৭ টা দিশত ভাৰতত ওচৰত পৰাস্ত পাকিস্তান, তথাপিও পাক নেতাৰ মুখত যুদ্ধৰ হুংকাৰ

পহলগাম আক্ৰমণৰ পিছত ভাৰত আৰু পাকিস্তানৰ মাজত উত্তেজনা চূড়ান্ত পৰ্যায়ত উপনীত হৈছে । ভাৰতে পাকিস্তানৰ বিৰুদ্ধে কঠোৰ সিদ্ধান্ত গ্ৰহণ কৰি সিন্ধু জল চুক্তি বাতিল কৰে । এই সিদ্ধান্তত হতাশ হৈ পাকিস্তানৰ নেতাসকলে অহৰহ যুদ্ধৰ ভাবুকি দি আহিছে । কিন্তু এনে বহু বিষয় আছে যাৰ ওপৰত ভাবুকি প্ৰদান কৰা পাকিস্তান ভাৰতৰ হাতত বেয়াকৈ পৰাস্ত হৈছে । অৰ্থনৈতিক শক্তি হওক বা বৈদেশিক মুদ্ৰাৰ মজুত হওক । এনে ৭টা ক্ষেত্ৰত পাকিস্তানৰ ওপৰত ভাৰতে বিপুল অগ্ৰগতি লাভ কৰিছে ।

যি সময়ত ভাৰতৰ জিডিপি, শ্বেয়াৰ বজাৰ আৰু বিশ্বত স্থান ক্ৰমাগতভাৱে উন্নত হৈ আহিছে, সেই একে সময়তে পাকিস্তান ঋণৰ বোজা আৰু দৰিদ্ৰতাত ডুব গৈ আছে । কিন্তু হয়তো পাকিস্তানৰ কু-অভিপ্ৰায়ী নেতাসকলে এই সংখ্যাবোৰে কি সূচাইছে বুজি পোৱা নাই । সেই নেতাসকলে ভাৰতৰ বিৰুদ্ধে যুদ্ধত জয়ী হোৱাৰ কথা কৈছে । জয়ী হোৱাতো বাদেই, পাকিস্তানে যুদ্ধৰ কথাও ভাবিলে ধ্বংসৰ পৰা কোনেও বচাব নোৱাৰে । বাৰু, আমি মূল বিষয়টোলৈ আহোঁ-

মুদ্ৰাস্ফীতিত ককবকাইছে পাকিস্তানে
ইতিমধ্যে অর্থনৈতিক ক্ষেত্রত ক্ষতিগ্রস্ত হৈছে পাকিস্তানৰ জনসাধাৰণ ৷ ২০২৪ চনত পাকিস্তানত গড় মুদ্ৰাস্ফীতিৰ হাৰ আছিল প্ৰায় ২৪%, যিটো বিশ্বৰ অন্যতম সৰ্বোচ্চ হাৰ । মানুহে খাদ্য-পানীয়ৰ বাবে সংগ্ৰাম কৰি আছে । বহু ঠাইত ৰেচনৰ দোকানত লুণ্ঠনৰ খবৰ আহিছে । তাৰ তুলনাত ভাৰতত খুচুৰা মুদ্ৰাস্ফীতিৰ হাৰ প্ৰায় ৪%হে, ইয়াৰ পৰা স্পষ্টকৈ দেখা যায় যে ভাৰতৰ অৰ্থনৈতিক নীতি বহুত বেছি সুস্থিৰ আৰু শক্তিশালী । এতিয়া নিজে ভাবি চাওক, মুদ্ৰাস্ফীতিত ককবকাই থকা দেশ এখনে যুদ্ধত নিজতকৈ ১০ গুণ শক্তিশালী দেশ এখনৰ লগত যুঁজ দিয়াৰ কথাও কেনেকৈ ভাবিব পাৰে ।

