জয় শ্বাহে হেৰুৱালে চকী, ক্ষমতাত পাকিস্তানৰ নাকভিঃ বিপদত পৰিব নেকি বিচিচিআই!
পাকিস্তান ক্ৰিকেট ব’ৰ্ডৰ অধ্যক্ষ মহছিন নাকভিয়ে লাভ কৰিছে এক গুৰুত্বপূৰ্ণ আসন। বিচিচিআইৰ প্ৰাক্তন সচিব জয় শ্বাহৰ স্থানত এই আসনত অধিষ্ঠিত হৈছে নাকভি। পাকিস্তান ক্ৰিকেটৰ বাবে এয়া আশাৰ খবৰ হিচাপে বিবেচিত হ’লেও এই খবৰে ভাৰতীয় ক্ৰিকেটলৈ কিছু শংকা নমাব পাৰে বুলিও চৰ্চা চলিছে।
ক্ৰিকেট বিশ্বত এতিয়া বিচিচিআইৰ শক্তিৰ কথা সকলোৱেই জ্ঞাত। আইচিচিৰ যিকোনো সিদ্ধান্তৰ ক্ষেত্ৰত বিশ্বৰ আটাইতকৈ ধনাঢ্য তথা শক্তিশালী ক্ৰিকেট ব’ৰ্ড বিচিচিআইৰ থাকে বিশেষ ভূমিকা। সেয়া বিগত সময়ছোৱাত প্ৰায় মুকলি হৈ পৰিছে। ইফালে বিচিচিআইৰ পূৰ্ব সচিব জয় শ্বাহ ক্ৰিকেটৰ সৰ্বোচ্চ সংস্থা আইচিচিৰ অধ্যক্ষ হিচাপে নিৰ্বাচিত হোৱাৰ পিছত ভাৰতীয় ব’ৰ্ডৰ শক্তি অধিক বৃদ্ধি পাব বুলি সকলোৱে ধাৰণা কৰিছে। আনফালে খেলপথাৰত ভাৰতীয় ক্ৰিকেট দলৰ শ্ৰেষ্ঠতাৰ কথা পুনৰাই নকলেও হ’ব।
তাৰ বিপৰীতে ভাৰতৰ চুবুৰীয়া পাকিস্তানে ক্ৰিকেটৰ ক্ষেত্ৰত শেহতীয়াকৈ দেখিছে কেৱল ব্যৰ্থতা। এফালে খেলপথাৰত ধাৰাবাহিক পৰাজয় আৰু আনফালে চেম্পিয়নছ ট্ৰফী আয়োজনৰ ক্ষেত্ৰতো বিচিচিআইৰ সিদ্ধান্তৰ ওচৰত অনিচ্ছাসত্বেও সেও মানিছিল পাকিস্তান ক্ৰিকেট ব’ৰ্ড, চমুকৈ পিচিবি। তাৰ মাজতে পিছে পাকিস্তান ক্ৰিকেটে লাভ কৰিছে এক ভাল খবৰ। সমান্তৰালকৈ এই খবৰে ভাৰতীয় ক্ৰিকেটলৈ কিছু শংকা নমাব পাৰে বুলিও চৰ্চা চলিছে।
পাকিস্তান ক্ৰিকেট ব’ৰ্ডৰ অধ্যক্ষ মহছিন নাকভিয়ে লাভ কৰিছে এক গুৰুত্বপূৰ্ণ আসন। পিচিবিৰ অধ্যক্ষ পদৰ লগতে এতিয়া এছিয়ান ক্ৰিকেট কাউঞ্চিলৰ অধ্যক্ষ হিচাপেও নিৰ্বাচিত হৈছে নাকভি। ইয়াৰ পূৰ্বে ইয়াৰ জয় শ্বাহে এছিয়ান ক্ৰিকেট কাউঞ্চিলৰ মুৰব্বী হিচাপে দায়িত্বত আছিল যদিও তেওঁ ইতিমধ্যে আইচিচিৰ অধ্যক্ষ পদ গ্ৰহণ কৰিছে। গতিকে জয় শ্বাহৰ স্থানত এতিয়া নাকভিয়ে এই দায়িত্ব বহন কৰিব।
লক্ষণীয়ভাৱে চলিত বৰ্ষতে ভাৰতত এছিয়া কাপ অনুষ্ঠিত হ’ব আৰু এই প্ৰতিযোগিতাৰ পূৰ্বে নাকভিয়ে এছিয়ান ক্ৰিকেট কাউঞ্চিলৰ মুৰব্বী হিচাপে দায়িত্ব লাভ কৰাক লৈ বিশেষ চৰ্চা চলিছে। এইবাৰ এছিয়া কাপ টি-২০ ফৰ্মেটত অনুষ্ঠিত হ’ব আৰু ভাৰত-পাকিস্তানকে ধৰি মুঠ ৬ টা দলে এই প্ৰতিযোগিতাত অংশগ্ৰহণ কৰিব। পিছে এই প্ৰতিযোগিতাৰ বাবে পাকিস্তান ক্ৰিকেট দলে ভাৰত ভ্ৰমণ নকৰে।
শেহতীয়াকৈ আইচিচিৰ এক অন্যতম মূল ইভেণ্ট চেম্পিয়নছ ট্ৰফী পাকিস্তানে আয়োজন কৰিছিল। কিন্তু পাকিস্তানত প্ৰতিযোগিতাখন খেলিবলৈ অস্বীকাৰ কৰিছিল বিচিচিআইয়ে। ইয়াৰ পিছতে আইচিচিয়ে প্ৰতিযোগিতাত ভাৰতীয় দলৰ সকলো মেচ ডুবাইত অনুষ্ঠিত কৰাৰ সিদ্ধান্ত লৈছিল। এনে পৰিস্থিতিত চেম্পিয়নছ ট্ৰফীৰ ফাইনেলো পাকিস্তানৰ পৰা ডুবাইলৈ স্থানান্তৰিত কৰিবলগা হৈছিল।
বিচিচিআইৰ এই স্থিতিয়ে স্বাভাৱিকতেই ক্ষুণ্ণ কৰিছিল পাকিস্তান ক্ৰিকেট ব’ৰ্ডক। এতিয়া সেয়ে পিচিবিয়েও যিকোনো প্ৰতিযোগতাৰ বাবে ভাৰতলৈ পাকিস্তান দল প্ৰেৰণ নকৰে আৰু আগন্তুক এছিয়া কাপতে এই পদক্ষেপ দেখা পোৱা যাব। এতিয়া মহচিন নাকভিয়ে এছিয়ান ক্ৰিকেট কাউঞ্চিলৰ অধ্যক্ষৰ আসন লাভ কৰাৰ পিছত নিজ স্থিতিৰ ক্ষেত্ৰত নিশ্চিতভাৱে মনোবল বৃদ্ধি পাব পাকিস্তান ক্ৰিকেট ব’ৰ্ডৰ।
