলৰ ইনিংছত অধিনায়ক ৰাহানেই ৩৮ ৰান আৰু ৰিংকুৱে অপৰাজিত ৩২ ৰানৰ গুৰুত্বপূৰ্ণ অৱদান আগবঢ়ায়।

৬০ ৰান কৰি আউট আয়াৰ

মাত্ৰ ২৯টা বলত ৬০ ৰানৰ মাৰমুখী ইনিংছ খেলি অন্তিম অভাৰৰ তৃতীয় বলত বিদায় লৈছে ভেংকটেশ আয়াৰে। হৰ্ষল পেটেলৰ বলত আয়াৰে মৰা এটা শ্বটত বাউণ্ডেৰীত কেচ ধৰে অনিকেত বাৰ্মাই।

কামিন্সৰ খৰচী অভাৰ, আয়াৰৰ অৰ্ধশতক

বিস্ফোৰক বেটিঙেৰে পেট কামিন্সে কৰা ইনিংছৰ ১৯নং অভাৰত ৰানৰ বৰষুণ তুলিলে ভেংকটেশ আয়াৰে। অভাৰটোত মুঠ ৩টা চাৰি আৰু এটা ছয় কোবাই আয়াৰে আৰু অভাৰটোত মুঠ ২১ ৰান সংগ্ৰহ কৰে। এইদৰে মাত্ৰ ২৫টা বলতে আয়াৰে অৰ্ধশতক সম্পূৰ্ণ কৰে।

ৰিংকুৰ বাউণ্ডেৰীৰ হেট্ৰিক

প্ৰথম কেইখন মেচত ৰান সংগ্ৰহত ব্যৰ্থ হোৱা ৰিংকু সিঙৰ বেটত আজি আহিছে গুৰুত্বপূৰ্ণ ৰান। হৰ্ষল পেটেলে কৰা ইনিংছৰ ১৭ নং অভাৰত ৰিংকুৱে একেলগে ৩টাকৈ চাৰি কোবাই ফৰ্মলৈ অহাৰ ইংগিত দিছে।

অৰ্ধশতকৰ পিছতে বিদায় ৰঘূবংশীৰ

দৰ্শনীয় বেটিঙেৰে কলকাতাৰ ইনিংছত গতি দি অৰ্ধশতক সম্পূৰ্ণ কৰাৰ পিছতে বিদায় লৈছে যুৱ বেটাৰ অংকৃশ ৰঘূবংশীয়ে। কামিণ্ডু মেণ্ডিছৰ বলত ৰঘূবংশীয়ে তুলি দিয়া এক কঠিন কেচ দৰ্শনীয়ভাৱে আয়ত্ব কৰে হৰ্ষল পেটেলে। ৰঘূবংশীৰ বেটৰ পৰা আহে ৩২ বলত ৫০ ৰান।

অধিনায়ক ৰাহানেৰ বিদায়, জিছানৰ সাফল্য

প্ৰাৰম্ভিক বিপৰ্যয়ৰ পৰা দলক উদ্ধাৰ কৰি এক সুন্দৰ ইনিংছ খেলি বিদায় লৈছে অধিনায়ক আজিংক্যা ৰাহানেই। যুৱ স্পিনাৰ জিছান আনচাৰীৰ বলত উইকেটকীপাৰ ক্লাছেনৰ হাতত কেচ দি ৰাহানেই বিদায় লয়। ৰাহানেৰ বেটৰ পৰা আহে ৩৮ ৰান।

পাৱাৰ প্লে’ৰ অন্তত কলকাতাৰ সংগ্ৰহ ৫৩ ৰান

কলকাতাৰ ইনিংছৰ প্ৰথম ৬ অভাৰ, অৰ্থাৎ পাৱাৰ প্লে’ৰ অন্ত পৰিছে। পাৱাৰ প্লে’ত কলকাতাই দুই অপেনাৰক আৰম্ভণিতেই হেৰুৱাইছিল যদিও অধিনায়ক ৰাহানে আৰু অংকৃশ ৰঘূবংশীয়ে দলৰ ইনিংছ আগুৱাই নিছে। দুয়োৰে প্ৰচেষ্টাত কলকাতাই ছয় অভাৰত ৫৩ ৰান সংগ্ৰহ কৰিছে।

নাৰাইণক বিদায় দিলে ছামিয়ে

ঘৰুৱা ক্ৰিকেটত পশ্চিম বংগক প্ৰতিনিধিত্ব কৰা মহম্মদ ছামিয়ে ঘৰুৱা দৰ্শকৰ সমুখত লাভ কৰিছে সফলতা। নিজ স্পেলৰ দ্বিতীয় অভাৰত ছামিয়ে বিদায় দিয়ে সুনীল নাৰাইণক।

কামিন্সে বিদায় দিলে ক’কক

ইনিংছৰ দ্বিতীয় অভাৰতে আঘাত সহ্য কৰিবলগা হৈছে ঘৰুৱা দল কলকাতাই। হায়দৰাবাদৰ অধিনায়ক পেট কামিন্সে কৰা অভাৰটোৰ পঞ্চম বলত জিছানৰ হাতত কেচ দি বিদায় লয় কুইণ্টন ডি ক’লে।