অৰ্থনৈতিক দিশত কোন আগবাঢ়ি আছে?
অৰ্থনৈতিক দিশত পাকিস্তানেৰে ভাৰতৰ তুলনা নহয় । আজি ভাৰতৰ জিডিপি প্ৰায় ৩.৭ ট্ৰিলিয়ন ডলাৰ আৰু ভাৰত বিশ্বৰ তৃতীয় বৃহত্তম অৰ্থনীতি হোৱাৰ দিশত আগবাঢ়িছে । আনহাতে পাকিস্তানৰ জিডিপি মাত্ৰ প্ৰায় ৩৪০ বিলিয়ন ডলাৰ । এই পাৰ্থক্যই দেখুৱাইছে পাকিস্তানে ভয়ংকৰ দৰিদ্ৰতা আৰু অৰ্থনৈতিক সংকটৰ মাজেৰে দিন পাৰ কৰিছে । যি সময়ত ভাৰত বিশ্ব বিনিয়োগৰ কেন্দ্ৰবিন্দু হৈ পৰিছে, সেই সময়ত পাকিস্তানে ঋণৰ বাবে আন্তঃৰাষ্ট্ৰীয় প্ৰতিষ্ঠানৰ দুৱাৰত টোকৰ মাৰিবলগীয়া হৈছে ।

শিক্ষাৰ ক্ষেত্ৰতো ভাৰততকৈ পিছ পৰি আছে পাকিস্তান
শিক্ষাৰ ক্ষেত্ৰতো পাকিস্তান ভাৰততকৈ বহু পিছ পৰি আছে । ইউনেস্ক’ৰ ২০২৫ চনৰ তথ্য অনুসৰি ভাৰতত প্ৰাপ্তবয়স্কৰ সাক্ষৰতাৰ হাৰ প্ৰায় ৭৬.৩২%, আনহাতে পাকিস্তানত এই হাৰ মাত্ৰ ৫৯.১৩%। যি সময়ত ভাৰতে নিজৰ জিডিপিৰ ৪.৫-৪.৮% শিক্ষাৰ বাবে ব্যয় কৰিছে, পাকিস্তানে মাত্ৰ ২.৯% ব্যয় কৰিবলৈ সক্ষম হৈছে । উন্নত শিক্ষা ব্যৱস্থাই ভৱিষ্যতে ভাৰতক অধিক শক্তিশালী কৰি তুলিব, আনহাতে পাকিস্তানে পৰৱৰ্তী প্ৰজন্মক পৰ্যাপ্ত সম্পদ আৰু সুযোগ প্ৰদান কৰাত ব্যৰ্থ হৈছে ।

সামৰিক শক্তিৰ ক্ষেত্ৰত কোন বেছি শক্তিশালী?
সামৰিক বাজেটৰ কথা ক’লে ভাৰতৰ প্ৰতিৰক্ষা বাজেট বৰ্তমান ৭৮.৭ বিলিয়ন ডলাৰ, আনহাতে পাকিস্তানৰ প্ৰতিৰক্ষা বাজেট মাত্ৰ ৭.৬ বিলিয়ন ডলাৰ । অৰ্থাৎ ভাৰতৰ সামৰিক বাজেট পাকিস্তানৰ তুলনাত প্ৰায় দহগুণ বেছি । ইয়াৰ অৰ্থ এইটোৱেই যে ভাৰতত অধিক আধুনিক অস্ত্ৰ-শস্ত্ৰ, উন্নত প্ৰশিক্ষণৰ সুবিধা আৰু শক্তিশালী সামৰিক যন্ত্ৰ আছে । ভাৰতৰ সৈতে প্ৰতিদ্বন্দ্বিতা কৰিব পৰাকৈ পাকিস্তানৰ সম্পদৰ ভয়াৱহ অভাৱ ।

