ড্ৰেগন কেপচুলত উভতিব সুনীতা উইলিয়ামছ ! সুনীতাক পৃথিৱীলৈ ঘূৰাই অনাৰ বাবে কেনেদৰে কৰা হৈছে পৰিকল্পনা ?

সুনীতা উইলিয়ামছ আৰু বুচ উইলম’ৰ

মহাকাশত আবদ্ধ হৈ থকা সুনীতা উইলিয়ামছক পুনৰ পৃথিৱীলৈ অনাৰ অভিযান আৰম্ভ কৰা হৈছে। পৰিকল্পনাৰ অনুসৰি সকলো ঠিকে থাকিলে ৩ দিনৰ পাছত সুনীতা উইলিয়ামছ আৰু তেওঁৰ সংগী বুচ উইলম’ৰ পৃথিৱীলৈ উভতি আহিব। সুনীতা উইলিয়ামছক ঘূৰাই অনাৰ এই অভিযানক Crew-10 নাম দিয়া হৈছে । এই অভিযানত মুঠ ৪ জন মহাকাশচাৰীক অন্তৰ্ভুক্ত কৰা হৈছে।

সুনীতা উইলিয়ামছ ঘৰলৈ উভতি অহাৰ বাবে ইলন মাস্কৰ ফেলকন ৯ ৰকেটে ড্ৰেগন কেপচুল আৰু তাত উপস্থিত থকা চাৰিজন মহাকাশচাৰীক লৈ ইতিমধ্যে উৰা মাৰিছে। আমেৰিকাৰ ফ্ল’ৰিডাৰ কেনেডি স্পেচ চেণ্টাৰৰ পৰা ফেলকন ৯ ৰকেট উৎক্ষেপণ কৰা হৈছিল আৰু কেইঘণ্টামানৰ পিছতে ড্ৰেগন কেপচুলটো ৰকেটৰ পৰা পৃথক হয়। ড্ৰেগন কেপচুলটো ঘণ্টাত ২৮,২০০ কিলোমিটাৰ বেগেৰে আই এছ এছৰ দিশে আগবাঢ়িছে। আজি ৰাতি ড্ৰেগন কেপচুলত থকা Crew-10 আই এছ এছত উপস্থিত হ’ব। প্ৰথমে আই এছ এছত ডক কৰা হ’ব ড্ৰেগন কেপচুল।

ডকিং কৰাৰ পিছত গ্ৰীণ চিগনেল পোৱাৰ লগে লগে মহাকাশচাৰীসকলে আই এছ এছত উপস্থিত হ’ব। এই মহাকাশচাৰীসকলে সুনীতা উইলিয়ামছ আৰু তেওঁৰ সহযোগীৰ পৰা দায়িত্ব ল’ব। ইয়াৰ পিছত সুনীতা উইলিয়ামছ আৰু বুচ উইলম’ৰে কেপচুললৈ ঘূৰি আহিব। ড্ৰেগন কেপচুলটোৱে মহাকাশ কেন্দ্ৰৰ পৰা ডক কৰি পৃথিৱীৰ ফালে উভতিবলৈ আৰম্ভ কৰিব। অনুমান অনুসৰি, ড্ৰেগন কেপচুল পৃথিৱীলৈ ঘূৰি আহিবলৈ প্ৰায় ৪ দিন সময় লাগিব পাৰে। এনে পৰিস্থিতিত ১৯ মাৰ্চৰ ভিতৰত সুনীতা পৃথিৱীলৈ ঘূৰি আহিব বুলি ধাৰণা কৰা হৈছে।

ড্ৰেগন কেপচুলৰ নিৰাপদ অৱতৰণৰ বাবেও সম্পূৰ্ণ পৰিকল্পনা কৰা হৈছে। পৰিকল্পনা অনুসৰি, এই কেপচুলটো মেক্সিকো উপসাগৰত অৱতৰণ কৰা হ’ব, য’ত ই পেৰাচুটৰ সহায়ত অৱতৰণ কৰিব। অৱতৰণৰ পিছত উদ্ধাৰকাৰী দলে কেপচুলটোৰ বাহিৰ কৰিব আৰু মহাকাশচাৰীসকলক নিৰাপদে পাৰলৈ অনাৰ ব্যৱস্থা কৰিব ।

২৮৭ দিন ধৰি মহাকাশত আবদ্ধ হৈ আছে সুনীতা উইলিয়ামছ আৰু বুচ উইলম’ৰ । উল্লেখ্য যে, ইয়াৰ পূৰ্বে সুনীতাক ঘূৰাই অনাৰ অভিযান বিফল হৈছিল। একে সময়তে বিভিন্ন অভিযান আৰম্ভ কৰাৰ তাৰিখ কেইবাবাৰো সলনি কৰা হৈছিল। যদি সকলো ঠিকে থাকে তেন্তে মহাকাশত প্ৰায় ২৮৭ দিন কটোৱাৰ পাছত সুনীতা উইলিয়ামছে নিৰাপদে পৃথিৱীলৈ উভতি আহিব।

বৰ্তমান সুনীতা উইলিয়ামছ আৰু বুচ উইলমৰে স্পেচএক্সৰ ড্ৰেগন কেপচুলৰ বাবে আগ্ৰহেৰে অপেক্ষা কৰি আছে। সুনীতা আৰু বুচ ৮ দিনৰ বাবে মহাকাশলৈ গৈছিল। ২০২৪ চনৰ ৫ জুনত তেওঁলোক বয়িঙৰ ষ্টাৰলাইনাৰ মহাকাশযানত উৰা মাৰিছিল।