LSG vs MI Live Score, IPL 2025: লক্ষ্যত নিখুঁত আঘাত ‘লৰ্ড শ্বাৰ্দুল’, আভেশৰঃ একনাত পুনৰ এবাৰ ব্যৰ্থতাৰে শিৰনত মুম্বাইৰ

এটা সময়ত মেচৰ প্ৰায় জয়ৰ কাষ চাপিলেও অন্তিম সময় লক্ষ্ণৌৰ দুৰন্ত প্ৰত্যাৱৰ্তনৰ ফলত একনাত তৃতীয়বাৰৰ বাবে পৰাজয়ৰ সন্মুখীন হৈছে মুম্বাই ইণ্ডিয়ানছ। অন্তিম অভাৰত দলটোক জয়ৰ বাবে ২২ ৰানৰ প্ৰয়োজন হৈছিল যদিও আভেশ খানে মাত্ৰ ৯ ৰানহে খৰচ কৰে আৰু দলক ১২ ৰানত জয়ী কৰায়।

ইনিংছৰ গুৰুত্বপূৰ্ণ ১৯ নং অভাৰত চমপ্ৰদ বলিং কৰে শ্বাৰ্দুল ঠাকুৰে। অভাৰটোত মাত্ৰ ৭ ৰান খৰচ কৰি শ্বাৰ্দুলে মুম্বাইক প্ৰায় শলঠেকত পেলাইছে। অন্তিম অভাৰত এতিয়া মুম্বাইক জয়ৰ বাবে ২২ ৰানৰ প্ৰয়োজন।

দায়িত্বশীল বেটিঙেৰে ৪৩ বলত ৬৭ ৰানৰ এক গুৰুত্বপূৰ্ণ ইনিংছ খেলি পেভিলিয়নলৈ উভতিছে সূৰ্যকুমাৰ যাদৱ। আভেশ খানৰ বলত এক বিশেষ শ্বট খেলাৰ চেষ্টাত ছামাদৰ হাতত তুলি দিয়ে সূৰ্যই।

শেহতীয়া কিছুদিন ধৰি ৰান সংগ্ৰহত ধাৰাবাহিকভাৱে ব্যৰ্থতাৰ সন্মুখীন হৈ অহা সূৰ্যকুমাৰ যাদৱে অৱশেষত ঘূৰাই পাইছে ফৰ্ম। লক্ষ্ণৌৰ বিপক্ষে আজি সূৰ্যই দায়িত্বশীল বেটিঙেৰে ৩১টা বলত অৰ্ধশতক সম্পূৰ্ণ কৰিছে।

১৩ অভাৰৰ সমাপ্তিলৈ মুম্বাই ইণ্ডিয়ানছে ৩ উইকেটৰ বিনিময়ত সংগ্ৰহ কৰিছে ১২৫ ৰান। হাতত ৭টা উইকেট বাকী থকা অৱস্থাত মুম্বাইক অন্তিম ৭ অভাৰত জয়ৰ বাবে ৭৯ ৰানৰ প্ৰয়োজন।

আৰম্ভণিতেই দুই উইকেট হেৰুৱালেও মুম্বাইৰ ইনিংছত ৰানৰ গতি খৰতকীয়া কৰি তুলিছিল নমন ধীৰে। পিছে দিগৱেশ সিং ৰাথীয়ে নমনক বিদায় দি তেওঁৰ আক্ৰমণাত্মক ইনিংছৰ অন্ত পেলায়। নমনৰ বেটৰ পৰা আহে ২৪ বলত ৪৬ ৰান।

পেভিলিয়নলৈ উভতিছে মুম্বাইৰ দুই অপেনাৰ। নিজ স্পেলৰ দ্বিতীয় অভাৰত শ্বাৰ্দুল ঠাকুৰে বিদায় দিয়ে ৰিয়ান ৰিকেল্টনক।

লক্ষ্ণৌৰ হৈ অভিষেক মেচত বল হাতত লৈ প্ৰথম অভাৰতে সফলতা লাভ কৰিছে আকাশ দীপে। মুম্বাইৰ অপেনাৰৰ দায়িত্ব লাভ কৰা জেকছক বিদায় দি আকাশ দীপে ঘৰুৱা দলক প্ৰথমটো সফলতা দিয়ে।

ৰোহিত শৰ্মাৰ অনুপস্থিতিৰ বাবে আজি মুম্বাইৰ অপেনিং যুটিত পৰিৱৰ্তন দেখা গৈছে। আজি ৰিকেল্টনৰ সৈতে অপেনিং কৰিবলৈ ক্ৰীজলৈ আহিছে উইল জেকছ। আনহাতে শ্বাৰ্দুল ঠাকুৰে লক্ষ্ণৌৰ বলিং মুকলি কৰিছে।

