দামী হ’লেও আই পি এলত নিস্প্ৰভ এই কেইজন খেলুৱৈ, দাম চাই কৰিব পৰা নাই কাম!

ক্ৰিকেট অনুৰাগীৰ দৃষ্টি নিবদ্ধ থাকে দামী খেলুৱৈৰ ওপৰত । টুৰ্ণামেন্ট আৰম্ভ হোৱাৰ পাছত সেই খেলুৱৈৰ ৰিপোৰ্ট কাৰ্ডত চকু ফুৰায় ক্ৰিকেটপ্ৰেমীয়ে । সেই ৰিপোৰ্ট হতাশাজনক হ’লে, সমালোচনাৰ সন্মুখীন হয় কোটিটকীয়া ক্ৰিকেটাৰ । ১৮ সংখ্যক আইপিএলত ৫ গৰাকী খেলুৱৈৰ বিষয়ে আজি ক’বলৈ লৈছোঁ । যাৰ মূল্য আৰু প্ৰদৰ্শনৰ মাজত দেখা গৈছে আকাশ-পাতাল পাৰ্থক্য ।

প্ৰথমেই ক’বলৈ লৈছোঁ আইপিএল ইতিহাসৰ আটাতকৈ দামী খেলুৱৈ ঋষভ পন্তৰ কথা । জেদ্দাত অনুষ্ঠিত মেগা নিলামত পন্তক ২৭ কোটি টকাত ক্ৰয় কৰে লক্ষ্ণৌ ছুপাৰ জায়েন্টছে । কিন্তু প্ৰাইছ টেগ অনুসৰি এইবাৰ আইপিএলত প্ৰদৰ্শন দেখা নাই পন্তৰ । বৰ্তমানলৈকে এই ছিজনত লক্ষ্ণৌৱে ৮ খন মেচ খেলিছে । ইয়াৰে ৫ খনত জয়ী হোৱাৰ বিপৰীতে ৩ খনত পৰাস্ত হৈছে দলটো । পন্তে এই ছিজনত ৭ টা ইনিংছত ১ টা অৰ্ধশতকসহ ১০৬ ৰাণহে সংগ্ৰহ কৰিছে । তেওঁৰ গড় ১৫.১৪ । ষ্ট্ৰাইক ৰেট চাবলৈ গ’লে সেয়াও ১০০ তলত ।

পন্তৰ পিছত যিজন ক্ৰিকেটাৰৰ প্ৰদৰ্শন আৰু দামৰ পাৰ্থক্য দেখা গৈছে তেওঁ হৈছে কেকেআৰৰ সহঃঅধিনায়ক ভেংকটেশ আয়াৰ । তেওঁৰ মূল্য ২৩.৭৫ কোটি । ভেংকিয়ে ৮খন মেচত ৬ টা ইনিংছত সংগ্ৰহ কৰিছে ১৩৫ ৰান । গড় ২২.৫০ ।

টি-২০ ক্ৰিকেটত বিশ্বৰ অন্যতম প্ৰভাৱশালী বলাৰ ৰশিদ খান । গুজৰাট টাইটানছে ১৮ কোটি টকাত ৰিটেইন কৰে তেওঁক । পূৰ্বতে একাধিক মেচত গুজৰাটক জয়ৰ সোৱাদ দিছিল ৰশিদ খানে । কিন্তু এই ছিজনত ৰশিদৰ সেই ঝলক দেখা নাই অনুৰাগীয়ে । ৮ খন মেচত সংগ্ৰহ ৬ টা উইকেট । আন ছিজনত ৰশিদৰ মাজত যি বাৰুদ দেখা গৈছিল, এইবাৰ যেন সেই বাৰুদ সেমেকি গৈছে ।

পন্ত, ভেংকটেশ, ৰছিদৰ লগত এইগৰাকী ক্ৰিকেটাৰৰ নাম নল’লে আধৰুৱা হ’ব তেওঁ হৈছে অৰেঞ্জ আৰ্মি হায়দৰাবাদৰ অধিনায়ক পেট কামিন্স । কাব্যাৰ দলে তেওঁক ৰিটেইন কৰিছিল ১৮ কোটি টকাত । এই ছিজনত বৰ্তমানলৈকে পেট কামিন্সৰ নেতৃত্বত ৭ খন মেচৰ ২ খনতহে জয়লাভ কৰিছে হায়দৰাবাদে । অষ্ট্ৰেলিয়াৰ বিশ্বজয়ী অধিনায়কগৰাকীয়ে ৭ খন মেচত দখল কৰিছে ৭ টা উইকেট । ইকনমি ৰেট ১০.২১ । ষ্ট্ৰাইক ৰেট ২১.১৪ ।

মুম্বাই ইণ্ডিয়ানছৰ প্ৰাক্তন অধিনায়ক ৰোহিত শৰ্মাই ছন্দ ঘূৰাই পাইছে । এই ছিজনত মুম্বায়ে ৮ খন খেল খেলিছে । ৰোহিতে ৭ টা ইনিংছত সংগ্ৰহ কৰিছে ১৫৮ ৰাণ । গড় ২৬.৩৩ আৰু ষ্ট্ৰাইকৰেট ১৫৪.৯০ । ৰোহিতক মেগা নিলামত ১৬ কোটি ৩০ লাখ টকাত ৰিটেন কৰে মুম্বায়ে । এই ছিজনত চিএছকেৰ বিৰুদ্ধে ৰোহিতে সৰ্বাধিক ৭৬ ৰাণ সংগ্ৰহ কৰে । ইয়াৰ বাহিৰে বাকী ৬ টা ইনিংছত মুঠ ৮২ ৰাণ ৰোহিতৰ খাটাত । হিটমেনৰ দৰে ক্ৰিকেটাৰ যি, মুম্বাইক ৫ বাৰকৈ আইপিএল জিকাইছে, তেওঁৰ পৰা এনে প্ৰদৰ্শন কাম্য নহয় অনুৰাগীৰ ।