পাকৰ স্বাস্থ্য ব্যৱস্থাও অনুন্নত
স্বাস্থ্যৰ ক্ষেত্ৰতো পাকিস্তানৰ অৱস্থা অতি কৰুণ । ভাৰতে নিজৰ জিডিপিৰ প্ৰায় ৪% নিজৰ স্বাস্থ্য খণ্ডত ব্যয় কৰিছে, আনহাতে পাকিস্তানৰ মুঠ স্বাস্থ্য ব্যয় ২.৯% আৰু ইয়াৰ বাবে চৰকাৰী ব্যয় মাত্ৰ ১.২-১.৫% । অৰ্থাৎ পাকিস্তানত স্বাস্থ্যসেৱাৰ অৱস্থা অতি দুৰ্বল । ক’ভিডৰ পাছত ভাৰতে স্বাস্থ্য আন্তঃগাঁথনিত যি দ্রুত উন্নতি সাধন কৰিছে, তাৰ বিশ্বজুৰি শলাগ লোৱা হৈছে ৷

বৈদেশিক মুদ্ৰাৰ মজুতৰ তথ্য
ফৰেক্স ৰিজাৰ্ভৰ কথা আহিলে পাকিস্তানৰ অৱস্থা অতি বেয়া । বৰ্তমান ভাৰতত প্ৰায় ৬৭৮ বিলিয়ন ডলাৰৰ বৈদেশিক মুদ্ৰাৰ মজুত আছে, যাৰ ফলত ভাৰতে বিশ্বব্যাপী অৰ্থনৈতিক জোকাৰণিৰ পৰা নিজকে ৰক্ষা কৰিব পাৰে । ইয়াৰ তুলনাত পাকিস্তানৰ হাতত মাত্ৰ ৮ বিলিয়ন ডলাৰৰ মজুত আছে, যাৰ বাবে ইয়াৰ বাবে প্ৰয়োজনীয় বস্তুবোৰো কিনিবলৈও অসুবিধা হৈছে । কোষাগাৰ খালী হ’লে যুঁজ দিয়াৰ কথা কেৱল দিবাস্বপ্ন হৈয়েই থাকিব ।

শ্বেয়াৰ বজাৰৰ সিংহ কোন?
আনকি শ্বেয়াৰ বজাৰৰ ক্ষেত্ৰতো পাকিস্তান ভাৰতৰ বহু পিছ পৰি আছে । বৰ্তমান ভাৰতীয় শ্বেয়াৰ বজাৰখন এছিয়াৰ ভিতৰতে অন্যতম শক্তিশালী আৰু ইয়াৰ বজাৰ মূল্য প্ৰায় ৪ ট্ৰিলিয়ন ডলাৰ । ইয়াৰ বিপৰীতে পাকিস্তানৰ শ্বেয়াৰ বজাৰ ১০০ বিলিয়ন ডলাৰৰ কম বজাৰ মূলধনত সীমাবদ্ধ হৈ আছে । এই পাৰ্থক্য বিনিয়োগকাৰীৰ আত্মবিশ্বাস আৰু আৰ্থিক শক্তিৰ এক ডাঙৰ প্ৰমাণ ।

এই সকলোবোৰ পৰিসংখ্যা আৰু তথ্যৰ পৰা স্পষ্ট যে পাকিস্তান কেৱল সামৰিকভাৱে নহয়, অৰ্থনৈতিক, শৈক্ষিক, স্বাস্থ্যৰ দৰে প্ৰতিটো দিশতে ভাৰতৰ পৰা বহু পিছ পৰি আছে । এনে পৰিস্থিতিত যুদ্ধৰ ভাবুকি দিয়া বা ভাৰতক প্ৰত্যাহ্বান জনোৱাটো পাকিস্তানৰ বাবে আত্মঘাতী বুলি প্ৰমাণিত হ’ব পাৰে । বাস্তৱ কথাটো হ’ল, যুদ্ধক্ষেত্ৰতেই হওক বা উন্নয়নৰ পথতেই হওক, ভাৰতৰ হাতত প্ৰতিদিনে পৰাজিত হৈ আছে পাকিস্তান ।