অশান্ত বাংলাদেশ! আঁৰত আছে নেকি পাকিস্তানৰ হাত? সবিশেষ জনালে আৱামী লীগৰ নেতাই…

আকৌ অশান্তিৰ গহ্বৰত বাংলাদেশ । প্ৰায় ছমাহ পূৰ্বে পতন ঘটিছিল হাছিনা চৰকাৰৰ । তেতিয়াৰ পৰা সমগ্ৰ দেশতে বিৰাজ কৰিছে ৰাজনৈতিক অস্থিৰতাই । সূত্ৰ মতে, দেশৰ অন্তৱৰ্তীকালীন চৰকাৰে হিন্দু হত্যাৰ পৰা আৱামী লীগ আনকি বংগবন্ধুকো “নিচিহ্ন কৰা”ৰ বাবে গ্ৰহণ কৰিছে কেতবোৰ কূটকৌশল । এতিয়া ঘটনাৰ প্ৰায় ছমাহ পাছত চুবুৰীয়া দেশখনত সৃষ্টি হৈছে নতুন শংকাৰ । আকৌ এবাৰ বিদ্বেষৰ জুয়ে দহিছে বাংলাদেশক ।

কালি এটা দলে ধানমণ্ডিত থকা বংগবন্ধুৰ বাসগৃহত আক্ৰমণ কৰে । প্ৰথমে ঘৰটো ভাঙিবলৈ অনা হয় বুলডজাৰ । তাৰ পাছত কৰা হয় অগ্নিসংযোগ । স্থানীয় সূত্ৰৰ পৰা জানিব পৰা মতে, হিংসাত্মক ঘটনাৰ সময়ত দুস্কৃতিকাৰীৰ মুখত ‘নাৰা-ই-তকবীৰ’ শ্লোগান শুনা যায় ।

সেই দেশত বসবাস কৰা আৱামি লীগৰ নেতা-কৰ্মীৰ এটা অংশক ইতিমধ্যে এই ঘটনাই জোকাৰি গৈছে । সূত্ৰ অনুসৰি কালিৰে পৰা কেৱল বংগবন্ধুৱেই নহয়, আৱামী লীগৰ আন আন নেতাসকলৰ ঘৰতো আক্রমণ হৈছে ৷ কিন্তু এই উত্তেজনাৰ কাৰণ কি ?

বিশেষজ্ঞৰ মতে দেশৰ ভিতৰতে পুনৰ প্ৰভাৱ বিস্তাৰ কৰিবলৈ সক্ষম হৈছে আৱামী লীগ । দেশ-বিদেশৰ সমৰ্থকসকলৰ সৈতে ভাৰ্চুৱেল মিটিং অনুষ্ঠিত কৰিছে হাছিনাই । আনকি দলটোৰ কিছুমান কাৰ্যসূচীও এই মাহত বাংলাদেশত অনুষ্ঠিত কৰাৰ কথা । তাৰ পূৰ্বেই মৌলবাদীয়ে আৱামী লীগৰ ‘বুজাবুজি’ নীতিক বিফল কৰিবলৈ বংগবন্ধুৰ স্মৃতিক মাটিত মিলায় দিয়ে ।

আৱামী লীগৰ মূল ছাত্ৰ সংগঠন ছাত্ৰ লীগৰ সভাপতি ছাদ্দাম হুছেইনে এই সন্দৰ্ভত টিভি ৯ ক কয়, “বাংলাদেশত এখন উগ্ৰ মৌলবাদী চৰকাৰ গঠন হৈছে । যিসকলে ৰাইজৰ কথা নাভাবে । আপোনালোকে হয়তো প্ৰশ্ন কৰিব পাৰে যে কিয় ? ৰাইজৰ ৰায়ৰ ওপৰত ভিত্তি কৰি এই চৰকাৰ গঠন হোৱা নাছিল । মৌলবাদী অভ্যুত্থানৰ জৰিয়তেহে ইয়াক প্ৰতিষ্ঠা কৰা হৈছিল ।”

মৌলবাদীসকল শ্বেখ মুজিবুৰৰ স্মৃতি নিচিহ্ন ইমান আগ্ৰহী কিয় ? ছাদ্দামে দাবী কৰে, “তেওঁলোকে পাকিস্তানী মতাদৰ্শৰে বাংলাদেশ চলাব বিচাৰে ।” সেইবাবেই তেওঁলোকে এনে বিধ্বংসী ৰূপ ধাৰণ কৰিছে । কাৰণ তেওঁলোকে জানে যে বংগবন্ধুৰ স্মৃতি থকালৈকে বাংলাদেশৰ ৰাইজে এইবোৰ কেতিয়াও মানি নলয় ।