সুৰ সলনি বাংলাদেশৰ! বিচাৰে মোদীৰ সাক্ষাৎ, ভাৰতে দিয়া নাই সঁহাৰি…

প্ৰধানমন্ত্ৰী নৰেন্দ্ৰ মোদীক সাক্ষাৎ কৰিবলৈ আগ্ৰহী বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্ট মহম্মদ ইউনুছ। থাইলেণ্ডত অনুষ্ঠিত হ’বলগীয়া বিমষ্টেক শীৰ্ষ সন্মিলনত অংশগ্ৰহণ কৰি দ্বিপাক্ষিক আলোচনাত অংশ গ্ৰহণ কৰিব পাৰে দুইগৰাকী নেতাই। ২০১৮ চনৰ পাছত এইখন হ’ব বিমষ্টেক সন্মিলনৰ নেতাসকলৰ প্ৰথমখন বৈঠক।

ইউনুছৰ উচ্চ প্ৰতিনিধি খলিলুৰ ৰহমানৰ উদ্ধৃতিৰে ঢাকা ট্ৰিবিউনে কয় যে,বাংলাদেশে বৈঠকৰ বাবে আহ্বান জনাইছে আৰু আমি ভাবো যে ইয়াৰ এক যুক্তিসংগত ভিত্তি আছে। যদিহে ভাৰত মান্তি হয় তেন্তে কূটনৈতিক উত্তেজনা চলি থকাৰ মাজতে দুই দেশৰ এই বৈঠকে গুৰুত্বপূৰ্ণ ভূমিকা পালন কৰিব। উল্লেখ কৰা প্ৰয়োজন যে, বাংলাদেশত হিন্দুৰ ওপৰত চলি থকা অত্যাচাৰৰ ওপৰত উদ্বেগ প্ৰকাশ কৰিছে ভাৰতে। যাৰ বাবে এই বৈঠক আয়োজনত বিশেষ গুৰুত্ব দিয়া নাই।

ইউনুছে কি কয়

যোৱা সপ্তাহত ইউনুছ চীনলৈ গৈছিল আৰু তাতে তেওঁ ভাৰত বিৰোধী মন্তব্য কৰিছিল। ইউনুছে কৈছিল যে,  ভাৰতৰ পূৱ অংশত থকা  ৭খন ৰাজ্য, যাক সাতভনী বুলি কোৱা হয় ই ভাৰতৰ লেণ্ডলক ক্ষেত্ৰ। সাগৰলৈ আহিবৰ বাবে তেওঁলোকৰ ওচৰত কোনো পথ নাই। এই সমগ্ৰ ক্ষেত্ৰটোৰ বাবে সাগৰৰ একমাত্ৰ ৰক্ষক আমি। গতিকে ই অপৰিসীম সম্ভাৱনাৰ দুৱাৰ মুকলি কৰে। লগতে কয় যে, ই চীনৰ অৰ্থ ব্যৱস্থাত বিস্তাৰিত কৰিব পাৰে, বস্তু উৎপাদন কৰিব পাৰে,বস্তু-সামগ্ৰী বজাৰলৈ লৈ যাব পাৰে আৰু বিশ্বৰ অন্য প্ৰান্তলৈ ইয়াক ৰপ্তানী কৰিব পাৰে।  ইউনুছৰ এই মন্তব্যক ভাৰতে তীব্ৰ গৰিহনা যোগাইছিল।

বাংলাদেশৰ সুৰ সলনি

ভাৰতে প্ৰতিক্ৰিয়া প্ৰকাশ কৰাৰ পাছতে খলিলুৰ ৰহমানে কয় যে ইউনুছৰ মন্তব্যক ভুলকৈ বুজা হৈছে। ইউনুছে ভাল উদ্দেশ্য আগত ৰাখি এই মন্তব্য আগবঢ়াইছে। যদি মানুহে আমাৰ মন্তব্য ভুলকৈ বুজে তাত আমি একো কৰিব নোৱাৰো। অৱশ্যে মোদী-ইউনুছৰ বৈঠকৰ সম্ভাৱনাক বহুতে স্বীকাৰ কৰা নাই। শেহতীয়াকৈ বিজেপি নেতা স্বপন দাসগুপ্তাই প্ৰধানমন্ত্ৰীক ইউনুছক সাক্ষাৎ নকৰিবলৈ আহ্বান জনাইছিল।

উল্লেখ্য যে, শ্বেখ হাছিনা চৰকাৰৰ পতনৰ পাছতে ভাৰত-বাংলাদেশৰ মাজৰ সম্পৰ্কৰ  যথেষ্ঠ অৱনতি ঘটিছে। মহম্মদ ইউনুছে কৰা ভাৰত বিৰোধী মন্তব্যই দেশ  দুখনৰ মাজত বহু বিভেদ আনিছে। ইয়াৰোপৰি বাংলাদেশত হিন্দুৰ ওপৰত চলি থকা অত্যাচাৰৰ ওপৰতো উদ্বেগ প্ৰকাশ কৰিছিল ভাৰতে। ইয়াৰ মাজতে শেহতীয়াকৈ বাংলাদেশে চীন চৰকাৰৰ সৈতে এক মজবুত সম্পৰ্ক গঢ়ি তোলাৰ উদ্দেশ্যে ভাৰত বিৰোধী মন্তব্য কৰিছে।

কিন্তু পুনৰ বাংলাদেশে সুৰ সলনি কৰি ভাৰতৰ প্ৰধানমন্ত্ৰীৰ সৈতে বৈঠকত আহ্বান কৰিছে। চুবুৰীয়া ৰাষ্ট্ৰখনেও জানে যে, তেওঁলোক যথেষ্ঠ পৰিমাণে এতিয়াও ভাৰতৰ ওপৰত নিৰ্ভৰশীল। গতিকে ভাৰতৰ সৈতে সম্পৰ্ক বেয়া কৰি বিশেষ সুফল নাপাব। অৱশ্যে ভাৰতে এই বৈঠকত অংশ লয় নে নাই সেয়া সময়ে ক’ব।

অন্য খবৰ পঢ়কঃ ইউনুছক লাগে মোদীৰ সহায়, বিচাৰে আলোচনা! প্ৰধানমন্ত্ৰীয়ে পত্ৰ লিখি ক’লে…