ফেচবুক আৰু ইনষ্টাগ্ৰাম ব্যৱহাৰ কৰিবলৈ ভৰিব লাগিব নেকি ধন? মেটাৰ নতুন নিয়ম জানক

বিশ্বৰ প্ৰায় সকলো লোকে ফেচবুক আৰু ইনষ্টাগ্ৰাম ব্যৱহাৰ কৰে। সমগ্ৰ বিশ্বৰ বহু লোকে এই প্লেটফৰ্মৰ পৰা ধন উপাৰ্জন কৰি আছে। কিন্তু এতিয়া মেটাই এই দুয়োটা প্লেটফৰ্ম ব্যৱহাৰ কৰাৰ বাবে ব্যৱহাৰকাৰীৰ পৰা মাহিলী চাৰ্জ বিচাৰিব পাৰে। এতিয়ালৈকে ভাৰতত এইবোৰ ব্যৱহাৰ কৰাৰ বাবে কোনো ধৰণৰ চাৰ্জ লোৱা হোৱা নাই। কিন্তু এতিয়া মেটাই নতুন নীতি অনাৰ কথা চিন্তা-চৰ্চা কৰিছে। ফেচবুক আৰু ইনষ্টাগ্ৰাম ব্যৱহাৰ কৰিবলৈ আপুনিও ধন পৰিশোধ কৰিব লাগিব পাৰে। যিসকলে ইনষ্টাগ্ৰাম আৰু ফেচবুকত বিজ্ঞাপন চাব নিবিচাৰে তেওঁলোকে ইয়াৰ বাবে চাবস্ক্ৰিপচন ল’ব লাগিব। ইয়াৰ পিছত আপুনি ফেচবুক আৰু ইনষ্টাগ্ৰামত বিজ্ঞাপন চাব নালাগিব।

ব্ৰিটেইনত বাস কৰা ব্যৱহাৰকাৰীসকলৰ বাবে মেটাই চাবস্ক্ৰিপচন মডেল প্ৰৱৰ্তনৰ পৰিকল্পনা কৰিছে। এই নতুন নীতি সেইসকল ব্যৱহাৰকাৰীৰ বাবে যিসকলে ফিডত বিজ্ঞাপন চাবলৈ ভাল নাপায়। প্ৰতিবেদন অনুসৰি মেটাই ইতিমধ্যে ইউৰোপীয় সংঘত (EU) বিজ্ঞাপন মুক্ত সদস্যপদৰ অফাৰ আগবঢ়াইছে। এনে পৰিস্থিতিত এতিয়া কোম্পানীটোৱে ব্ৰিটেইনতো বিজ্ঞাপন মুক্ত চাবস্ক্ৰিপচন সেৱা আৰম্ভ কৰাৰ প্ৰস্তুতি চলাইছে।

মেটাই কিয় এই সিদ্ধান্ত লৈছে?

মেটাৰ এই সিদ্ধান্ত আইনী বিষয়ৰ সৈতে জড়িত। ব্ৰিটেইনত বাস কৰা ব্যক্তিসকলক ব্যক্তিগত বিজ্ঞাপন দেখুওৱা বন্ধ কৰিবলৈ সন্মত হৈছিল কোম্পানীটোৱে। লণ্ডন উচ্চ ন্যায়ালয়ত  হৈছিল এই গোচৰৰ শুনানি । এই বিষয়ৰ পৰা হাত সাৰিবলৈ মেটাই এই গোচৰত সন্মতি দিছিল।

মানৱ অধিকাৰ কৰ্মী টানিয়া অ’কেৰেলে ২০২২ চনত মেটাৰ বিৰুদ্ধে ১.৫ ট্ৰিলিয়ন ডলাৰ (প্ৰায় ১২.৮ লাখ কোটি টকা)ৰ গোচৰ ৰুজু কৰিছিল।টানিয়াই মেটাৰ বিৰুদ্ধে অভিযোগ কৰিছিল যে, কোম্পানীটোৱে তেওঁৰ ব্যক্তিগত তথ্য সংৰক্ষণ কৰি ব্ৰিটেইনৰ ডাটা আইন উলংঘা কৰিছে। তেওঁলোকৰ তথ্য চুৰি কৰি বিজ্ঞাপন দেখুওৱা হৈছে। ব্ৰিটেইনৰ ডাটা প্ৰটেকচন অথৰিটিয়ে টানিয়াৰ গোচৰটোক সমৰ্থন কৰি স্পষ্ট কৰি দিলে যে, অনলাইন টাৰ্গেটেড এডৰ বিৰুদ্ধে যাব বিচৰাসকলক তেওঁলোকে সমৰ্থন কৰিব।

মেটাই ২০২৩ চনত ইউৰোপীয় সংঘত EU) মুক্ত চাবস্ক্ৰিপচন সেৱা আৰম্ভ কৰিছিল। এই সেৱা অনাৰ আঁৰৰ মেটাৰ একমাত্ৰ উদ্দেশ্য আছিল সাধাৰণ তথ্য সুৰক্ষা নিয়ন্ত্ৰণ (GDPR) আৰু ডিজিটেল বজাৰ আইন (DMA)ৰ দৰে নিয়ম মানি চলা। ২০২৪ চনত মেটাই চাবস্ক্ৰিপচন সেৱাৰ চাৰ্জ ৪০ শতাংশ হ্ৰাস কৰিছিল। ৱেবত মাহিলী সদস্যপদৰ মাচুল €5.99( প্ৰায় ৫৫৪ টকা)। আই অ’ এছ আৰু এণ্ড্ৰইডত মাহিলী মাচুল ৭.৯৯ ইউৰো (প্ৰায় ৭৩৯ টকা)লৈ হ্ৰাস কৰা হৈছে।