হিন্দুমুক্ত বাংলাদেশ গঢ়াৰ লক্ষ্য! আৰক্ষীৰ পদত হিন্দুক নিযুক্তিত নিষেধাজ্ঞা ইউনুছ চৰকাৰৰ

বাংলাদেশত এতিয়াও অব্যাহত আছে হিন্দু বিৰোধী কাৰ্যকলাপ।  বাংলাদেশক হিন্দুমুক্ত কৰাৰ দিশত কাম কৰিছে প্ৰধানমন্ত্ৰী মহম্মদ ইউনুছৰ চৰকাৰে।  ইয়াৰ মাজতে গৃহ মন্ত্ৰালয় আৰু লোক সেৱা আয়োগে জাৰি কৰিছে  বিশেষ নিৰ্দেশনা। এই নিৰ্দেশ অনুসৰি  কনিষ্টবলৰ পৰা আৰম্ভ কৰি আৰক্ষীৰ উচ্চ পদলৈ কোনো হিন্দুক নিযুক্তি দিয়া নহ’ব। এই নিৰ্দেশৰ বাবে ১৫০০ৰো অধিক হিন্দু প্ৰাৰ্থীৰ আবেদন নাকচ কৰা হৈছে।

শ্বেখ হাছিনা ক্ষমতাৰ পৰা আঁতৰি যোৱাৰ পিছৰে পৰা বাংলাদেশত হিন্দুসকলৰ বিৰুদ্ধে নিৰন্তৰভাৱে কাম চলি আহিছে। আৰম্ভণিতে চাকৰিৰ পৰা বৰ্খাস্ত কৰা হৈছে সহকাৰী আৰক্ষী অধীক্ষক, আৰক্ষী অধীক্ষক আৰু ডিআইজি পদবীৰ ১০০ৰো অধিক হিন্দু আৰক্ষী বিষয়াক। কেৱল ইমানে নহয়, তেওঁলোকৰ ঠাইত উগ্ৰপন্থী, বিশেষকৈ জামাত-ই-ইছলামীৰ সদস্যসকলক নিয়োগ কৰাৰ সিদ্ধান্ত লোৱা হৈছিল।

ইয়াৰ উপৰিও প্ৰায় ৭৯,০০০ আৰক্ষীৰ নিযুক্তি বাতিল কৰা হৈছে। এই পদসমূহৰ বাবে নিযুক্তি প্ৰক্ৰিয়া যোৱা বছৰৰ অক্টোবৰৰ পৰা আৰম্ভ হৈছে। এতিয়া পৰৱৰ্তী নিযুক্তি প্ৰক্ৰিয়া অহা জানুৱাৰীৰ পৰা আৰম্ভ হ’ব।

কোনো হিন্দুক নিয়োগ কৰা নহ’ব: বাংলাদেশ

বাংলাদেশ আৰক্ষীৰ আইজিপি বাহাৰুল আলমক কনিষ্টবল বা সহকাৰী উপ-পৰিদৰ্শক পদত কোনো হিন্দু লোকক নিযুক্তি নিদিবলৈ নিৰ্দেশ দিয়া হৈছে। তেওঁলোক যোগ্য হ’লেও কোনো হিন্দুক নিযুক্তি নিদিবলৈ নিৰ্দেশ দিয়া হৈছে। ইয়াৰ লগতে, এইটোও নিশ্চিত কৰিব লাগে যে কোনো হিন্দুয়ে বাংলাদেশ অসামৰিক সেৱা পৰীক্ষাত উত্তীৰ্ণ হ’ব নোৱাৰে।

বাংলাদেশত হিন্দুসকলৰ বিৰুদ্ধে অভিযান

বাংলাদেশত হিন্দুসকলৰ ওপৰত আক্ৰমণ অব্যাহত। প্ৰথমতে ধৰ্মীয় স্থানৰ লগতে তেওঁলোকৰ প্ৰতিষ্ঠানবোৰত আক্ৰমণ কৰা হৈছে। ইয়াৰ লগতে লক্ষ্য কৰি লোৱা হৈছে সকলো হিন্দুক। শ্বেখ হাছিনাৰ শাসনৰ পৰা আঁতৰি অহাৰ পাছত বহুতো হিন্দুয়ে প্ৰাণ হেৰুৱাইছে। এই ক্ষেত্ৰত প্ৰধানমন্ত্ৰী ইউনুছে পৰিস্থিত উন্নত হ’ব বুলি উল্লেখ কৰিছিল। কিন্তু উন্নত হোৱাৰ পৰিৱৰ্তে পৰিস্থিতিৰ অধিক অৱনতি ঘটিছে।

ইয়াৰ মাজতে নাৰাইলত এগৰাকী হিন্দু মহিলা বাসনা মালিকৰ (৫২) ৰহস্যজনক মৃত্যুৰ খবৰ পোহৰলৈ আহিছে। কোৱা হৈছে যে বাসনাক ধৰ্ষণ কৰা হৈছিল। তাৰ পিছত তেওঁৰ মৃত্যু হয়। পৰিয়ালৰ সদস্যসকলৰ মতে, বাসনা মালিক বিগত মঙলবাৰে (২৪ ডিচেম্বৰ) নিশা প্ৰায় ৮ বজাত ঘৰলৈ উভতি আহিছিল। তাৰ পিছত তেওঁ বমি কৰিবলৈ আৰম্ভ কৰিছিল।  নিশাৰ আহাৰৰ পিছত পৰিয়ালক নজনোৱাকৈ তেওঁ শুবলৈ গৈছিল। তাৰ পাছত তেওঁৰ স্বাস্থ্যৰ অৱনতি হোৱাত বুধবাৰে জেচোৰ জেনেৰেল হাস্পতালত ভৰ্তি কৰোৱা হয়। কিন্তু বৃহস্পতিবাৰে নিশা প্ৰায় ১১ বজাত তেওঁৰ মৃত্যু হয়।