Israel: গাজা, লেবাননত ইজৰাইলৰ ধ্বংসলীলা! শিশু, মহিলাসহ পুনৰ ২০ জনৰ মৃত্যু…

লেবানন আৰু গাজাত ইজৰাইলে চলাইছে এটাৰ পাছত আন এটা আক্ৰমণ। শেহতীয়াকৈ ইজৰাইলে গাজা, বেৰুট আৰু লেবাননত আক্ৰমণ বৃদ্ধি কৰিছে য’ত শ শ লোক মৃত্যু মুখত পৰিছে। গাজা, বেৰুট, লেবাননৰ চাৰিওফাল এতিয়া কেৱল ধ্বংসলীলা। এই আক্ৰমণৰ ফলত সবাতোকৈ বেছি ক্ষতিগ্ৰস্ত হৈছে গাজা,  যি এতিয়া মৃত্যু উপত্যকালৈ পৰিণত হৈছে। ইজৰাইলৰ আক্ৰমণত এতিয়ালৈকে হাজাৰ হাজাৰলোকৰ মৃত্যু হোৱাৰ লগতে বহুলোক আঘাতপ্ৰাপ্ত হৈছে। ইয়াৰ মাজতে পুনৰ ১৭ নৱেম্বৰ দেওবাৰে ইজৰাইল সেনাই গাজা আৰু লেবাননত মাৰাত্মক আক্ৰমণ চলায়।

অসামৰিক প্ৰতিৰক্ষা সেৱাৰ তথ্য অনুসৰি দেওবাৰে গাজাত এই আক্ৰমণৰ ফলত ক’মেও ২০ জন লোক নিহত হোৱাৰ বিপৰীতে প্ৰায় ৬০ জন লোক নিৰুদ্দেশ হৈ আছে। গতিকে পৰৱৰ্তী সময়ত মৃতকৰ সংখ্যা আৰু অধিক বৃদ্ধি হোৱাৰ সম্ভাৱনা আছে। ইয়াৰোপৰি এই ঘটনা আহত হৈছে বহুতো।  ইয়াৰ লগতে ইজৰাইল সেনাই বেৰুটৰ আন্তঃৰাষ্ট্ৰীয় বিমানবন্দৰৰ সমীপৰ হিজবুল্লাহৰ দুৰ্গতো আক্ৰমণ কৰিছে।

যোৱা ছেপ্টেম্বৰৰ পৰা ইজৰাইলে দুটা ফ্ৰণ্টত অকলে যুদ্ধ চলাই আহিছে। গাজাত হামাছৰ সৈতে ইজৰাইলৰ চলি থকা যুদ্ধৰ এবছৰতকৈও অধিক সময় হ’ল। সমান্তৰালভাৱে লেবাননৰ ইৰাণ সমৰ্থিত হিজবুল্লাহৰ সৈতে যুদ্ধ কৰি আছে ইজৰাইলে। দিনক দিনে হিজবুল্লাহৰ ওপৰত আক্ৰমণ ক্ৰমাৎ তীব্ৰতৰ কৰি তুলিছে ইজৰাইলে। এতিয়ালৈকে হিজাবুল্লাহৰ বহু কেইটা শিবিৰ ধ্বংস কৰিছে ইজৰাইলে।

দেওবাৰে গাজাত সংঘটিত আক্ৰমণত চাৰিগৰাকী মহিলা আৰু ৩ শিশুসহ কমেও ২০ জন লোক নিহত হয়। ইয়াৰ লগতে নিৰুদ্দেশ হৈ থকা সকলৰ বিৰুদ্ধে এতিয়াও অভিযান অব্যাহত আছে। এই আক্ৰমণত আহত হৈছে বহুতো। এই আক্ৰমণ সন্দৰ্ভত তথ্য প্ৰদান কৰি অসামৰিক প্ৰতিৰক্ষাৰ মুখপাত্ৰ মাহমুদ বাছালে কয় যে দেওবাৰে কেন্দ্ৰীয় গাজাৰ বুৰেইজ শৰণাৰ্থী শিবিৰত সংঘটিত হোৱা আক্ৰমণত প্ৰায় ১০ জন লোক নিহত হয়।

উল্লেখ্য যে, যোৱা বৰ্ষৰ অক্টোবৰ মাহত হামাছ আৰু ইজৰাইলৰ মাজত যুদ্ধ আৰম্ভ হৈছিল। এতিয়ালৈকে এই যুদ্ধত হাজাৰ হাজাৰলোকৰ মৃত্যু হোৱাৰ লগতে আহত হৈছে বহুতো। ইয়াৰোপৰি হাজাৰ হাজাৰলোক আশ্ৰয়হীন হৈ বিভিন্ন শিবিৰত আশ্ৰয় লৈ আছে। ইজৰাইলে ইতিমধ্যে হামাছ, হিজাবুল্লাহৰ কেইবাগৰাকী শীৰ্ষ নেতাক হত্যা কৰিছে। কিন্তু এতিয়াও হাৰ মানি লোৱা নাই হামাছ, হিজাবুল্লাহে। সময়ে সময়ে হামাছ, হিজাবুল্লাহেও ইজৰাইলৰ ওপৰত আক্ৰমণ কৰি গৈছে।  প্ৰাায় প্ৰতিদিনেই হোৱা এই আক্ৰমণৰ ফলত এতিয়া গাজা, লেবানন পৰ্যবসিত হৈছে মৃত্যু উপত্যকালৈ।