ৰবি শৰ্মা (Ravi Sarma)

অসমীয়া চলচ্চিত্ৰ জগতৰ এজন জনপ্ৰিয় অভিনেতা। ৰবি শৰ্মাৰ জন্ম ১৯৭২ চনৰ ১৯ ছেপ্টেম্বৰত গুৱাহাটীত হয়। তেওঁ ডি এ ভি স্কুল আৰু ফেকাল্টী হাই স্কুলৰ পৰা স্কুলীয়া শিক্ষা গ্ৰহণ কৰি কটন মহাবিদ্যালয়ৰ পৰা উচ্চতৰ মাধ্যমিকৰ শিক্ষা গ্ৰহণ কৰে। তাৰ পিছত তেখেতে আৰ্য্য বিদ্যাপীঠ মহাবিদ্যালয়ৰ পৰা স্নাতক ডিগ্ৰী লাভ কৰে। তেওঁৰ মাতৃ বন্দনা শৰ্মাও এগৰাকী অভিনেত্ৰী আছিল।

ৰবি শৰ্মাই বিশিষ্ট পৰিচালক মুনিন বৰুৱাৰ ২০০০ চনত মুক্তিপ্ৰাপ্ত চুপাৰ হিট ছবি ‘হিয়া দিয়া নিয়া’ৰ জৰিয়তে অসমীয়া চলচ্চিত্ৰ জগতত প্ৰৱেশ কৰে। চলচ্চিত্ৰৰ লগতে তেওঁ অসমৰ কেইবাখনো ভ্ৰাম্যমাণ থিয়েটাৰত অভিনয় কৰিছে। শেহতীয়াকৈ ৰবি শৰ্মাৰ অসমীয়া ছবি ‘শ্ৰীৰঘুপতিয়ে’ অসমীয়া ছবিজগতৰ সকলো ৰেক’ৰ্ড ভাঙিছে। অসমৰ ভ্ৰাম্যমাণ থিয়েটাৰসমূহতো অভিনয় কৰিছে ৰবি শৰ্মাই। অভিনেতাজনে নিখুঁট অভিনয়েৰে দৰ্শকৰ মন জয় কৰিবলৈ সক্ষম হৈছে।

ৰবি শৰ্মাই মৈত্ৰেয়ী প্ৰিয়দৰ্শিনীৰ সৈতে বিবাহপাশত আৱদ্ধ হয়। এতিয়া দুই সন্তানৰ পিতৃ-মাতৃ ৰবি শৰ্মা আৰু মৈত্ৰেয়ী প্ৰিয়দৰ্শিনী।