৪০ বছৰৰ পাছত পুনৰ ৰচিব ইতিহাস! আন্তঃৰাষ্ট্ৰীয় মহাকাশ কেন্দ্ৰলৈ উৰা মাৰিবলৈ সাজু এজন ভাৰতীয়

ভাৰতৰ মহাকাশ খণ্ডৰ বাবে এটা ঐতিহাসিক মুহূৰ্ত। কিছুদিনৰ পাছতে আন্তঃৰাষ্ট্ৰীয় মহাকাশ কেন্দ্ৰ (আই এছ এছ) ভ্ৰমণ কৰিব ভাৰতীয় বায়ুসেনাৰ বিষয়া গ্ৰুপ কেপ্তেইন শুভাংশু শুক্লাই।  মে’ মাহত  Axiom Mission 4 (Ax-4) ৰ অধীনত আৰম্ভ হ’ব এই অভিযান। য’ত চাৰিখন দেশৰ চাৰিজন মহাকাশচাৰীক অন্তৰ্ভুক্ত কৰা হ’ব। এই অভিযানৰ অধীনত মহাকাশলৈ যোৱা প্ৰথমজন ভাৰতীয় হিচাপে পৰিগণিত হ’ব শুভাংশু শুক্লা। ৪০ বছৰৰ পাছত যিকোনো ভাৰতীয়ৰ মহাকাশলৈ যোৱাৰ সপোন পূৰণ হ’ব। ইয়াৰ পূৰ্বে ১৯৮৪ চনত ৰাকেশ শৰ্মাই ছোভিয়েট ইউনিয়নৰ এখন মহাকাশযানত যাত্ৰা কৰিছিল।

ভাৰত, পোলেণ্ড, হাংগেৰী আৰু আমেৰিকাৰ মহাকাশচাৰীয়ে এক্স-৪ অভিযানত অংশগ্ৰহণ কৰিব। এই অভিযানৰ অধীনত শুভাংশ শুক্লাই মিছন পাইলট হিচাপে মহাকাশলৈ যাব। তেওঁৰ সৈতে মিছন বিশেষজ্ঞ হিচাপে যোগ দিব পোলেণ্ডৰ স্লাভ’জ উজনানস্কি আৰু হাংগেৰীৰ টিবৰ কাপুৱে। এই অভিযানৰ কমাণ্ডাৰ হ’ব আমেৰিকাৰ মহাকাশচাৰী পেগী হুইটছন। এই অভিযান ১৪ দিন চলিব, য’ত বৈজ্ঞানিক গৱেষণা আৰু কাৰিকৰী পৰীক্ষা কৰা হ’ব।

শুভাংশু শুক্লা আৰু তেওঁৰ সতীৰ্থ মহাকাশচাৰীসকলে স্পেচএক্সৰ ড্ৰেগন কেপচুলত আন্তঃৰাষ্ট্ৰীয় মহাকাশ কেন্দ্ৰলৈ উৰা মাৰিব।  আমেৰিকাৰ ফ্ল’ৰিডাৰ নাছাৰ কেনেডি স্পেচ চেণ্টাৰৰ পৰা ফেলকন-৯ ৰকেটৰ জৰিয়তে হ’ব এই উৎক্ষেপণ। নাছা আৰু এক্সিয়াম স্পেচৰ চূড়ান্ত অনুমোদনৰ পিছত উৎক্ষেপণৰ সঠিক তাৰিখ ঘোষণা কৰা হ’ব।

Ax-4 মিছন কি?

এক্স-৪ অভিযানৰ মূল উদ্দেশ্য হৈছে মহাকাশত বিভিন্ন বৈজ্ঞানিক পৰীক্ষা আৰু প্ৰযুক্তিগত পৰীক্ষা কৰা। এই মিছনৰ অধীনত বহুতো ডাঙৰ ডাঙৰ কাম কৰা হ’ব। তাত সকলো বিজ্ঞানীয়ে মাইক্ৰ’গ্ৰেভিটিত জৈৱিক আৰু ভৌতিক বিজ্ঞানৰ সৈতে জড়িত পৰীক্ষা-নিৰীক্ষা চলাব। ইয়াৰ সমান্তৰালকৈ তাত কাৰিকৰী পৰীক্ষাও কৰা হ’ব। এই সময়ছোৱাত নতুন মহাকাশ প্ৰযুক্তি আৰু সঁজুলি পৰীক্ষা কৰা হ’ব। এই অভিযানৰ অধীনত পৃথিৱীৰ মানুহক মহাকাশ বিজ্ঞান আৰু গৱেষণাৰ বিষয়ে সজাগ কৰা হ’ব।

Axiom Space হৈছে আমেৰিকাৰ ব্যক্তিগত মহাকাশ কোম্পানী, যিয়ে ভৱিষ্যতে এটা বাণিজ্যিক মহাকাশ কেন্দ্ৰ স্থাপনৰ পৰিকল্পনাৰ ক্ষেত্ৰত কাম কৰি আছে। এক্সিয়ামে এই পৰ্যন্ত তিনিটা মহাকাশ অভিযান সফলতাৰে সম্পূৰ্ণ কৰিছে। ২০২২ চনৰ এপ্ৰিল মাহত এক্সিয়াম-১ অভিযান আৰম্ভ কৰা হৈছিল, য’ত ১৭ দিনীয়া মহাকাশ অভিযান চলোৱা হৈছিল। ইয়াৰ পিছত ২০২৩ চনৰ মে’ মাহত এক্স-২ মিছন আৰু ২০২৪ চনৰ জানুৱাৰী মাহত এক্স-৩ মিছন সফলতাৰে আৰম্ভ হয়। এতিয়া এই ধাৰাবাহিকৰ চতুৰ্থ পৰ্যায়ত এক্স-৪ অভিযান, য’ত ভাৰতকে ধৰি চাৰিখন দেশৰ মহাকাশচাৰীয়ে অংশগ্ৰহণ কৰিব।

ভাৰতৰ বাবে ডাঙৰ কৃতিত্ব

শুভাংশু শুক্লাৰ এই অভিযান ভাৰতৰ মহাকাশ অন্বেষণৰ বাবে এক বৃহৎ সফলতা হিচাপে  প্ৰমাণিত হ’ব। ৪০ বছৰৰ পাছত মহাকাশলৈ যাব এজন ভাৰতীয় , যাৰ ফলত দেশৰ বৈজ্ঞানিক খ্যাতি বৃদ্ধি হোৱাই নহয়, ভৱিষ্যতে গগনিয়ান অভিযান আৰু অন্যান্য মহাকাশ অভিযানৰ বাবেও নতুন সম্ভাৱনা মুকলি হ’ব। এই অভিযানে ভাৰতক বিশ্ব মহাকাশ গৱেষণা আৰু বাণিজ্যিক মহাকাশ ভ্ৰমণত গুৰুত্বপূৰ্ণ ভূমিকা গ্ৰহণ কৰাৰ সুযোগ প্ৰদান কৰিব।