তুৰ্কী চৰকাৰে নিষিদ্ধ কৰিলে ইনষ্টাগ্ৰাম! হামাছৰ মুৰব্বী হানিয়াৰ মৃত্যুৰ সৈতে আছে নেকি সম্পৰ্ক?

তুৰ্কীত সামাজিক নেটৱৰ্কিং প্লেটফৰ্ম ইনষ্টাগ্ৰামৰ নিষিদ্ধ ঘোষণা কৰা হৈছে। সংবাদ মাধ্যমৰ বাতৰি অনুসৰি হামাছৰ মুৰব্বী হানিয়াৰ মৃত্যু সন্দৰ্ভত শ্বেয়াৰ কৰা পোষ্টসমূহ আঁতৰোৱাৰ প্ৰতিক্ৰিয়া স্বৰূপে এই সিদ্ধান্ত লোৱা হৈছে।
অৱশ্যে, তুৰ্কীৰ ইণ্টাৰনেট নিয়ন্ত্ৰকে ইয়াৰ কোনো কাৰণ বৰ্ণনা নকৰাকৈ সিদ্ধান্তটো ঘোষণা কৰিছিল।

এৰ্দোগান চৰকাৰৰ অতি নিকটৱৰ্তী বাতৰি কাকত চাবাহে কৈছিল যে এজন ইনষ্টাগ্ৰাম ব্যৱহাৰকাৰীয়ে হামাছৰ ৰাজনৈতিক নেতা ইছমাইল হানিয়াৰ মৃত্যুত শোক প্ৰকাশ কৰিছে, কিন্তু ইনষ্টাগ্ৰামে পোষ্টটো আঁতৰাই দিছে।
চৰকাৰে ইয়াৰ প্ৰত্যুত্তৰ হিচাপে এই সিদ্ধান্তটো লোৱা বুলি একাংশ কৈছে ।

ইয়াৰ পূৰ্বে তুৰ্কীত ৰাষ্ট্ৰপতি এৰ্দোগানৰ যোগাযোগ সঞ্চালক আৰু সহায়ক ফেহৰটিন আলতুনে মাৰ্ক জুকাৰবাৰ্গৰ কোম্পানী মেটাক সমালোচনা কৰিছিল। তেওঁ কয়, “কোনো নীতি উলংঘনৰ কথা উল্লেখ নকৰাকৈ হামাছৰ নেতা ইছমাইল হানিয়াৰ মৃত্যু সন্দৰ্ভত জনসাধাৰণক শোকবাৰ্তা প্ৰেৰণ কৰাত বাধা দিয়া হৈছে।” উল্লেখ্য যে ফেচবুক আৰু ইনষ্টাগ্ৰাম জুকাৰবাৰ্গৰ কোম্পানী মেটাৰ অধীনত আছে।

হামাছক সন্ত্ৰাসবাদী বুলি গণ্য নকৰে তুৰ্কিয়ে 

NATOৰ সদস্যই তুৰ্কীয়ে হামাছক ইয়াৰ পশ্চিমীয়া মিত্ৰশক্তিৰ দৰে এটা সন্ত্ৰাসবাদী সংগঠন বুলি গণ্য নকৰে। ৰাষ্ট্ৰপতি এৰ্দোগানে গাজাত ইজৰাইলী সেনাৰ কাৰ্যকলাপক ধাৰাবাহিকভাৱে মাত মাতি আহিছে আৰু তেওঁ হামাছৰ যোদ্ধাসকলক স্বাধীনতা সংগ্ৰামী বুলিও কয়। শুকুৰবাৰে তুৰ্কীত ইছমাইল হানিয়াৰ স্মৃতিত শোকৰ দিৱস পালন কৰা হৈছে।

তুৰ্কীৰ আৱাসীসকলে ইনষ্টাগ্ৰাম নিষিদ্ধ কৰাৰ সিদ্ধান্তক হানিয়াৰ মৃত্যুক লৈ শ্বেয়াৰ কৰা পোষ্ট আঁতৰোৱাৰ সৈতে সংযুক্ত কৰিছে। ইয়াৰ আগতে সামাজিক মাধ্যম আৰু ৱেবছাইটসমূহ চেঞ্চৰ কৰাত তুৰ্কীৰ ট্ৰেক ৰেকৰ্ড আছিল। উকীল আৰু মানৱ অধিকাৰ কৰ্মীসকলৰ এটা সংগঠনৰ মতে, এৰ্দোগান চৰকাৰে ২০২২ চনৰ পৰা শ শ ডমেইন ব্লক কৰিছে। কেৱল এয়াই নহয় তুৰ্কীয়ে ২০০৭ চনৰ পৰা ২০১০ চনলৈ ভিডিঅ’ শ্বেয়াৰিং প্লেটফৰ্ম YouTubeয়ো ব্লক কৰিছিল।