Protest in Pakistan : ইমৰান খানৰ সমৰ্থন পাকিস্তানত প্ৰতিবাদ, ছীল কৰা হৈছে ইছলামবাদৰ প্ৰৱেশদ্বাৰ, বন্ধ ইণ্টাৰনেট সেৱা…

ইমৰান খানৰ সমৰ্থনত আজি দেওবাৰে পাকিস্তানত দেশজোৰা প্ৰতিবাদী কাৰ্যসূচী গ্ৰহণ কৰা কথা ঘোষণা কৰিছিল পাকিস্তানৰ তেহৰিক-ই-ইনছাফ দলে । এই প্ৰতিবাদৰ নাম দিয়া হৈছে ‘Do or Die’। একে সময়তে এই প্ৰতিবাদক প্ৰতিৰোধ কৰিবৰ বাবে পাকিস্তান চৰকাৰে সকলো প্ৰকাৰে প্ৰস্তুতি চলোৱাৰ খবৰ লাভ কৰা গৈছে । প্ৰকাশিত খবৰ অনুসৰি, এই প্ৰতিবাদৰ ফলস্বৰূপে কেইবাখনো প্ৰদেশত ইন্টাৰনেট সেৱা বন্ধ কৰি দিয়া হৈছে ।

সূত্ৰ খবৰ অনুসৰি,পাকিস্তানৰ প্ৰাক্তন প্ৰধানমন্ত্ৰী ইমৰাণ খান আৰু ২৬ সংখ্যক সাংবিধানিক সংশোধনীৰ সমৰ্থনত এই প্ৰতিবাদী কাৰ্যসূচী গ্ৰহণ কৰা ঘোষণা কৰে দলটোৱে । এই প্ৰতিবাদত অংশগ্ৰহণৰ বাবে দেশৰ বিভিন্ন প্ৰান্তৰ লোকক ইছলামবাদলৈ সমদল উলিয়াবলৈ আহ্বান জনাইছিল দলটোৱে। ইফালে ইছলামবাদৰ অভিমুখে পদযাত্ৰা কৰা পিটিআইৰ বহু নেতা-কৰ্মীক আৰক্ষীয়ে আটক কৰি ৰখাৰো খবৰ প্ৰকাশ পাইছে । মুলতান ডিভিজনৰ পৰা ইছলামবাদলৈ সমদলে আগবাঢ়িছিল পিটিআইৰ বহু নেতা-কৰ্মীসকল।

দলটোৰ অভিযোগ অনুসৰি, এক ঘটনাত ইছলামবাদ অভিমুখে পদযাত্ৰা কৰি থকা দুই শতাধিক শ্ৰমিকক আটক কৰিছে আৰক্ষীয়ে । দলটোৱে দাবী কৰিছে যে, আটক কৰাসকলৰ ভিতৰত আছে শ্বাহ মাহমুদ কুৰেশ্বীৰ পুত্ৰ জৈন কুৰেশ্বি, প্ৰাক্তন মন্ত্ৰী আমিৰ ডোগাৰ, নদীম কুৰেশ্বি, ৱাছিম ​​বদোজাই, মইনুদ্দিন কুৰেশ্বি আৰু ৰানা টুফাইল নুন ।

সূত্ৰ খবৰ অনুসৰি, ইছলামবাদ অভিমুখে যাত্ৰা কৰা সমদলৰ নেতৃত্ব দি থকা পিটিআইৰ নেতাসকলক গ্ৰেপ্তাৰ কৰিছে আৰক্ষীয়ে । প্ৰতিবাদকাৰীক নিয়ন্ত্ৰণৰ প্ৰচেষ্টাৰ অংশ হিচাপে আৰক্ষীয়ে ইছলামবাদৰ ফৈজাবাদৰ ১৬ জন লোকক আটক কৰে। ইফালে, অঞ্চলটোত সমবেত হোৱা পিটিআই কৰ্মীক ছত্ৰভংগ দিবলৈ আইন প্ৰয়োগকাৰী বিষয়াই শূন্যলৈ গুলীচালনা কৰে বুলিও জানিব পৰা গৈছে । অব্যাহত থকা প্ৰতিবাদৰ মাজতে কৰ্তৃপক্ষই আইন-শৃংখলা বজাই ৰখাৰ বাবে কঠোৰ ব্যৱস্থা গ্ৰহণ কৰিছে।

ইছলামবাদত প্ৰতিবাদকাৰীৰ প্ৰৱেশ বন্ধ কৰিবলৈ কৰ্তৃপক্ষক কঠোৰ নিৰ্দেশ জাৰি কৰিছে চৰকাৰে । এই প্ৰতিবাদৰ ফলস্বৰূপে ৰাৱালপিণ্ডি আৰু ইছলামবাদৰ প্ৰৱেশদ্বাৰ সম্পূৰ্ণৰূপে ছীল কৰা হৈছে। কৰাচী, ইছলামবাদ, ৰাৱালপিণ্ডিকে ধৰি প্ৰধান চহৰসমূহত ম’বাইল ইণ্টাৰনেট সেৱা বন্ধ কৰি দিয়া হৈছে । একে সময়তে ইছলামবাদত ৮ হাজাৰৰো অধিক অতিৰিক্ত আৰক্ষী বিষয়া নিয়োগ কৰা হৈছে বুলি সূত্ৰৰ খবৰ লাভ কৰা গৈছে ।

পঞ্জাৱ প্ৰদেশতো আৰক্ষী বাহিনী মোতায়েন কৰাৰ লগতে ১৪৪ ধাৰা জাৰি কৰা হৈছে। ইয়াৰ অধীনত এই নিষেধাজ্ঞা ২৩ নৱেম্বৰৰ পৰা ২৫ নৱেম্বৰলৈ বলবৎ থাকিব। দলটোৱে ঘোষণা কৰা প্ৰতিবাদত নিৰ্বাচনী ৰিগিঙৰ অভিযোগ,দলীয় কৰ্মীক আটক কৰা আৰু ২৬ সংখ্যক সাংবিধানিক সংশোধনীৰ ওপৰত গুৰুত্ব আৰোপ কৰা হৈছে । উল্লেখ্য যে,আগষ্ট মাহৰ পৰা কাৰাগাৰত বন্দী হৈ আছে দলৰ প্ৰতিষ্ঠাপক তথা প্ৰাক্তন প্ৰধানমন্ত্ৰী ইমৰান খান।