পুনৰ ৬.০ প্ৰাৱল্যৰ ভূমিকম্প! আতংকিত হৈ পৰিছে সকলো

মঙলবাৰে নিশা জাপানৰ কিউছু দ্বীপত সৃষ্টি হয় প্ৰবল ভূমিকম্প। ৰাষ্ট্ৰীয় ভূমিকম্পবিজ্ঞান কেন্দ্ৰ (এন চি এছ)ৰ তথ্য অনুসৰি ভূমিকম্পৰ প্ৰাৱল্য ৬.০।  ২ এপ্ৰিলত ভাৰতীয় সময় অনুসৰি সন্ধিয়া ৭.৩৪ বজাত সংঘটিত হৈছিল এই ভূমিকম্প। এই হঠাৎ হোৱা ভূমিকম্পৰ বাবেই মানুহবোৰ আতংকিত হৈ ঘৰ আৰু অট্টালিকাৰ পৰা ওলাই আহিল। অৱশ্যে এই পৰ্যন্ত কোনো বৃহৎ ক্ষয়-ক্ষতিৰ খবৰ পোৱা নাই।

ভূমিকম্পৰ অভিকেন্দ্ৰ কিউছুৰ দক্ষিণ অঞ্চলত। ভূমিকম্পৰ কম্পনে কেইবা চেকেণ্ডৰ বাবে আতংকিত কৰি তুলিছিল স্থানীয় ৰাইজক। জাপানত ভূমিকম্প সাধাৰণ ঘটনা যদিও ৬.০ প্ৰাবল্যৰ কম্পনক গুৰুতৰ বুলি গণ্য কৰা হয়। বহু ঠাইত মানুহে ঘৰ আৰু কাৰ্যালয়ৰ পৰা ওলাই আহি মুকলি ঠাইত আশ্ৰয় লৈছিল। স্থানীয় প্ৰশাসনে ক্ষয়-ক্ষতিৰ মূল্যায়ন আৰম্ভ কৰিছে।

অৱশ্যে জাপানৰ বতৰ বিজ্ঞান বিভাগে স্পষ্ট কৰি দিয়ে যে, এই ভূমিকম্পৰ পৰা চুনামীৰ কোনো আসংকা নাই। বিষয়াসকলে অহৰহ পৰিস্থিতিৰ ওপৰত নজৰ ৰাখিছে আৰু সকলোকে অতিৰিক্ত সতৰ্ক হ’বলৈ পৰামৰ্শ দিয়া হৈছে। জাপান চৰকাৰৰ দুৰ্যোগ ব্যৱস্থাপনা বিভাগে জৰুৰীকালীন সেৱাসমূহক সাজু থাকিবলৈ নিৰ্দেশ দিছে যাতে যিকোনো অভাৱনীয় পৰিস্থিতিত শীঘ্ৰে ব্যৱস্থা গ্ৰহণ কৰিব পৰা যায়।

জাপানত কিয় সঘনাই ভূমিকম্প হয়?

জাপান ‘পেচিফিক ৰিং অৱ ফায়াৰ’ নামৰ ভূমিকম্প প্ৰৱণ অঞ্চলত অৱস্থিত। পৃথিৱীৰ টেকটনিক প্লেটৰ সংঘৰ্ষৰ বাবে এই অঞ্চলটোক চৰম ভূমিকম্পীয় কাৰ্যকলাপৰ অঞ্চল বুলি ধৰা হয়। কিউছুকে ধৰি সমগ্ৰ জাপানত প্ৰতি বছৰে শ শ সৰু-ডাঙৰ ভূমিকম্প সংঘটিত হয়। চৰকাৰ আৰু স্থানীয় প্ৰশাসনে ভূমিকম্পৰ সৈতে মোকাবিলা কৰিবলৈ উন্নত দুৰ্যোগ ব্যৱস্থাপনা ব্যৱস্থা প্ৰস্তুত কৰিছে, যাতে ক্ষতি হ্ৰাস কৰিব পৰা যায়।

বহুবাৰ সংঘটিত হৈছে ভূমিকম্প

জাপানত বহুতো বিধ্বংসী ভূমিকম্প সংঘটিত হৈছে। ২০১১ চনৰ মাৰ্চ মাহত ৯.১ প্ৰাবল্যৰ ভূমিকম্প আৰু তাৰ পিছত হোৱা ছুনামীয়ে ব্যাপক ধ্বংসলীলাৰ সৃষ্টি কৰিছিল। যাৰ ফলত ফুকচিমা পাৰমাণৱিক কেন্দ্ৰত এক বৃহৎ দুৰ্ঘটনা সংঘটিত হৈছিল। তদুপৰি ২০১৬ চনত কুমামোটোত ৭.০ প্ৰাবল্যৰ ভূমিকম্প সংঘটিত হৈছিল, য’ত বহু লোকে প্ৰাণ হেৰুৱাইছিল। শেহতীয়া ভূমিকম্পটো ৬.০ প্ৰাবল্যৰ আছিল, যিটো ইমান শক্তিশালী নাছিল যদিও ই নিশ্চিতভাৱে আতংক বিয়পাইছিল।

ৰাইজক শান্ত হৈ থাকিবলৈ আৰু কোনো ধৰণৰ উৰাবাতৰিৰ প্ৰতি গুৰুত্ব নিদিবলৈ আহ্বান জনাইছে স্থানীয় প্ৰশাসনে। চৰকাৰে জৰুৰীকালীন সেৱাক এলাৰ্ট মোডত ৰাখিছে, যাতে যিকোনো পৰিস্থিতিত তাৎক্ষণিক ব্যৱস্থা গ্ৰহণ কৰিব পৰা যায়। বিজ্ঞানীসকলে ভূমিকম্পৰ পাছৰ জোঁকাৰণিৰ সম্ভাৱনা ব্যক্ত কৰিছে, সেয়েহে মানুহক সজাগ হৈ থাকিবলৈ পৰামৰ্শ দিয়া হৈছে।