চমকপ্ৰদ স্পেলেৰে লক্ষ্ণৌৰ ইনিংছৰ ৫টা উইকেট দখল কৰিছে মুম্বাইৰ অধিনায়ক হাৰ্দিক পাণ্ডিয়াই। অৱশ্যে ইয়াৰ পিছতো লক্ষ্ণৌৱে ২০৩ ৰানৰ এক শক্তিশালী স্ক’ৰ থিয় কৰাইছে মুম্বাইৰ সমুখত।

অন্তিম অভাৰ বলিং কৰিবলৈ আহি প্ৰথম তিনিটা বলত কিছু ৰান খৰচ কৰিলেও পৰৱৰ্তী দুটা বলত ক্ৰমে মিলাৰ আৰু আকাশ দীপক বিদায় নিজ স্পেলত ৫টা উইকেটৰ কৃতিত্ব অৰ্জন কৰিছে অধিনায়ক হাৰ্দিক পাণ্ডিয়াই।

ৰানৰ গতি খৰতকীয়া কৰাৰ চেষ্টাত নিজৰ উইকেট তুলি দিছে আব্দুল ছামাদে। ব’ল্টৰ বলত বাউণ্ডেৰী সংগ্ৰহৰ চেষ্টাত ছামাদে নমন ধীৰৰ হাতত কেচ তুলি দিয়ে।

অধিনায়কোচিত বলিং প্ৰদৰ্শনেৰে উজলিছে হাৰ্দিক পাণ্ডিয়া। মাৰ্ক্ৰামৰ ৰূপত পাণ্ডিয়াই মেচৰ তৃতীয়টো উইকেট লাভ কৰিছে। দৰ্শনীয় বেটিঙেৰে মাৰ্ক্ৰামে ৩৮টা বলত ৫৩ ৰান সংগ্ৰহ কৰে।

প্ৰথম কেইখন মেচত ব্যৰ্থ হ’লেও আজি বেটত ৰান ঘূৰাই পাইছে এইডেন মাৰ্ক্ৰামে। ক্ৰীজত খোপনি পুতি মাৰ্ক্ৰামে দলৰ ইনিংছ আগুৱাই নিছে। মাৰ্ক্ৰামে ৩৪টা বলত চলিত ছিজনত নিজৰ প্ৰথমটো অৰ্ধশতক পূৰ কৰে।

কলকাতাৰ বিপক্ষে মুম্বাইৰ জয়ৰ নায়ক অশ্বনী কুমাৰ আজি কিছু খৰচী বিবেচিত হৈছে যদিও অৱশেষত লাভ কৰিছে সফলতাও। লক্ষ্ণৌৰ ইনিংছ আগুৱাই নিয়া মাৰ্ক্ৰাম-বাদনীৰ যুটি ভংগ কৰিছে অশ্বনীয়ে। ৩০ ৰান সংগ্ৰহ কৰি আউট হৈছে বাদনী।

লক্ষ্ণৌৰ ইনিংছক গতি প্ৰদান কৰিছে এইডেন মাৰ্ক্ৰাম আৰু আয়ুস বাদনীয়ে। দুয়ো আক্ৰমণাত্মক বেটিঙেৰে ১৫.১ অভাৰত দলৰ স্ক’ৰ ১৫০ৰ ওপৰলৈ লৈ গৈছে।

আই পি এল ইতিহাসৰ আটাইতকৈ দামী খেলুৱৈ ঋষভ পণ্ট পুনৰ এবাৰ ব্যৰ্থ হৈছে। হাৰ্দিক পাণ্ডিয়াৰ এটা শ্ল’ৱাৰ বলৰ ফান্দত ভৰি দি মাত্ৰ ২ ৰান কৰিয়েই ক্ৰীজ এৰে পণ্ট।

মাত্ৰ ৯.৫ অভাৰতে লক্ষ্ণৌ চুপাৰ জায়েণ্টছৰ ইনিংছত শতক সম্পূৰ্ণ হৈছে, হেৰুৱাইছে দুটা উইকেট। হাতত এতিয়াও ৮টা উইকেট থকা অৱস্থাত লক্ষ্ণৌৱে এক বৃহৎ স্ক’ৰ থিয় কৰাৰ সম্ভাৱনা আছে।

