আইমী বৰুৱা (Aimee Baruah)

আইমী বৰুৱা এগৰাকী অসমীয়া অভিনেত্ৰী। তেওঁ কেইবাখনো অসমীয়া চলচ্চিত্ৰৰ লগতে বহুতো ধাৰাবাহিক ভিচিডিত অভিনয় কৰিছে। আইমী বৰুৱাৰ জন্ম হৈছিল নগাঁৱত। তেওঁৰ মাতৃৰ নাম মালা বৰুৱা আৰু পিতৃ স্বৰ্গীয় পূৰ্ণ বৰুৱা। পূৰ্ণ বৰুৱা এগৰাকী আৰক্ষী অধীক্ষক আছিল। আইমী নামটো দেউতাকে দিছিল যাৰ অৰ্থ ফৰাচী ভাষাত সুবাস।
আইমী বৰুৱাই ষষ্ঠ শ্ৰেণীত পঢ়ি থাকোঁতেই অসমৰ সাধুকথা নামৰ এখন তথ্যচিত্ৰত তেজীমলা চৰিত্ৰত অভিনয় কৰিছিল। তাৰপিছত অষ্টম শ্ৰেণীত পঢ়ি থাকোঁতে তুমি মোৰ মাথোঁ মোৰ চলচ্চিত্ৰখনৰ বাবে বিবেচনা কৰা হৈছিল যদিও বয়স কম হোৱা বাবে শেষ মুহূৰ্তত তেওঁক বাতিল কৰা হয়। তাৰ পিছৰ বছৰতেই অৰ্থাৎ নৱম শ্ৰেণীত পঢ়ি থকা সময়ত আইমী বৰুৱাই প্ৰেম আৰু প্ৰেম ছবিত অভিনয় কৰাৰ সুযোগ পায়। যিখন আছিল তেওঁৰ জীৱনৰ প্ৰথমখন ছবি।

আইমী বৰুৱাই ৰাজনীতিবিদ পীযুষ হাজৰিকাৰ সৈতে ২০১১ চনৰ ১ অক্টোবৰত বিবাহপাশত আবদ্ধ হয়।[4] তেওঁলোকৰ বৰ্তমান দুটা সন্তান আছে।
ডিমাছা ভাষাত নিৰ্মিত “চেমখৰ” ছবিৰ বাবে টেগৰ আন্তঃৰাষ্ট্ৰীয় ছবি মহোৎসৱত সৰ্বশ্ৰেষ্ঠ বৰ্ণনামূলক ছবি, সৰ্বশ্ৰেষ্ঠ নাৰী বিষয়ক ছবি আৰু শ্ৰেষ্ঠ নৱাগত ছবি নিৰ্মাতাৰ সন্মান লাভ কৰিছে আইমীয়ে।