ছিক্সাৰেৰে কামিন্সক আদৰিলে নাৰাইণে

কলকাতাৰ ইনিংছত প্ৰথমটো ছয় আহিছে সুনীল নাৰাইণৰ বেটৰ পৰা। হায়দৰাবাদৰ অধিনায়ক পেট কামিন্সে কৰা নিজ স্পেলৰ প্ৰথমটো বলতে নাৰাইণে কোবায় এটা বৃহৎ ছয়।

ক্ৰীজত ক’ক-নাৰাইণ, ছামিৰ হাতত বল

কলকাতাৰ হৈ ইনিংছ মুকলি কৰিবলৈ ক্ৰীজলৈ আহিছে কুইণ্টন ডি ক’ক আৰু সুনীল নাৰাইণ। আনহাতে ‘লোকেল বয়’ মহম্মদ ছামিয়ে আৰম্ভ কৰিছে হায়দৰাবাদৰ বলিং।

গৃহভূমিত কলকাতাক পৰাস্ত কৰিবলৈ সাজু হায়দৰাবাদ

বিগত বাৰৰ আই পি এলৰ ফাইনেলত হায়দৰাবাদক পৰাস্ত কৰিয়েই কলকাতাই খিতাপ জয় কৰিছিল। আজি ইডেনতে কলকাতাৰ বিপক্ষে এই পৰাজয়ৰ পোতক তুলিবলৈ সাজু হৈছে ছানৰাইজাৰ্ছ হায়দৰাবাদ।

“𝙒𝙚 𝙠𝙣𝙤𝙬 𝙤𝙪𝙧 𝙨𝙠𝙞𝙡𝙡 𝙨𝙚𝙩𝙨. 𝙒𝙚’𝙡𝙡 𝙨𝙩𝙞𝙘𝙠 𝙩𝙤 𝙤𝙪𝙧 𝙗𝙖𝙨𝙞𝙘𝙨.”#PlayWithFire | #KKRvSRH | #TATAIPL2025 pic.twitter.com/21E4Nwxbu1

— SunRisers Hyderabad (@SunRisers) April 3, 2025

ছানৰাইজাৰ্ছ হায়দৰাবাদৰ মূল একাদশ

আজি আই পি এলত অভিষেক ঘটিব শ্ৰীলংকাৰ কামিন্দু মেণ্ডিছৰ। ছানৰাইজাৰ্ছ হায়দৰাবাদৰ মূল একাদশত আজি দেখা যাব অভিষেক শৰ্মা, ঈশান কিষাণ, নীতিশ কুমাৰ ৰেড্ডী, অনিকেত বাৰ্মা, হেনৰিখ ক্লাছেন, কামিন্দু মেণ্ডিছ, চিমৰজিৎ সিং, পেট কামিন্স (অধিনায়ক), হৰ্ষল পেটেল, মহম্মদ ছামি, জিছান আনচাৰী।

কলকাতা নাইট ৰাইডাৰ্ছৰ মূল একাদশ

ইডেনৰ ঘৰুৱা দৰ্শকৰ সমুখত কলকাতা নাইট ৰাইডাৰ্ছৰ মূল একাদশত আজি দেখা যাব কুইণ্টন ডি ক’ক, সুনীল নাৰাইণ, আজিংক্যা ৰাহানে (অধিনায়ক), ভেঙ্কটেশ আয়াৰ, ৰিংকু সিং, অংকৃশ ৰঘুবংশী, মঈন আলী, আন্দ্ৰে ৰাছেল, হৰ্ষিত ৰাণা, বৰুণ চক্ৰৱৰ্তী, ৰমনদীপ সিং।

টছত জয়ী হৈ কামিন্সৰ বলিঙৰ সিদ্ধান্ত

ইতিমধ্যে দুয়ো দলৰ দলৰ অধিনায়কদ্বয় পেট কামিন্স আৰু আজিংক্যা ৰাহানেৰ মাজত টছ হৈ গৈছে। টছত জয়ী হৈ ছানৰাইজাৰ্ছ হায়দৰাবাদৰ অধিনায়ক পেট কামিন্সে প্ৰথমে বলিং কৰাৰ সিদ্ধান্ত লৈছে।

দুয়ো দলৰ পূৰ্বৰ ৰেকৰ্ড

এইপৰ্যন্ত আই পি এলত কলকাতা নাইট ৰাইডাৰ্ছ আৰু ছানৰাইজাৰ্ছ হায়দৰাবাদ ২৮খন মেচত মুখামুখি হৈছে। ইয়াৰে ১৯ খন মেচতে জয়েৰে একপ্ৰকাৰে হায়দৰাবাদৰ ওপৰত আধিপত্য বিস্তাৰ কৰিছে কলকাতাই। আনহাতে দুয়ো দলৰ মুখামুখিত মাত্ৰ ৯খন মেচত জয়ী হৈছে হায়দৰাবাদ। লক্ষণীয়ভাৱে ২০২০ চনৰ পৰা হায়দৰাবাদৰ বিৰুদ্ধে কলকাতাই ১১খন খেলৰ ভিতৰত ৯ খনতে জয়লাভ কৰিছে।