R Ashwin Net Worth: আন্নাৰ অৱসৰ! ১৪ বছৰীয়া আন্তঃৰাষ্ট্ৰীয় কেৰিয়াৰত কিমান টকা উপাৰ্জন কৰিলে আৰ অশ্বিনে?

কিমান সম্পত্তি আছে অশ্বিনৰ?

আজিৰ দিনটোত আহিল ক্ৰিকেট অনুৰাগীক শোকাহত কৰা দুঃবৰটো। গাব্বা টেষ্ট শেষ হোৱাৰ পিছত আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰে টীম ইণ্ডিয়াৰ কিংবদন্তি স্পিনাৰ ৰবিচন্দ্ৰন অশ্বিনে । ব্রিজবেনত অষ্ট্ৰেলিয়াৰ বিৰুদ্ধে ভাৰতে ৪ র্থ টেষ্টত ড্ৰ’ কৰাৰ কিছু সময়ৰ পাছতে নিজৰ সিদ্ধান্তৰ বিষয়ে অৱগত কৰে ৩৮ বছৰীয়া অশ্বিনে।এতিয়াৰে পৰা কেতিয়াও টীম ইণ্ডিয়াৰ জাৰ্চীত দেখা নাযাব অশ্বিনক। স্মৰণীয় ক্ৰিকেট কেৰিয়াৰৰ সমাপ্তি ঘটালে অশ্বিনে। সমগ্ৰ বিশ্বৰ ক্ৰিকেট অনুৰাগীসকলে অশ্বিনৰ অভিলেখৰ সৈতে পৰিচিত। অশ্বিনৰ অৱসৰৰ মাজত আমি আপোনাক ক’বলৈ ওলাইছোঁ যে কিংবদন্তি স্পিনাৰগৰাকী কিমান সম্পত্তিৰ গৰাকী? এই প্ৰতিবেদনৰ জড়িয়তে জানক ক্ৰিকেটাৰগৰাকীৰ সম্পত্তিৰ মুঠ মুঠ মূল্য কিমান আৰু কিমান কোটি ঘৰত বাস কৰে?

অশ্বিনে তিনিওটা ফৰ্মেটতে টীম ইণ্ডিয়াক প্ৰতিনিধিত্ব কৰিছিল। কিন্তু টেষ্ট ক্ৰিকেটত তেওঁৰ প্ৰদৰ্শন শ্ৰেষ্ঠ আছিল। টীম ইণ্ডিয়াৰ হৈ তেওঁ টেষ্টত ৫০০ৰো অধিক উইকেট দখল কৰে। ক্ৰিকেট খেলপথাৰত যথেষ্ট নাম অৰ্জন কৰাৰ সমান্তৰালভাৱে ধনো অৰ্জন কৰিছে। তেওঁৰ সম্পত্তি ১০০ কোটিতকৈও অধিক। সংবাদ মাধ্যমৰ প্ৰতিবেদন অনুসৰি, অশ্বিনৰ ১২৩ কোটি টকাৰ সম্পত্তি আছে।

অশ্বিনৰ উপাৰ্জনৰ উৎস

ক্ৰিকেটৰ উপৰিও, ৰবিচন্দ্ৰন অশ্বিনেও বিজ্ঞাপনৰ পৰা যথেষ্ট উপাৰ্জন কৰে। তেওঁ বিচিচিআইৰ এগৰাকী এ গ্ৰেড খেলুৱৈ। তেওঁ বিচিচিআইৰ পৰা প্ৰতি বছৰে ৫ কোটি টকা লাভ কৰে। আনহাতে অশ্বিনে ইণ্ডিয়ান প্ৰিমিয়াৰ লীগৰ (আই পি এল) পৰাও যথেষ্ট উপাৰ্জন কৰে। অশ্বিনে স্পেচমেকাৰ, কোকো ষ্টুডিঅ’ তামিল, বোম্বে শ্বেভিং কোম্পানী, মান্না ফুডছ, এৰিষ্টোক্ৰেট বেগ, মিন্ট্ৰা, অপ্পো, মুভ আৰু ড্ৰীম 11-ৰ বিজ্ঞাপনৰ পৰাও কোটি কোটি উপাৰ্জন কৰে।

অশ্বিনৰ বাসগৃহ

এক বিলাসী জীৱন যাপন কৰে ৰবিচন্দ্ৰন অশ্বিনে । ১৯৮৬ চনৰ ১৭ ছেপ্টেম্বৰত জন্ম গ্ৰহণ কৰা অশ্বিনে পৰিয়ালৰ সৈতে এটা ৰাজকীয় ঘৰত বাস কৰে । অশ্বিনে চেন্নাইৰ বাস কৰা ঘৰটোৰ মূল্য ৯ কোটি টকা।

‘আন্না’ৰ ওচৰত আছে বিলাসী বাহন

ৰবিচন্দ্ৰন অশ্বিন, যাক ‘আন্না’ বুলিও জনা যায়। বিলাসী বাহনৰ প্ৰতিও আকৰ্ষণ আছে অশ্বিনৰ। তেওঁৰ ওচৰত আছে বিলাসী ব্ৰেণ্ডৰ বাহন । তেওঁৰ কাৰ কালেকচনৰ ভিতৰত আছে অডি কিউ7 এছইউভি, যাৰ মূল্য ভাৰতীয় বজাৰত ৮৭ লাখৰ পৰা ৯৫ লাখ টকাৰ ভিতৰত। ইয়াৰ উপৰিও তেওঁৰ ওচৰত ৰোলছ ৰয়েছ বাহনো আছে। এই বাহনখনৰ মূল্য প্ৰায় ৬ কোটি টকা বুলি কোৱা হৈছে।