বিনেশ ফ'গাট

বিনেশ ফ’গাটৰ জন্ম ২৫ আগষ্ট ১৯৯৪ ত হাৰিয়ানাত হৈছিল। বিনেশ এগৰাকী ভাৰতীয় মহিলা মল্লযোদ্ধা। গীতা ফোগাট আৰু ববিতা কুমাৰীৰ দৰে সফল আন্তঃৰাষ্ট্ৰীয় মল্লযোদ্ধা তেওঁৰ সম্বন্ধীয় ভগ্নী। এই দুই ভগ্নীয়ে কমনৱেলথ পদক লাভ কৰিছে। বিনেশ ফোগাট কমনৱেলথ আৰু এছিয়ান গেমছ উভয়তে স্বৰ্ণপদক অৰ্জন কৰা প্ৰথমগৰাকী ভাৰতীয় মহিলা মল্লযোদ্ধা।

এটা হিন্দু সম্প্ৰদায়ৰ পৰিয়ালত জন্ম হোৱা বিনেশ হৈছে মল্লযোদ্ধা মহাবীৰ সিং ফোগাটৰ সৰু ভাই ৰাজপালৰ জীয়ৰী। ২০১৮ চনৰ ১৩ ডিচেম্বৰত দীৰ্ঘদিনৰ বয়ফ্ৰে’ণ্ড আৰু সহযোগী মল্লযোদ্ধা সোমবীৰ ৰাথীৰ সৈতে বিনেশ বিবাহপাশত আৱদ্ধ হয়। ২০১৩ চনত ভাৰতৰ নতুন দিল্লীত অনুষ্ঠিত এছিয়ান ৰেষ্টলিং চেম্পিয়নশ্বিপত মহিলাৰ ৫২ কেজি ফ্ৰিষ্টাইল শাখাত বিনেশ ফোগাটে ব্ৰঞ্জৰ পদক লাভ কৰে। এই খেলখনত ফোগাটে থাইলেণ্ডৰ কেও শ্ৰীপ্ৰাপাক ৩-০ ব্যৱধানত পৰাস্ত কৰে। এইদৰে বিনেশে আৰম্ভ কৰিছিল ক্ৰীড়া যাত্ৰা।