বজাৰলৈ আহিবলৈ সাজু চেমচাং Galaxy S25: প্ৰথম দিনাই লাভ কৰিব এনে বৃ্হৎ অফাৰ

মোবাইলৰ বজাৰত বিশেষ আদৰ আছে বিশ্বৰ আগশাৰীৰ কোম্পানী চেমচাঙৰ গেলেক্সী এছ (Galaxy S) ছিৰিজৰ। এই মোবাইলটোৰ প্ৰতি বিশ্বজুৰি গ্ৰাহকৰ বিশেষ আকৰ্ষণ পৰিলক্ষিত হয়। সেয়ে এই ছিৰিজৰ নতুন সংস্কৰণ মুকলিৰ লগে লগে বজাৰত যথেষ্ট সমাদৰ লাভ কৰা দেখা যায়। শীঘ্ৰেই চেমচাঙৰ এই ছিৰিজৰ নতুন মডেল Galaxy S25 বজাৰলৈ আহিব। অহা ২২ জানুৱাৰীত গেলেক্সী আনপেকড ইভেণ্টত মুকলি কৰা হ’ব এই নতুন মডেলটো। নতুন এই মোবাইলটোৰ আগমনলৈ বাট চাইছে সকলোৱে। এই মোবাইলটোৰ বাবে চেমচাঙে প্ৰি-ৰিজাৰ্ভেচন আৰম্ভ কৰিছে।

চেমচাঙৰ মোবাইলৰ প্ৰতি আগ্ৰহী যিসকল গ্ৰাহকে এই নতুন মোবাইলটো ক্ৰয় কৰিব বিচাৰে, তেওঁলোকে কোম্পানীটোৰ অফিচিয়েল ৱেবছাইটৰ পৰা আগতীয়াকৈ বুকিং কৰিব পাৰিব। লক্ষণীয়ভাৱে মোবাইলটোৰ এক্সচেঞ্জ অফাৰতো গ্ৰাহকসকলে আকৰ্ষণীয় সুবিধা লাভ কৰিব। গ্ৰাহকসকলে মোবাইলটোত ৫০০০ টকা পৰ্যন্ত বিশেষ ৰেহাইৰ সুবিধাও লাভ কৰিব পাৰে। লক্ষণীয়ভাৱে Galaxy S24 মডেলতকৈ এই ফোনত লাভ কৰিব অধিক অত্যাধুনিক সুবিধা।

এই নতুন মোবাইলটোৰ ১২জিবি ৰেম আৰু ২৫৬জিবি ষ্ট’ৰেজ মডেলৰ মূল্য ৮৪,৯৯৯ টকা হ’ব বুলি অনুমান কৰা হৈছে। আনহাতে ১২জিবি ৰেম আৰু ৫১২জিবি ষ্ট’ৰেজৰ মডেলটোৰ মূল্য ৯৪,৯৯৯ টকা হ’ব পাৰে। আনহাতে Galaxy S25+ ৰ ক্ষেত্ৰত ১২জিবি ৰেম আৰু ২৫৬জিবি ষ্ট’ৰেজ মডেলৰ মূল্য ১,০৪,৯৯৯ টকা হ’ব পাৰে। সেইদৰে ১২জিবি ৰেম আৰু ৫১২জিবি ষ্ট’ৰেজৰ মডেলটোৰ মূল্য ১,১৪,৯৯৯ টকা হ’ব পাৰে।

অহা ২২ জানুৱাৰীৰ নিশা ১১:৩০ বজাৰ পৰা আৰম্ভ হ’ব Samsung Galaxy Unpacked ইভেণ্ট। এই অনুষ্ঠানটো কোম্পানীটোৰ অফিচিয়েল ৱেবছাইট আৰু ইউটিউব চেনেলত লাইভ চাব পাৰিব। এই নতুন ফোনটোত ৬.৯ ইঞ্চিৰ ডিছপ্লে থাকিব পাৰে। এই ফোনটোত অধিক উন্নত কেমেৰা ছেটআপ দেখাৰ সম্ভাৱনা আছে। এই ফোনটোৰ প্ৰাইমেৰী কেমেৰা ২০০ মেগাপিক্সেল হ’ব পাৰে। ছেকেণ্ডাৰী কেমেৰাটো ১০০ মেগাপিক্সেল, ৫০ মেগাপিক্সেলৰ আল্ট্ৰা-ৱাইড কেমেৰা হ’ব পাৰে।

ইফালে নতুন ফোনটোত 5000mAh বেটাৰী ক্ষমতা থাকিব পাৰে। লগতে 45W ফাষ্ট চাৰ্জিং চাপ’ৰ্ট উপলব্ধ হ’ব পাৰে। উল্লেখ্য যে যোৱা বছৰ চেমচাঙৰ  Galaxy S24 ফোনটো ৭৪,৯৯৯ টকাত মুকলি কৰা হৈছিল। এতিয়া এই মডেলটোৰ দৰ কিছু হ্ৰাস পোৱা পৰিলক্ষিত হৈছে।