Bohag Bihu Festival: বিহুক আদৰিবলৈ সাজু প্ৰতিজন অসমীয়া, চাও‍ক আমাৰ এক প্ৰতিবেদন

পদূলি মুখত হেঁপাহৰ ৰঙালী । বিহু বুলি ক’লেই উলাহে নধৰা হয় প্ৰতিজন অসমীয়াৰ মন । বিহু অসমীয়াৰ চিনাকি, অসমীয়া জাতিৰ আয়ুস ৰেখা । জাতি-বৰ্ণ-ভাষা নিৰ্বিশেষে সকলোৱে বিহু উদযাপন কৰিব পৰাৰ বাবেই বিহুক লোক সংস্কৃতিৰ দপোন তথা অসমীয়া সংস্কৃতিৰ শ্ৰেষ্ঠতম সম্পদ বুলি অভিহিত কৰে । ৰাজ্যজুৰি এতিয়া বিহুৰ প্ৰস্তুতিত ব্যস্ত সকলো । গাঁৱে-ভূঁঞে চহৰে-নগৰে এতিয়া কেৱল ৰঙালী বিহুক আদৰাৰ প্ৰস্তুতি ।

সমান্তৰালকৈ মহানগৰীৰ বজাৰ এতিয়া ভৰি পৰিছে বিহুৰ প্ৰয়োজনীয় বিভিন্ন সামগ্ৰীৰে । নাচনীক সজাব পৰাকৈ কেৰু মণি গাম খাৰুৰ পৰা পিঠা পনালৈ বজাৰত ব্যাপক প্ৰয়োভৰ । বিহুলৈ বুলি যাবলৈ হেঁপাহৰ ৰিহাখন, প্ৰিয় বিহুৱান, টঙালি সকলো সামগ্ৰীৰে ভৰি পৰিছে বজাৰ । মুঠৰ ওপৰত মহানগৰীৰ বজাৰটো এতিয়া পোৱা গৈছে ৰঙালীৰ সুগন্ধ । একাংশ ব্যৱসায়ীৰ মতে বিহু আৰু ঈদ প্ৰায় ওচৰা-ওচৰিকৈ পৰাৰ বাবে বিহুৰ বজাৰ এইবাৰ পূৰ্বতকৈ ভাল হৈছে ৷

হেঁপাহৰ বিহুটো থলুৱা সামগ্ৰীৰে সকলোৱে পালন কৰক বুলি বজাৰলৈ উপলব্ধ হৈছে বহু সামগ্ৰী । জাপিৰ পৰা আৰম্ভ কৰি হাতে বোৱা গামোচালৈ ।

বিহুৰ বজাৰত বৃদ্ধি পাইছে গ্ৰাহকৰ ভিৰ ৷ বিহুৰ সময়ত আত্মীয়-স্বজন, শুভাকাংক্ষী, বন্ধু-বান্ধৱক বিহুৱান এখন, এসাজ নতুন কাপোৰ দিয়াৰ মানসেৰে বহু অসমীয়াই ভিৰ কৰিছে বজাৰত ৷ বিশেষকৈ গুৱাহাটীৰ ফাঁচী বজাৰ, গণেশগুৰিত দেখা গৈছে গ্ৰাহকৰ ব্যাপক ভিৰ । বিহুটি নপতাকৈ থাকিব জানো পাৰি । কিয়নো বিহু থাকিলেহে থাকিব অসমীয়াৰ পৰিচয় ।