অধিনায়ক হাৰ্দিক পাণ্ডিয়াই নিজৰ প্ৰথমটো অভাৰতে লাভ কৰিছে সফলতা। লক্ষ্ণৌৰ বেটিং বিভাগৰ অন্যতম প্ৰধান হোতা নিকোলাচ পুৰাণক বিদায় দিছে পাণ্ডিয়াই।

আক্ৰমণাত্মক বেটিঙেৰে দলক এক সবল আৰম্ভণি দিয়াৰ পিছত ৩১বলত ৬০ ৰান কৰি বিদায় লৈছে মিচেল মাৰ্শ্বে। যুৱ স্পিনাৰ ভিগনেশ পুথুৰে নিজৰ প্ৰথমটো অভাৰতে মাৰ্শ্বক বিদায় দি মুম্বাইক একপ্ৰকাৰে সকাহ প্ৰদান কৰিছে।

মুম্বাইৰ বলিং আক্ৰমণক বিপৰ্যস্ত কৰি বিস্ফোৰক বেটিঙেৰে মাত্ৰ ২৭টা বলতে অৰ্ধশতক সম্পূৰ্ণ কৰিছে মিচেল মাৰ্শ্বে। লক্ষণীয়ভাৱে মাৰ্শ্বৰ অৰ্ধশতকৰ সময়ত দলৰ সামগ্ৰিক স্ক’ৰ আছিল ৫৮ ৰান।

আৰম্ভণিৰ পৰাই আক্ৰমণাত্মক বেটিং শৈলী গ্ৰহণ কৰি মুম্বাইৰ বলিং আক্ৰমণক বিপদত পেলাইছে মিচেল মাৰ্শ্বে। মাৰ্শ্বৰ বেটিং বিক্ৰমৰ সুবাদতে ৫.১ অভাৰতে লক্ষ্ণৌৰ স্ক’ৰ ৫০ ৰ পাৰ হৈছে।

লক্ষ্ণৌৰ হৈ ইনিংছ মুকলি কৰিবলৈ ক্ৰীজলৈ আহিছে মিচেল মাৰ্শ্ব আৰু এইডেন মাৰ্ক্ৰাম। আনহাতে ট্ৰেণ্ট ব’ল্টে মুম্বাইৰ হৈ আৰম্ভ কৰিছে বলিং।

মুম্বাই ইণ্ডিয়ানছৰ মূল একাদশত থাকিব উইল জেকছ, ৰিয়ান ৰিকেল্টন, সূৰ্যকুমাৰ যাদৱ, হাৰ্দিক পাণ্ডিয়া (অধিনায়ক), নমন ধীৰ, ৰাজ বাৱা, মিচেল চেণ্টনাৰ, ট্ৰেণ্ট ব’ল্ট, অশ্বনি কুমাৰ, দীপক চাহাৰ, ভিগনেশ পুথুৰ।

লক্ষ্ণৌ চুপাৰ জায়েণ্টছৰ মূল একাদশত আজি থাকিব এইডেন মাৰ্ক্ৰাম, মিচেল মাৰ্শ্ব, নিকোলাছ পুৰাণ, ঋষভ পণ্ট (অধিনায়ক), আয়ুস বাদনি, ডেভিদ মিলাৰ, আব্দুল ছামাদ, শ্বাৰ্দুল ঠাকুৰ, দিগৱেশ সিং ৰাথী, আকাশ দীপ, আভেশ খান।

ইতিমধ্যেই দুয়োটি দলৰ অধিনায়কদ্বয়ৰ মাজত টছ হৈ গৈছে। টছত জয়ী হৈ মুম্বাইৰ অধিনায়ক হাৰ্দিক পাণ্ডিয়াই প্ৰথমে ফিল্ডিং কৰাৰ সিদ্ধান্ত গ্ৰহণ কৰিছে। অৰ্থাৎ ঘৰুৱা দল লক্ষ্ণৌৱে প্ৰথমে বেটিং কৰিব।

এই পৰ্যন্ত লক্ষ্ণৌ চুপাৰ জায়েণ্টছ আৰু মুম্বাই ইণ্ডিয়ানছৰ মাজত ৬খন মেচ অনুষ্ঠিত হৈছে। ইয়াৰে ৫খন মেচতে জয়লাভ কৰি মুম্বাইৰ বিপক্ষে প্ৰায় আধিপত্য বিস্তাৰ কৰিছে লক্ষ্ণৌৱে। আনহাতে মুম্বাইয়ে মাত্ৰ ১খন মেচত জয়ৰ মুখ দেখিছে।